അടച്ചിട്ട മുറിയിലെ അഞ്ചാറു പേർ എന്നത് പഴങ്കഥയായി; മൂവായിരം പേർക്കിരിക്കാവുന്ന നിശാഗന്ധി ഓഡിറ്റോറിയമാണ് ഇത്തവണ സ്വതന്ത്ര ചിന്താ സംഗമത്തിന് വേദിയായത്; കൊതിപ്പിച്ചും പേടിപ്പിച്ചും വന്ന മതത്തിൽ നിന്ന് മുക്തി നേടുന്നവരുടെ എണ്ണം കൂടുകയാണ്; വസ്തു നിഷ്ഠമായ അറിവ് നേടാനുള്ള സാധുവായ ഒരേയൊരു മാർഗ്ഗം സയൻസാണ്; തെളിവുകൾ നയിക്കട്ടെ എന്നത് ഒരു മനോഭാവമാണ്; അറിവിന്റെ ഉൽസവമായ ലിറ്റ്മസിനെ ഏറ്റെടുക്കേണ്ടത് കാലഘട്ടത്തിന്റെ ദൗത്യമാണ്; സജീവൻ അന്തിക്കാട് എഴുതുന്നു

''നിങ്ങൾ പരാജയപ്പെടുന്നതെവിടെയാണെന്ന് പറയട്ടെ. ജീവിതത്തിൽ എപ്പോഴെങ്കിലുമൊരു പ്രതിസന്ധി വരുമ്പോൾ മനുഷ്യന് ഒരത്താണി വേണം. സങ്കടങ്ങൾ തുറന്നു പങ്കു വെക്കാനുള്ള ഒരിടം. ഒരു രക്ഷകനുണ്ടെന്നുള്ള വിശ്വാസം അവർക്കൊരാശ്വാസമാണ്. നിങ്ങൾ ദൈവമില്ലെന്ന് പ്രചരിപ്പിക്കുമ്പോൾ ആപത്തു കാലത്ത് ഉപകാരപ്പെടുന്ന ഒരു രക്ഷകനെ അല്ലെങ്കിൽ ഒരാശ്വാസത്തെയാണ് ഇല്ലാതാക്കാൻ ശ്രമിക്കുന്നത്.

നിങ്ങൾ പരാജയപ്പെടുകയെ ഉള്ളൂ.' കേരളത്തിലെ പല ദാർശനികരും യുക്തിവാദികളോട് നിരന്തരം പറയാറുള്ള കാര്യമാണിത്. പ്രസ്തുത ദാർശനികരിൽ പലരും യാതൊരു ദൈവ വിശ്വാസവുമില്ലാത്തവരായതിനാൽ ആ അഭിപ്രായത്തെ സമൂഹം കയ്യടിച്ചു പ്രോത്സാഹിപ്പിക്കാറുമുണ്ട്.

സത്യത്തിൽ ഈ ദാർശനികർ പറയുന്നതിൽ ശരിയുണ്ടോ? മനുഷ്യർ എന്തെങ്കിലും പ്രതിസന്ധി ഉണ്ടാകുമ്പോൾ നേരെ ദൈവത്തിങ്കലേക്ക് പോകുന്നുണ്ടോ? കഴിഞ്ഞ മാസത്തെ വെള്ളപ്പൊക്കം തന്നെയെടുക്കാം. മലവെള്ളപ്പാച്ചിലിൽ കരുവന്നൂർ പുഴയുടെ ബണ്ട് പൊട്ടി അയൽപ്പക്കങ്ങളിലൊക്കെ വെള്ളപ്പൊക്കമുണ്ടായത് ഒരർദ്ധരാത്രിയിൽ പൊടുന്നനെ
യാണ്. പ്രധാനമായും രണ്ട് പ്രധാനക്ഷേത്രങ്ങളും ഒരു ക്രിസ്ത്യൻ പള്ളിയും രണ്ട് മുസ്ലിം പള്ളികളുമാണ് സമീപത്തുള്ളത്.

ഒരൊറ്റ മനുഷ്യനും അവിടേക്കൊന്നും ഓടുന്നത് ആരും കണ്ടില്ല. വാമനമൂർത്തി ക്ഷേത്രത്തിലും ഭഗവതി ക്ഷേത്രത്തിലും നിത്യപൂജയുണ്ടായി എന്നതൊഴിച്ചാൽ ഒരൊറ്റ വിശ്വാസിയും പ്രളയമുണ്ടായ ഒരാഴ്ച ആ പടി ചവിട്ടിയില്ല. കേരളത്തിൽ മൊത്തം സ്ഥിതിയും ഇങ്ങിനെ തന്നെയാണ് എന്നാണ് കരുതേണ്ടത്. വെള്ളപ്പൊക്കം മൂലം വീട് മുങ്ങിപ്പോയ മനുഷ്യർക്ക് പള്ളികളും അമ്പലങ്ങളുമൊക്കെ അഭയകേന്ദ്രങ്ങളായി മാറി എന്നത് ഒരു അത്ഭുത വാർത്തയായാണ് മാധ്യമങ്ങൾ റിപ്പോർട്ട് ചെയ്തത്.എന്താണാ വാർത്തയിലെ അത്ഭുതം ? ഇപ്പറഞ്ഞ ആരാധനാലയങ്ങൾ ആദ്യമായി മനുഷ്യർക്കുപകാരപ്പെട്ടു എന്നതു തന്നെ .

