ന്യൂയോർക്ക്: ഏറെ വിവാദമുയർത്തിയ ഇക്കഴിഞ്ഞ ജൂലൈ 28ന് നടന്ന അമേരിക്കയുടെ മലയാളികളുടെ കേന്ദ്ര സംഘടനയെന്ന് അവകാശപ്പെടുന്ന ഫൊക്കാനയുടെ തിരഞ്ഞെടുപ്പ് ന്യൂയോർക്ക് ക്വീൻസ് കൗണ്ടി സുപ്രിം കോടതി സ്റ്റേ ചെയ്തു.

ജോർജി വർഗീസ് പ്രസിഡന്റായുള്ള ഭരണ സമിതി തെരഞ്ഞെടുപ്പാണ് കോടതി താൽകാലികമായി സ്റ്റേ ചെയ്തത്.. ഫൊക്കാന പ്രസിഡന്റ് സ്ഥാനത്തേക്ക് മത്സര രംഗത്തുണ്ടായിരുന്ന ലീലാ മാരേട്ട്, സെക്രട്ടറി സ്ഥാനാർത്ഥി അലക്‌സ് തോമസ്, ജോസഫ് കുരിയപ്പുറം എന്നിവർ നൽകിയ ഹർജിയിലാണ് കോടതി താത്ക്കാലിക സ്റ്റേ അനുവദിച്ചത്.

ഫൊക്കാന ട്രസ്റ്റീ ബോർഡ് ചെയർമാൻ മാമ്മൻ സി ജേക്കബ്, വൈസ് ചെയർമാൻ ഫിലിപ്പോസ് ഫിലിപ്പ്, അംഗം ബെൻ പോൾ, തിരഞ്ഞെടുപ്പ് കമ്മീഷണർ കുര്യൻ പ്രക്കാനം, പ്രസിഡന്റായി തിരഞ്ഞെടുക്കപ്പെട്ട ജോർജി വർഗീസും, ഫെഡറേഷൻ ഓഫ് കേരള അസോസിയേഷൻസ് ഇൻ നോർത്ത അമേരിക്കയും എതിർ കക്ഷികളായാണ് ഹർജി ഫയൽ ചെയ്തിരിക്കുന്നത്.

2020 സെപ്റ്റംബർ 3-ന് മേൽപറഞ്ഞ കക്ഷികളോ അവരുടെ അഭിഭാഷകനോ കോടതിയിൽ ഹാജരായി വാദം കേട്ട ശേഷമായിരിക്കും തുടർ നടപടികൾ. കേസിന്റെ വാദം പൂർത്തിയാകുന്നതുവരെ ജൂലൈ 28-നു നടന്ന തിരഞ്ഞെടുപ്പ് അസാധുവാക്കി. അതൊടൊപ്പം തിരഞ്ഞെടുക്കപ്പെട്ട ഭാരവാഹികൾക്ക് ഫൊക്കാനയുടെ പേര് ഉപയോഗിക്കുകയോ ആ പേരിൽ ഏതെങ്കിലും മീറ്റിങ് കൂടാനോ സാധിക്കില്ല. തിരഞ്ഞെടുപ്പ് മാറ്റിവെച്ചുകൊണ്ട് 2020 ജൂൺ 12-ന് നാഷണൽ കമ്മിറ്റി എടുത്ത തീരുമാനം എതിർ കക്ഷികൾക്കും ബാധകമാണ്.

 

ഫൊക്കാന