ഹിമാചൽ പ്രദേശിനെ വിറപ്പിച്ച് മിന്നൽ പ്രളയം; എട്ടു പേർ മരിച്ചു; വിവിധ ജില്ലകളിലായി നിരവധി പേരെ കാണാതായി; രക്ഷാ പ്രവർത്തനത്തിന് തിരിച്ചടിയാകുന്നത് ഒറ്റപ്പെട്ട പ്രദേശങ്ങളിലേക്ക് എത്താനാകാത്തത്

സിംല: ഹിമാചലിനെ വിറപ്പിച്ച് മിന്നൽ പ്രളയം. കനത്ത നാശനഷ്ടമാണ് പ്രളയത്തിൽ റിപ്പോർട്ട് ചെയ്തത്.എട്ടു പേർ മരിച്ചു. നിരവധി പേരെ കാണാതായി. മരണ സംഖ്യ ഉയർന്നേക്കുമെന്നാണ് സൂചന.കുളുവിൽ നാലു പേരും ലഹോൽ സ്പിതിയിൽ മൂന്നു പേരും മരിച്ചതായി അധികൃതർ പറഞ്ഞു. ഒരാൾ ചമ്പയിലാണ് മരിച്ചത്. ലഹോൽ സ്പിതിയിൽനിന്ന് ഏഴു പേരെ കാണാതായി.

ശക്തമായ മഴയിൽ നദികളിൽ വെള്ളം അതിവേഗം ഉയരുകയായിരുന്നു. നദീതീരത്താണ് കൂടുതൽ ആൾനാശം റിപ്പോർട്ട് ചെയ്തിട്ടുള്ളത്. ഒട്ടേറെ വാഹനങ്ങൾ പ്രളയത്തിൽ ഒഴുകിപ്പോയി.ഹിമാചലിൽ പലയിടത്തും കനത്ത മഴ തുടരുകയാണ്. സംസ്ഥാനത്ത് റെഡ് അലർട്ട് പ്രഖ്യാപിച്ചതായി ഉദ്യോഗസ്ഥർ പറഞ്ഞു.

ദേശീയ ദുരന്ത പ്രതികരണ സേന രക്ഷാപ്രവർത്തനത്തിനു നേതൃത്വം നൽകി വരികയാണെന്ന് അധികൃതർ പറഞ്ഞു. ഒറ്റപ്പെട്ട പ്രദേശങ്ങളിലേക്ക് എത്താനാവാത്തത് രക്ഷാപ്രവർത്തനം ദുഷ്‌കരമാക്കി. റോഡുകളും മറ്റു ഗതാഗത മാർഗങ്ങളും തടസപ്പെട്ടു. നൂറുകണക്കിനു വാഹനങ്ങൾ പലയിടത്തും കുടുങ്ങിയതായാണ് റിപ്പോർട്ടുകൾ.