B) ദൈവം ഒരു തുണയാകുന്നതെപ്പോൾ

പ്രതിസന്ധി ഘട്ടം വരുമ്പോൾ മനുഷ്യർ ദൈവത്തിങ്കലേക്ക് ഓടുമെന്ന് ദാർശനികർ പറയുന്നതൊരുപക്ഷെ 40 വർഷങ്ങൾക്ക് മുമ്പേയുള്ള കേരളത്തെ പറ്റി ഓർത്തായിരിക്കും. പാമ്പുകടിയേറ്റവരെ മുത്തപ്പന്റെ അമ്പലത്തിൽ ഭസ്മ ചികിത്സക്ക് കൊണ്ടുപോയിരുന്ന കാലമായിരുന്നല്ലോ അത്. സ്വാഭാവികമായും നീർക്കോലിയുടെ കടിയേറ്റവർ രക്ഷപ്പെടുകയും മൂർഖൻ വിഷത്തോടെ കടിച്ചവർ മരിക്കുകയും ചെയ്തു. ഇക്കാലയളവനുള്ളിൽ ദാർശനികർ അപ്ഡേറ്റഡായില്ലെങ്കിലും ജനങ്ങൾ വല്ലാതെ മാറിപ്പോയി. ഇപ്പോളാരും ആരാധനാലയങ്ങളെ ഇന്റൻസീവ് കെയർ യൂണിറ്റായി കാണാറില്ല. പ്രതിന്ധികളിൽ ദൈവം ചതിക്കുമെന്നതിന്റെ മകുടോദാഹരണങ്ങളാണ് നാട്ടിലെ ഓരോ ആശുപത്രികളും അതിനുള്ളിലെ ഐ സി.യു/സി.സി.യു സൗകര്യങ്ങളും .

C) അപ്പോൾ പിന്നെ ദൈവം എങ്ങിനെയാണ് മനുഷ്യനെ തുണക്കുന്നത്?

വലിയ തരക്കേടില്ലാതെ ജീവിതം മുന്നോട്ടു പോകുമ്പോഴാണ് ഒരു മനുഷ്യന് ദൈവം ആവശ്യമായി വരിക എന്നതാണ് സത്യം . മറ്റൊരാളോട് പറഞ്ഞാൽ നാണക്കേടുണ്ടാകുന്ന കാര്യങ്ങൾ ധൈര്യമായി ബോധിപ്പിക്കാൻ പറ്റിയ ഒരാളാണ് ദൈവം. അത് ധനമോഹമാകട്ടെ, ഇണ മോഹമാകട്ടെ , സ്ഥാന മോഹമാകട്ടെ, മറ്റൊരാളോടുള്ള ശത്രുതയാകട്ടെ ഏതു ചക്കരക്കൊതിയും പ്രതികാര ദാഹവും എത്ര വേണമെങ്കിലും ബോധിപ്പിക്കാൻ പറ്റിയ ഒരാൾ . എതിർത്തൊന്നും ഇങ്ങോട്ടു പറയുകയില്ല. ആയതിനാൽ ആ ദൈവം കല്ലായാലും , സ്വർണ്ണവിഗ്രഹമായാലും ലോക്കറ്റായാലും കുരിശുരൂപമായാലും ചരിഞ്ഞ പള്ളിയായാലും മനുഷ്യർക്കൊരു വിരോധവുമില്ല.

ഇതറിയാവുന്നതുകൊണ്ടാണ് നടക്കാത്ത കാര്യത്തിനായി പണം ചെലവാക്കുന്നതിനെ ' വഴിപാട് കൊടുത്ത പോലെ ' എന്നു 'വിശ്വാസികളായ മനുഷ്യർ' കളിയാക്കി പറയുന്നത്. 'പള്ളീപ്പോയി പറഞ്ഞാൽ മതി' എന്ന ഏറ്റവും പ്രചാരമുള്ള ഡയലോഗ് വിശ്വാസികൾ പറയുന്നത് അവിടെപ്പോയതു കൊണ്ട് ഒരു കാര്യവുമില്ല എന്ന അർത്ഥത്തിൽ തന്നെയാണ്.

