വാട്‌സാപ്പിൽ 49 വയസ്സുകാരന്റെ അശ്ലീല വിഡിയോ പകർത്തി; ഭീഷണിപ്പെടുത്തി പണം തട്ടി; യുവതിക്കെതിരെ കേസ്
മുംബൈ: വാട്‌സാപ് വിഡിയോ കോളിനിടെ 49 വയസ്സുകാരന്റെ അശ്ലീല വിഡിയോ പകർത്തിയ ശേഷം ദൃശ്യങ്ങൾ പുറത്തുവിടുമെന്ന് ഭീഷണിപ്പെടുത്തി പണം തട്ടി യുവതിക്കെതിരെ കേസ്.
വിഡിയോ കൂടുതൽ ആൾക്കാർക്ക് അയയ്ക്കുമെന്നും അയയ്ക്കാതിരിക്കാൻ പണം നൽകണമെന്നും ആവശ്യപ്പെട്ട് ഇയാളെ ഭീഷണിപ്പെടുത്തിയെന്നാണ് കേസ്. 10,000 രൂപയാണു തട്ടിയെടുത്തത്. ഖാർ പൊലീസാണ് ഐപിസി വിവിധ വകുപ്പുകളും ഐടി ആക്ടും ചേർത്തു കേസെടുത്തത്.
ഫേസ്‌ബുക്കിൽ റിക്വസ്റ്റ് അയച്ചാണ് യുവതി ഇയാളെ പരിചയപ്പെട്ടത്. ഏപ്രിൽ 24ന് മൊബൈൽ നമ്പർ പങ്കിട്ടു. അര മണിക്കൂർ കഴിഞ്ഞപ്പോൾ വിഡിയോ കാൾ എത്തി. വിഡിയോയിൽ നഗ്‌നയായ വനിത അശ്ലീല പ്രവൃത്തികളിൽ ഏർപ്പെടുകയും ഇയാളോടും അതുപോലെ ചെയ്യാനായി ആവശ്യപ്പെടുകയുമായിരുന്നു. വിഡിയോ റെക്കോർഡ് ചെയ്തത് അറിയാതിരുന്ന ഇയാൾ വനിതയെ അനുസരിച്ചു.
പിന്നീട്, വിഡിയോ അയച്ചശേഷം 5000 രൂപ ആവശ്യപ്പെട്ട് ഭീഷണി മുഴക്കി. 5000 രൂപ നൽകിയ ശേഷം വീണ്ടും 5000 രൂപ ആവശ്യപ്പെട്ടു. അപ്പോഴും പരാതിക്കാരൻ പണം നൽകി. പിന്നീട് 10,000 രൂപ ആവശ്യപ്പെട്ട് മൂന്നാമതും സമീപിച്ചപ്പോഴാണ് സംഭവം സഹോദരനെ അറിയിച്ച ശേഷം പൊലീസിൽ പരാതിപ്പെട്ടത്.
