ഡിട്രോയിറ്റ്: ഡിസംബർ 25-ന് ക്രിസ്മസ് ആഘോഷിക്കാൻ തയ്യാറെടുക്കവേ താമസിച്ചിരുന്ന വീടിനു തീപിടിച്ച് ആറും ഏഴും വയസ് പ്രായമുള്ള രണ്ട് സഹോദരങ്ങൾ കൊല്ലപ്പെടുകയും, എട്ടും, പത്തും വയസുള്ള മറ്റ് രണ്ട് സഹോദരങ്ങൾക്ക് കാര്യമായി പൊള്ളലേൽക്കുകയും ചെയ്ത സംഭവം ഡിട്രോയിറ്റിൽ നിന്നും റിപ്പോർട്ട് ചെയ്യപ്പെട്ടു.

ഇരുനില കെട്ടിടത്തിന് രാവിലെ എട്ടുമണിയോടെയാണ് തീപിടിച്ചത്. മുകൾനിലയിൽ മൂന്നു വയസുള്ള കുട്ടിയുമായി കഴിഞ്ഞിരുന്ന മാതാവ് തീ ആളിപ്പടർന്നതോടെ കുട്ടിയുമായി ജനലിലൂടെ മുകളിൽ നിന്നും താഴേയ്ക്ക് ചാടി രക്ഷപ്പെട്ടു.

കൊല്ലപ്പെട്ട രണ്ട് സഹോദരന്മാരും ലിവിങ് റൂമിൽ നിന്നും രക്ഷപെടാനാകാതെ തീയിൽ അകപ്പെടുകയായിരുന്നു. മറ്റു രണ്ടു സഹോദരങ്ങൾക്കും ഗുരുതരമായി പരിക്കേറ്റുവെങ്കിലും അവർ പുറത്തേക്ക് ഓടി രക്ഷപെട്ടു.

താഴെ ക്രിസ്മസ് ട്രീക്ക് സമീപം കിടന്നുറങ്ങുകയായിരുന്നു കൊല്ലപ്പെട്ട സഹോദരങ്ങൾ എന്നാണ് മാതാവ് പറയുന്നത്. അഗ്‌നിശമന സേനാംഗങ്ങൾ എത്തി തീ കെടുത്തിയപ്പോൾ ലിവിങ് റൂമിൽ മരിച്ച നിലയിൽ കണ്ടെത്തുകയായിരുന്നു. വീടിനകത്ത് ധാരാളം ഹീറ്ററുകൾ ഉണ്ടായിരുന്നതായും, സ്മോക്ക് അലാറം വർക്ക് ചെയ്യുന്നില്ലായിരുന്നുവെന്നും കണ്ടെത്തിയിട്ടുണ്ട്. കൊല്ലപ്പെട്ട കുട്ടികളുടെ പേരിൽ ഗോ ഫണ്ട് ആരംഭിച്ചിട്ടുണ്ട്.

 

തീ