D) കൊതിപ്പിച്ചും പേടിപ്പിച്ചും വന്ന മതം

മനുഷ്യന്റെ ഭയത്തെയും കൊതിയെയും അതുകളിൽ നിന്നുരുവായ ദൈവത്തെയും ഉയോഗപ്പെടുത്തി വളർന്നു വന്ന വിശ്വാസപ്രസ്ഥാനമാണ് മതം. മതമേതായാലും എല്ലാ മതങ്ങളും ഒരേ ചിന്താരീതിയാണ് വെച്ചു പുലർത്തുന്നത്. അതിനെ മതാത്മക ചിന്താരീതി എന്ന് വിളിക്കാം. കൺമുന്നിൽ കാണുന്ന തെളിവുകൾക്ക് കാൽക്കാശിന്റെ പ്രാധാന്യം നൽകാത്ത ഒരു ചിന്താഗതിയാകുന്നു അത്. കാർന്നോന്മാരിലും പ്രവാചകന്മാരിലും ചില പുസ്തകങ്ങളിലെഴുതി വെച്ച പ്രമാണങ്ങളിലും ആ ചിന്താഗതി വേരൂന്നി നിൽക്കുന്നു. തെളിവുകളിലും നിരീക്ഷണങ്ങളിലും യാതൊരു താൽപ്പര്യമില്ലാതിരുന്നതിനാൽ അറിവുകൾക്കായി കണ്ണടച്ചിരുന്ന് പ്രമാണങ്ങൾ രചിക്കുകയായിരുന്നു പല കാർന്നോന്മാരുടെയും പണി .ഈ പ്രക്രിയയെ ധ്യാനമെന്ന് പിന്നീട് അവർ തന്നെ വിശേഷിപ്പിക്കുകയുണ്ടായി.

കണ്ണടച്ചിരിക്കുമ്പോൾ അവർക്ക് തോന്നിയ പ്രമാണങ്ങൾക്കനുസരിച്ച് പ്രകൃതിയിലെ ഓരോ പ്രതിഭാസങ്ങളെയും അവർ വിശദീകരിച്ചു. തെളിവുകൾ അവരുടെ പ്രമാണങ്ങൾക്ക് വിരുദ്ധമായി വന്നപ്പോഴൊക്കെ അവയെ വ്യാഖ്യാനിച്ച് അനുകൂലമാക്കാൻ വ്യാഖ്യാന ഫാക്ടറികളും അവർ തന്നെ ഉണ്ടാക്കി. അവർ പിന്നീട് പ്രവാചകന്മാരായും ദൈവദൂതന്മാരായും വാഴ്‌ത്തപ്പെട്ടു. ഇവർ ചമച്ച പ്രമാണങ്ങളും വ്യാഖ്യാനങ്ങളും ആരൊക്കൊയൊ അവരവരുടെ ഭാവനാനുസൃതം എഴുതി രേഖപ്പെടുത്തി വെച്ചപ്പോൾ അതിന്റെ പേര് പുണ്യ ഗ്രന്ഥങ്ങൾ എന്നായി.

E) ചിന്താരീതിയെ തിരിച്ചിട്ട നാളുകൾ

കുതിരയും വണ്ടിയും ഗതാഗതം നിയന്ത്രിച്ചിരുന്ന കാലമായതിനാൽ വണ്ടിയുടെ മുന്നിലാണ് കുതിരയെ കെട്ടേണ്ടതെന്ന് മനുഷ്യർക്കൊക്കെ അന്നറിയാമായിരുന്നു. വണ്ടി നീങ്ങണമെങ്കിൽ മിനിമം പ്രയോഗിക്കേണ്ട അറിവാണല്ലോ അത്. പക്ഷെ പ്രവാചകർ ചമക്കുന്ന പ്രമാണങ്ങളുടെയും പ്രകൃതിയിൽ കാണപ്പെടുന്ന പ്രതിഭാസങ്ങളുടെയും കാര്യത്തിൽ ഈ അറിവ് പ്രയോഗിക്കപ്പെടുന്നില്ലല്ലോ എന്ന് വളരെക്കുറച്ച് പേർക്ക് തോന്നിയിരിക്കണം. പ്രകൃതിയിൽ കാണപ്പെടുന്ന പ്രതിഭാസങ്ങളെ നിരീക്ഷിച്ചും ആവർത്തിച്ച് പരിശോധിച്ചുമല്ലേ മനുഷ്യൻ ഒരു പ്രമാണത്തിൽ എത്തിച്ചേരേണ്ടത്. പകരം കണ്ണടച്ച് ഒരു പ്രമാണമുണ്ടാക്കി പ്രകൃതിയിൽ കാണപ്പെടുന്ന പ്രതിഭാസങ്ങളിൽ ആ പ്രമാണങ്ങൾ കൊണ്ടുപോയി ആരോപിക്കുന്നത് കുതിരക്ക് പിന്നിൽ കൊണ്ടുപോയി വണ്ടി കെട്ടുന്നതിനു തുല്യമല്ലേ?

അറിവ് നേടാനുള്ള വഴി പ്രമാണത്തിൽ നിന്ന് പ്രതിഭാസത്തിലേക്കല്ല മറിച്ച് പ്രതിഭാസങ്ങളിൽ നിന്ന് പ്രമാണങ്ങളിലേക്ക് എന്നതാണെന്ന് തിരിച്ചറിഞ്ഞ വളരെക്കുറച്ചു പേരാണ് സമൂഹത്തിൽ ശാസ്ത്രീയ ചിന്താരീതിയുടെ വിത്തുപാകിയത്. ആ ചിന്താരീതി ക്രമേണ സമൂഹത്തിൽ പടരാൻ തുടങ്ങി. പക്ഷെ ദോഷം പറയരുതല്ലോ ; അന്നു മുതൽ തുടങ്ങിയ പാലം വലി തന്നെയാണ് ഇന്നും വിശ്വാസ പ്രസ്ഥാനങ്ങൾ തുടർന്നു പോരുന്നത്. അറിവിനായി പുണ്യപുസ്തകങ്ങളെയും പൂർവികരെയും ആശ്രയിക്കുന്ന ഇന്ത്യയെപ്പോലുള്ള രാജ്യങ്ങളിൽ അറിവിന്റെ പ്രവാഹത്തിനുള്ള പ്രധാന തടസ്സം മേൽ സൂചിപ്പിച്ച വിശ്വാസ പ്രസ്ഥാനങ്ങൾ തന്നെയാകുന്നത് സ്വാഭാവികമാണ്. അതായത് കുതിരയെ മുമ്പിൽ കെട്ടാൻ അവർ സമ്മതിക്കുകയില്ലെന്നർത്ഥം.

