കൊച്ചി: ഫെഡറൽ ബാങ്കിനു കീഴിലുള്ള നൈപുണ്യ വികസന പരിശീലന സ്ഥാപനമായ ഫെഡറൽ സ്‌കിൽ അക്കാദമി അദ്ധ്യാപന രംഗത്ത് തൊഴിൽ തേടുന്നവർക്ക് പുതിയ നൈപുണ്യ വികസന കോഴ്സ് അവതരിപ്പിച്ചു. അദ്ധ്യാപന രംഗത്തുണ്ടായ ഏറ്റവും പുതിയ മാറ്റങ്ങളും സാങ്കേതിക വിദ്യകളും ഉൾക്കൊള്ളാനും അവ പ്രയോഗിക്കാനും സജ്ജരായ പുതിയ തലമുറ അദ്ധ്യാപകരെ വാർത്തെടുക്കുകയാണ് കോഴ്സിന്റെ ലക്ഷ്യം. കോവിഡ്19 പശ്ചാത്തലത്തിൽ അദ്ധ്യാപന രംഗത്തുണ്ടായ സാങ്കേതികമാറ്റങ്ങളുമായും അതിരുകളില്ലാത്ത ക്ലാസ്മുറികളെന്ന സങ്കൽപ്പവുമായും വേഗത്തിൽ ഇണങ്ങിച്ചേരാൻ ഭാവി അദ്ധ്യാപകരെ ഈ കോഴ്സ് പ്രാപ്തരാക്കും.

അവസാന വർഷ ബി.എഡ് വിദ്യാർത്ഥികൾക്കും ബി.എഡ് പൂർത്തിയാക്കി തൊഴിലന്വേഷിക്കുന്നവർക്കുമാണ് ഈ കോഴ്സിൽ പ്രവേശനം നൽകുന്നത്. 500 മണിക്കൂറുകളാണ് കോഴ്സ് ദൈർഘ്യം. ആദ്യ ബാച്ച് കൊച്ചിയിലെ ഫെഡറൽ സ്‌കിൽ അക്കാദമിയിൽ നടക്കും. പരിശീലനം പൂർത്തിയാക്കുന്നവർക്ക് പ്ലേസ്മെന്റ് സഹായങ്ങളും ഫെഡറൽ ബാങ്കിന്റെ സാമൂഹ്യ ഉത്തരവാദിത്ത പദ്ധതിയുടെ ഭാഗമായി പ്രവർത്തിക്കുന്ന ഫെഡറൽ സ്‌കിൽ അക്കാദമി നൽകും.

ടെക്നോളജി മാധ്യവർത്തിയായി വരുന്ന ഒരു അദ്ധ്യാപന/പരിശീലന വ്യവസ്ഥയിലേക്ക് വിദ്യാഭ്യാസ രംഗം അതിവേഗം ചവടുമാറിക്കൊണ്ടിരിക്കുമ്പോൾ ഈ മേഖലയിൽ തിളങ്ങാൻ ശേഷിയുള്ള ഇ-അദ്ധ്യാപകരുടെ സംഘത്തെ ഈ കോഴ്സ് വാർത്തെടുക്കും.

ഫെഡറൽ ബാങ്ക്