അടുത്ത മാസം അഞ്ച് ദിവസം ഫ്രാൻസ് എയർപോർട്ട് സ്തംഭിച്ചേക്കും; കരാർ പുതുക്കുന്നത് സംബന്ധിച്ച തർക്കത്തിനെ തുടർന്ന് എയർപോർട്ട് ജോലിക്കാരുടെ യൂണിയനുകൾ സമരത്തിന്

അടുത്ത മാസം അഞ്ച് ദിവസം ഫ്രാൻസ് എയർപോർട്ട് സ്തംഭിച്ചേക്കും.കരാർ പുനരാലോചനയുമായി ബന്ധപ്പെട്ട് ഫ്രഞ്ച് വിമാനത്താവള തൊഴിലാളികളും മേലധികാരികളും തമ്മിലുള്ള തർക്കത്തിനെ തുടർന്ന് ജൂലൈയിൽ യൂണിയനുകൾ അഞ്ച് ദിവസത്തെ പണിമുടക്കിന് ആഹ്വാനം ചെയ്തു.

എയ്‌റോപോർട്‌സ് ഡി പാരീസിലെ (ചാൾസ് ഡി ഗല്ലെ-റോയിസി, ഓർലി വിമാനത്താവളങ്ങൾ) തൊഴിലാളികളെ പ്രതിനിധീകരിക്കുന്ന എല്ലാ ട്രേഡ് യൂണിയനുകളും ജൂലൈ 1 നും ജൂലൈ 5 നും ഇടയിൽ പണിമുടക്കിന് ആഹ്വാനം ചെയ്യുന്നു.വേനൽക്കാല അവധിയാത്രാ തിരക്കുകളും യൂറോപ്യൻ യൂണിയൻ കൊണ്ടുവരുന്ന വാക്‌സിൻ പാസ്‌പോർട്ടിന്റെ തുടക്കവും എല്ലാം ജൂലൈ 1 ന് ആയതുകൊണ്ട് തന്നെ സമരം ഒഴിവാക്കാൻ അധികാരികൾ ശ്രമിക്കുമെന്നാണ് തൊഴിലാളികൾ കരുതുന്നത്.

എയർപോർട്ടുകളിലെ ജീവനക്കാർക്കായി പുതിയ വർക്ക് കരാറുകൾ കൊണ്ടുവരുന്നതിനുള്ള എയറോപോർട്‌സ് ഡി പാരീസിന്റെ ദീർഘകാല പദ്ധതിയെച്ചൊല്ലിയാണ് തർക്കം നിലനിൽക്കുന്നത്. കരാർശമ്പളം, തൊഴിൽ നഷ്ടം, ജീവനക്കാരുടെ അവകാശങ്ങളും ബോണസും കുറയ്ക്കുമെന്നും യൂണിയനുകൾ ആരോപിക്കുന്നു.