F) തെളിവുകൾ നയിക്കട്ടെ എന്നത് ഒരു മനോഭാവമാണ്

തെളിവുകളെ പരമപ്രധാനമായി കണ്ടു കൊണ്ടുള്ള ചിന്താരീതി ഒരു മനോഭാവമാണ്. മനുഷ്യൻ ഈ രീതി അവലംബിക്കാൻ തുടങ്ങിയിട്ട് ഏകദേശം 500 വർഷമെ ആയിട്ടുള്ളൂ .അതായത് ബാക്കിയുള്ള സഹസ്രാബ്ദങ്ങൾ മനുഷ്യർ തെളിവു രഹിത വിശ്വാസ രീതിയിലാണ് ജീവിച്ചു പോന്നതെന്നർത്ഥം. കാട്ടിൽ ജീവിച്ചിരുന്ന കാലത്ത് ഒരു സ്പീഷിസ് എന്ന രീതിയിൽ അതിജീവിക്കാൻ അന്ധമായ വിശ്വാസം അവർക്ക് തുണയായിട്ടുണ്ടാകുമെന്ന് നമുക്കൂഹിക്കാം.

'പുലി വരുന്നേ ഓടിക്കോ' എന്ന മുന്നറിയിപ്പ് കേട്ട പാടെ ഒന്നും നോക്കാതെ ഓടിയ മനുഷ്യരായിരിക്കാം അതിജീവിച്ചത്. ശരിക്കും പുലി വരുന്നുണ്ടോ എന്ന് പരിശോധിക്കാൻ നിന്നവരുടെ അതിജീവന സാധ്യത പരമകഷ്ടമായിരിക്കാം. എന്തായാലും മുകളിൽ നിന്നുള്ള ഓർഡർ അനുസരിച്ചും കേട്ടതു വിശ്വസിച്ചും ദുർഘട സാഹചര്യങ്ങളെ അതിജീവിച്ച ഒരു സ്പീഷിസ്സാണ് ഹോമോസാപ്പിയൻസ് എന്ന കാര്യത്തിൽ തർക്കമില്ല. 'തെളിവ് വേണ്ടാ'എന്ന മനോഭാവം ഗോത്ര കാലം മുതൽ മനുഷ്യരുടെ ഉള്ളിൽ കയറിയ ബാധയാണെന്നർത്ഥം.
പിന്നീട് കൃഷിയും കച്ചവടവുമൊക്കെയായി സ്ഥിരമായി ഒരിടത്ത് വാസമുറപ്പിച്ച കാലത്തും ഭൂമി ഉപേക്ഷിക്കേണ്ടി വന്നാൽ ജീവിക്കാൻ പറ്റിയ അന്യഗ്രഹം തപ്പി നടക്കുന്ന ഇക്കാലത്തും ഭൂരിപക്ഷം മനുഷ്യരും തെളിവിന് പരമ പ്രാധാന്യം കൽപ്പിക്കാത്തത് ഗോത്ര കാലത്ത് കയറിക്കൂടിയ ആ ബാധയുടെ ശക്തി വൈശിഷ്ട്യം കൊണ്ടാണ്.

എന്തുകൊണ്ട് യുക്തിവാദികളും സ്വതന്ത്ര ചിന്തകരും സമൂഹത്തിൽ ന്യൂനപക്ഷമായി തന്നെ അവശേഷിക്കുന്നു എന്ന ചോദ്യത്തിനുള്ള ഉത്തരവും മേൽ സൂചിപ്പിച്ച ബാധയിൽ തന്നെയുണ്ട്. വിശ്വാസം ഒഴുക്കിനനുസരിച്ച് കിടന്ന് കൊടുക്കലാണ്. നാസ്തികത ഒഴുക്കിനെതിരെയുള്ള നീന്തലാണ്. തീർച്ചയായും ഒരാളുടെ മസ്തിഷ്‌ക്കം സെലക്ട് ചെയ്യുക ഈസിയായ ഓപ്ക്ഷൻ ആയിരിക്കുമല്ലോ. വിശ്വാസം സ്വാഭാവികമായ കാര്യവും യുക്തി ആർജ്ജിക്കേണ്ടതുമാണെന്ന് ഇത് കാണിക്കുന്നു.

G) സ്വതന്ത്ര ചിന്തകരും നാസ്തികരും

യുക്തിയെ അടിസ്ഥാനപ്പെടുത്തിയ അറിവ് മാത്രം സ്വീകരിക്കുക എന്ന മനോഭാവത്തിലേക്ക് വിശ്വാസ മനോഭാവക്കാരെ കൊണ്ടുവരാനായി പരിശ്രമിക്കുന്നവരെയാണ് സ്വതന്ത്ര ചിന്തകർ / നാസ്തികർ എന്നൊക്കെ വിളിച്ചു പോരുന്നത്.

പൊതുവായി അവർ പിന്തുടരുന്ന നിലപാടുകൾ ഇവയാണ്

1 )വസ്തുനിഷ്ഠമായ അറിവ് നേടാനുള്ള സാധുവായ ഒരേയൊരു മാർഗ്ഗം സയൻസാണ്

2 ) ശാസ്ത്രീയമായ അറിവുകൾ സമൂഹ നന്മക്കായി വിനിയോഗിക്കപ്പെടണം

3) ജാതി, കളർ, ധനം, ജീവിത സാഹചര്യങ്ങൾ , അംഗ പരിമിതി തുടങ്ങി ഒരു വ്യക്തിയുടെ നിയന്ത്രണത്തിലല്ലാത്ത കാര്യങ്ങളെ അടിസ്ഥാനപ്പെടുത്തി ആ വ്യക്തിക്ക് തുല്യനീതി നിഷേധിക്കുന്നത് കുറ്റകൃത്യമാണ്.

4) വ്യക്തിയാണ് സമൂഹത്തിന്റെ അടിസ്ഥാന ഘടകം. വ്യക്തിസ്വാതന്ത്ര്യം പരമപ്രധാനമാണ്. ഒരു വ്യക്തിയുടെ സ്വാതന്ത്ര്യം മറ്റൊരാളുടെ സ്വാതന്ത്ര്യത്തെ ഹനിക്കുന്ന സാഹചര്യങ്ങൾ നിർണ്ണയിക്കുകയും അങ്ങിനെ സംഭവിക്കാതിരിക്കുന്നതിനുതകും വിധം നിയമനിർമ്മാണങ്ങൾ നടത്തുകയും ചെയ്യുന്നത് സ്റ്റേറ്റിന്റെ അധികാരമാണ്. ഇതിനേക്കാൾ കൂടുതൽ അധികാരം സ്റ്റേറ്റിനുണ്ടായിക്കൂടാ.

5) ഇന്ന് നിലനിൽക്കുന്ന വ്യവസ്ഥകളിൽ ഏറ്റവും അനുയോജ്യമായത് പാർലിമെണ്ടറി ജനാധിപത്യമാണ്.

6) മതങ്ങളെയും വിശ്വാസ പ്രമാണങ്ങളെയും ജനാധിപത്യ സംവിധാനത്തിന്റെ നടത്തിപ്പിൽ കൈകടത്താൻ അനുവദിക്കരുത്.

7) ശാസ്ത്രീയമായി തെറ്റെന്നു തെളിയിച്ചതോ ഒരിക്കലും തെറ്റെന്നു തെളിയിക്കാൻ കഴിയാത്ത രൂപത്തിൽ ചമച്ചതോ (Non falsifiable) ആയ പ്രമാണങ്ങളെ നിഷ്‌ക്കരുണം തള്ളിക്കളയേണ്ടതുണ്ട്. അപ്രകാരം ശാസ്ത്രീയമായി തെളിയിക്കപ്പെടാത്ത ചികിത്സാരീതികളായ ഹോമിയോപ്പതി , പ്രകൃതിചികിത്സ ,യോഗ ചികിത്സ, ധ്യാന ശുശ്രൂഷ, മന്ത്രവാദ ചികിത്സ , യുനാനി തുടങ്ങിയവയെ അന്ധവിശ്വാസങ്ങളായി കരുതേണ്ടതുണ്ട്. പ്രവചന രീതികളായ ജ്യോതിഷം, വാസ്തു , കൈനോട്ടം, മഷിനോട്ടം എന്നിവ നിരോധിക്കപ്പെടേണ്ടതാണ്. മിഡ് ബ്രെയിൻ ആക്ടിവേഷൻ , സൺഡേ ക്ലാസ്സ് , ശാഖാ ക്ലാസ് , മദ്രസ്സ ക്ലാസ് പോലുള്ള അശാസ്ത്രീയ വിദ്യാഭാസ രീതികൾ നിർത്തലാക്കേണ്ടതാണ്.

8 ) ഏതെങ്കിലും ഒരു വിഭാഗം സമൂഹത്തിന്റെ പരമാധികാരം കൈക്കലാക്കുന്ന വ്യവസ്ഥയും ഒരു പാർട്ടി പരമാധികാരിയാകുന്ന വ്യവസ്ഥയും ആധുനിക സമൂഹത്തിന് അനുഗുണമല്ല. അതു കൊണ്ടു തന്നെ രാജഭരണം , ഫാസിസം , ലെനിനിസം ,മാവോയിസം,അടിയന്തരാവസ്ഥ എന്നിവയൊന്നും സ്വീകാര്യമല്ല.

9) ശാസ്ത്രീയ മനോവൃത്തിയിലൂടെ (Scientific Temper) മാത്രമെ പുതിയ ലോകം പടുത്തുയർത്താനാകൂ.മനുഷ്യരുടെ മതാത്മക ചിന്താരീതിയെ പുതുക്കി പണിയുന്നതിലൂടെ മാത്രമെ അവർക്ക് ശാസ്ത്രീയ മനോവൃത്തി കൈവരികയുള്ളൂ. അതിനായി ജനങ്ങൾക്കിടയിൽ നടത്തേണ്ട വിദ്യാഭാസം പ്രവർത്തനമാണ് സ്വതന്ത്ര ചിന്താ പ്രവർത്തനം 

10) വിശ്വമാനവികതയെപ്പറ്റിയും വിജ്ഞാനത്തിന്റെ അതിരില്ലാത്ത വ്യാപനത്തെക്കുറിച്ചുള്ള സ്വപ്നങ്ങൾ പങ്കുവെക്കുന്നു.

H) ലിറ്റ്മസ് 2018

'അടച്ചിട്ട മുറിയിൽ അഞ്ചാറു പേർ '! ' പൊതുവെ നാസ്തികരുടെയും സ്വതന്ത്ര ചിന്തകരുടെയും പ്രോഗ്രാമുകളെ പറ്റി വിശ്വാസികൾ കളിയാക്കാറുള്ളതിങ്ങനെയാണ്. പക്ഷെ കേരളത്തിലെ ജാതി വിരുദ്ധ - മതവിരുദ്ധ -നവോത്ഥാന പ്രസ്ഥാനങ്ങൾ 1939 വരേയും ഇങ്ങിനെയല്ലായിരുന്നു. ഭരണകൂടം പിടിച്ചെടുത്ത് അധികാരം കൈക്കലാക്കിയാൽ സമൂഹത്തെ എളുപ്പം മാറ്റിയെടുക്കാനാകുമെന്ന വ്യാമോഹ പ്രത്യയശാസ്ത്രത്തിലേക്ക് നവോത്ഥാന നായകരിൽ ഭൂരിപക്ഷവും വഴിമാറിപ്പോയതോടെയാണ് കേരളത്തിലെ ജ്ഞാനോദയ പ്രസ്ഥാനത്തിൽ ആളില്ലാതായത്. പക്ഷെ സംഭവിച്ചത് മറ്റൊന്നായിരുന്നു.

ഭരണാധികാരം കൈക്കലാക്കിയവർക്ക് മനുഷ്യന്റെ മനസ്ഥിതി മാറ്റുന്നതിനേക്കാൾ പ്രധാനം അധികാരം നിലനിർത്തുകയെന്നത് മാത്രമായി. അതിനായി മതങ്ങളെ പ്രീണിപ്പിക്കുന്നതിൽ കക്ഷിരാഷ്ട്രീയക്കാർ മത്സരിക്കുന്ന കാഴ്ചയാണ് 1967 മുതലിങ്ങോട്ട് കാണാനായത്. മതങ്ങളെ പ്രീണിപ്പിച്ചു പ്രീണിപ്പിച്ച് പുരോഹിതർക്കും മതമേലാളർക്കും നാട്ടിലെ നിയമ വ്യവസ്ഥ ബാധകമല്ലാത്ത അവസ്ഥ സംജാതമായി. എഴുത്തുകാരൻ എന്തെഴുതണമെന്ന് നിശ്ചയിക്കാനുള്ള അധികാരം മത-വർഗീയതെമ്മാടികൾക്കായി.

ജാതിയും മതവും നോക്കിയാകണം ഓരോ നിയോജക മണ്ഡലങ്ങളിലെയും സ്ഥാനാർത്ഥികളെ നിശ്ചയിക്കേണ്ടത് എന്ന അപകട സ്ഥിതിയിലേക്ക് ജനാധിപത്യ വ്യവസ്ഥ വഴി മാറി. 'ഭരണകൂടം പിടിച്ചെടുത്ത് മനുഷ്യന്റെ മനസ്ഥിതി മാറ്റുക ' എന്ന മോഡലിന്റെ സമ്പൂർണ്ണ പരാജയമായിരുന്നു അത്. സ്വന്തമായും സ്വതന്ത്രമായും നിർഭയമായി ചിന്തിക്കാൻ ധൈര്യപ്പെടുന്ന വോട്ടു ബാങ്കല്ലാത്ത മനുഷ്യന് ബദലുകളന്വേഷിക്കേണ്ടി വന്നത് അതുകൊണ്ടാണ്. കേരളത്തിൽ ജ്ഞാനോദയം പൂർണ്ണമാകണമെങ്കിൽ മോഹിപ്പിക്കുന്ന എളുപ്പവഴികൾ ഉപേക്ഷിക്കേണ്ടതുണ്ടെന്ന തിരിച്ചറിവാണ് അതിൽ പ്രധാനം. മനുഷ്യന്റെ മനോഭാവത്തെ മാറ്റിയെടുക്കുകയെന്നത് വളരെ ക്ഷമാപൂർവ്വം ചെയ്യേണ്ട വിദ്യാഭ്യാസ പദ്ധതിയാണ്. ജാഥയും ഹർത്താലും വഴി തടയലുമൊന്നും അതിന്റെ വഴികളല്ല.

ജനങ്ങളുടെ ചിന്താരീതിയെ പരിഷ്‌ക്കരിച്ച് സയൻസിന്റെ ചിന്താരീതിയിലേക്ക് കൊണ്ടു വരികയെന്ന മഹത്തായ ലക്ഷ്യത്തോടെ 2012 മാണ്ടോടെയാണ് നവനാസ്തികതയുടെ തുടക്കം സി. രവിചന്ദ്രന്റെ 'നാസ്തികനായ ദൈവം' പോലുള്ള പുസ്തകങ്ങൾ , ആ പുസ്തകവുമായി ബന്ധപ്പെട്ടു കേരളത്തിലങ്ങോളമിങ്ങോളം അവതരിപ്പിക്കപ്പെട്ട പവർ പോയിന്റ് പ്രസന്റേഷനുകൾ ,ഫേസ്‌ബുക്ക് പോലുള്ള സാമൂഹ്യ മാധ്യങ്ങളിലൂടെയുള്ള ഇടപെടലുകൾ, ബ്ലോഗെഴുത്തുകൾ തുടങ്ങി ഒരു ചിന്താവിപ്ലവം തന്നെ അരങ്ങേറുകയായിരുന്നു.

സ്വതന്ത്ര ചിന്തകരുടെ പ്രഭാഷണങ്ങൾ ഷൂട്ട് ചെയ്തു യുടൂബിൽ അപ് ലോഡ് ചെയ്യാനാരംഭിച്ചതോടെ സദസ്സിലിരിക്കുന്ന നൂറു പേരിൽ നിന്ന് ലോകമെമ്പാടുമുള്ള ലക്ഷക്കണക്കിന് പേരിലേക്ക് സ്വതന്ത്ര ചിന്താ പ്രവാഹമുണ്ടായി. 'ശുഷ്‌ക്ക സദസ്സുകൾ നിറഞ്ഞ സദസ്സുകളായി മാറി. 2016 ലാണ് എസൻസ് എന്ന സംഘടന രൂപീകരിക്കപ്പെടുന്നത്. ഈ കൊച്ചു കേരളത്തിൽ മാത്രം അമ്പതോളം പ്രഭാഷകർ എസൻസിന്റെ ബാനറിൽ അണി നിരന്നു. ന്യൂറോൺസ് എന്ന യുടൂബ് ചാനലും കൂടിയെത്തിയതോടെ അടച്ചിട്ട മുറിയിലെ അഞ്ചാറു പേർ എന്നത് പഴങ്കഥയായി. മൂവായിരം പേർക്കിരിക്കാവുന്ന തിരുവനന്തപുരത്തെ നിശാഗന്ധി ഓഡിറ്റോറിയം ലിറ്റ്മസ് - 18 എന്ന് പേരിട്ടിരിക്കുന്ന സ്വതന്ത്ര ചിന്താ സംഗമത്തിന്റെ വേദിയായി മാറി. ഈ കുറിപ്പെഴുതുന്ന സമയം ഒക്ടോബർ 2 ,3 തിയ്യതികളിൽ നടക്കുന്ന ലിറ്റ്മസ് 18 എന്ന അന്തർദേശീയ ശാസ്ത്ര സ്വതന്ത്ര ചിന്താ സെമിനാറിൽ പങ്കെടുക്കാൻ ഓൺലൈൻ രജിസ്റ്റർ ചെയ്തവരുടെ എണ്ണം ആയിരം കടന്നു കഴിഞ്ഞു.

i) ജീനോൺ

ലിറ്റ്മസിലെ ജൈവ പരിണാമത്തെക്കുറിച്ചുള്ള ചോദ്യോത്തര പരിപാടിയാണ് ജീനോൺ. പരിണാമ സംബന്ധിയായി കേരളത്തിൽ നടക്കുന്ന പ്രഥമവും പിന്നീട് കൃഷിയും
ബൃഹത്തുമായ വാദപ്രതിവാദവും ഇതു തന്നെ. പരിണാമശാസ്ത്രത്തിൽ പരിണതപ്രജ്ഞരായ ഡോ : മനോജ് ബ്രൈറ്റ് , ഡോ: പ്രവീൺ ഗോപിനാഥ് , ഡോ: ദിലീപ് മമ്പള്ളിൽ , കൃഷ്ണപ്രസാദ് എന്നിവരാണ് ചോദ്യകർത്താക്കൾക്ക് മറുപടി പറയുക. ചോദ്യം ചോദിക്കുവാനുള്ള മാനസികാവസ്ഥയെ പ്രോത്സാഹിപ്പിക്കുന്നതിനായി അവാർഡുകളും ഏർപ്പെടുത്തിയിരിക്കുന്നു. ഒന്നാംസമ്മാനം-3000 രൂപ, രണ്ടാംസമ്മാനം-2000 രൂപ, മൂന്നാംസമ്മാനം-1000. പുറമെ 500 രൂപയുടെ നാല് സമാശ്വാസസമ്മാനങ്ങൾ വേറെയും.

J) മൂന്ന് സെക്ഷനുകൾ 16 പ്രഭാഷണങ്ങൾ

ഇന്ത്യയിൽ നിന്നും വിദേശത്തു നിന്നുമുള്ള 22 പ്രഭാഷകർ ലിറ്റ്മസ് - 18 ന്റെ സവിശേഷതയെ അടയാളപ്പെടുത്തുന്നു . സർവ്വശ്രീ: ഡോ അഗസ്റ്റസ് മോറീസ്, ഡോ. വൈശാഖൻ തമ്പി, ബൈജു രാജ് (UAE) ,ഡോ. സാബു ജോസ്, ഡോ. കെ. എം. ശ്രികുമാർ, അയൂബ് മൗലവി , അനീഷ് ബാലദേവൻ(USA) ,ഡോ സുനിൽകുമാർ, മനുജ മൈത്രി ,രമേശ് രാജശേഖരൻ (Bangalore),
മഞ്ചു മനുമോഹൻ (UK) ,ഉമേഷ് അമ്പാടി,ഡോ. ആൽബി ഏലിയാസ് (Australia),ജോസ് കണ്ടത്തിൽ , തങ്കച്ചൻ പന്തളം(Banglore) ,രവിചന്ദ്രൻ സി എന്നിവരെ നേരിട്ടു കാണാനും കേൾക്കാനുമുള്ള അസുലഭ വേദിയായി മാറുകയാണ് തിരുവനന്തപുരം നിശാഗന്ധി.

k) എസൻസ് അവാർഡ്

ഡോ: വൈശാഖൻ തമ്പിയും ഡോ: ആഗസ്റ്റസ് മോറിസുമാണ് ഈ വർഷത്തെ എസൻസ് അവാർഡിനർഹരായ സയൻസ് പ്രചാരകർ . 15000 രൂപയാണ് അവാർഡ് തുക. നിശാഗന്ധിയിലെ പ്രൗഢ സദസ്സിനെ സാക്ഷിയാക്കി ഡോ: ബി ഇഖ്ബാൽ അവാർഡുകൾ ജേതാക്കൾക്ക് കൈമാറും.

എസൻസ് കസ്റ്റോഡിയൻ ഓഫ് ഹ്യൂമനിസം അവാർഡ് കരസ്ഥമാക്കിയിട്ടുള്ളത് ശ്രീ. ജോബിഷ് ജോസഫാണ്. മഹാപ്രളയത്തിലകപ്പെട്ട നൂറുകണക്കിനു പേരെ രക്ഷിച്ച മാനവികതയെ മുൻനിർത്തി അദ്ദേഹത്തിന് സമ്മാനിക്കപ്പെടുന്ന ഈ അവാർഡ് സ്പോൺസർ ചെയ്തിട്ടുള്ളത് എസൻസിന്റെ UK ഘടകമാണ്. മലയാളത്തിൽ ആദ്യമായി എഴുതപ്പെട്ട ബുദ്ധ മതവിമർശന ഗ്രന്ഥത്തിന്റെ പ്രകാശനവും ലിറ്റ്മസിൽ വച്ചാണ് നടക്കുന്നത്.ഡോ: മനോജ് ബ്രൈറ്റ് എഴുതിയ 'ബോധി വൃക്ഷത്തിലെ മുള്ളുകൾ'' എന്ന പുസ്തകമാണ് ഡോ: ഇഖ്ബാൽ വായനക്കാർക്കായി സമർപ്പിക്കുന്നത്.

ലിറ്റ്മസിന്റെ രണ്ടാം ദിനമായ ഒക്ടോബർ 3ന് പഠന വിനോദയാത്രയാണ്. തിരുവനന്തപുരം ജില്ലയിലെ പ്രകൃതി രമണീയ പ്രദേശങ്ങളിലൂടെയുള്ള ഒരു യാത്രയും പഠനവുമാണ് . വൈകീട്ട് 6 മണിക്ക് തിരുവനന്തപുരം നഗരത്തിൽ തിരിച്ചെത്തുന്ന വിധമാണ് യാത്ര ചിട്ടപ്പെടുത്തിയിരിക്കുന്നത്. ലിറ്റ്മസ് 2018 ; സയൻസിന്റെയും സ്വതന്ത്ര ചിന്തയുടെയും ചരിത്രത്തിൽ ആദ്യത്തേതാണീ സംരഭം.വിജ്ഞാന കുതുകികൾക്ക് മിസ് ചെയ്യാനാകാത്തത്. ഇന്നു തന്നെ രജിസ്റ്റർ ചെയ്യുക . തെളിവുകൾ നയിക്കട്ടെ

ഓൺലൈൻ രജിസ്‌ട്രേഷന് ഇവിടെ ക്ലിക് ചെയ്യുക

( ചലച്ചിത്ര സംവിധായകനും എഴുത്തുകാരനും പ്രഭാഷകനുമായ സജീവൻ അന്തിക്കാട് ലിറ്റ്മസ് സംഘാടക സമിതിയുടെ പ്രസിഡന്റാണ്).