ഫ്രഞ്ച് ഓപ്പൺ ടെന്നീസിൽ യുവതാരങ്ങളുടെ കുതിപ്പ്; സ്റ്റെഫാനോസ് സിറ്റ്സിപാസും ആന്ദ്രേ സ്വെരേവും കാസ്പർ റൂഡും മൂന്നാം റൗണ്ടിൽ; ബൗറ്റിസ്റ്റ അഗട്ട്, കരേൻ ഖച്ചനോവ് എന്നിവർ പുറത്ത്

പാരീസ്: റോളണ്ട് ഗാരോസ് സ്റ്റേഡിയത്തിലെ കളിമൺ കോർട്ടിൽ യുവതാരങ്ങളുടെ വിജയക്കുതിപ്പ്. സ്റ്റെഫാനോസ് സിറ്റ്സിപാസ് , ആന്ദ്രേ സ്വെരേവ്, കാസ്പർ റൂഡ് എന്നിവർ ഫ്രഞ്ച് ഓപ്പണിന്റെ മൂന്നാം റൗണ്ടിൽ കടന്നു. അതേസമയം 11-ാം സീഡ് ബൗറ്റിസ്റ്റ അഗട്ട്, 23-ാം സീഡ് റഷ്യയുടെ കരേൻ ഖച്ചനോവ് എന്നിവർ രണ്ടാം റൗണ്ടിൽ പുറത്തായി.

വനിതകളിൽ വിക്റ്റോറിയ അസരങ്ക, പവ്ല്യുചെങ്കോവ, മാർഡി കീസ് എന്നിവരും മൂന്നാം റൗണ്ടിലെത്തി. 11-ാം സീഡ് ബെലിൻഡ ബെൻസിന് പുറത്തായി.

ബുധനാഴ്ച നടന്ന രണ്ടാം റൗണ്ട് മത്സരത്തിൽ റഷ്യയുടെ റോമൻ സഫിയുളിനെ നേരിട്ടുള്ള സെറ്റുകൾക്ക് തകർത്താണ് സ്വെരേവ് മൂന്നാം റൗണ്ടിലെത്തിയത്. 7-6, 6-3, 7-6 എന്നി സ്‌കോറിന് നേരിട്ടുള്ള സെറ്റുകൾക്കായിരുന്നു സ്വെരേവിന്റെ ജയം. നോർവെയുടെ കാസ്പർ റൂഡ് 6-3, 6-2, 6-4ന് പോളണ്ടിന്റെ കാമിൽ മസ്രാക്കിനെ തോൽപ്പിച്ചു.

ഖച്ചനോവ് അഞ്ച് സെറ്റ് നീണ്ട പോരാട്ടത്തിനൊടുവിൽ ജപ്പാന്റെ കീ നിഷികോറിയോട് തോൽക്കുകയായിരുന്നു. സ്‌കോർ 6-4, 2-6, 6-2, 4-6, 4-6.

ഇറ്റാലിയൻ താരം ഫാബിയോ ഫോഗ്‌നിനി നേരിട്ടുള്ള സെറ്റുകൾക്ക് ഹംഗറിയുടെ മാർട്ടൺ ഫുക്സോവിച്ചിനെ തോൽപ്പിച്ചു. സ്പാനിഷ് താരം പെഡ്രോ മാർട്ടിൻസിനെ നേരിട്ടുള്ള സെറ്റുകൾക്കാണ് ഗ്രീക്ക് താരം സിറ്റ്സിപാസ് തോൽപ്പിച്ചത്. സ്‌കോർ 6-3, 6-4, 6-3. ടൂർണമെന്റിലെ അഞ്ചാം സീഡാണ് സിറ്റ്സിപാസ്. 11-ാ സീഡ് അഗട്ട് 6-3, 2-6, 6-3, 6-2ന് സ്വിറ്റ്സർലൻഡിന്റെ ഹെന്റി ലാക്സൊനെനിന് മുന്നിൽ തോൽവി സമ്മതിച്ചു.

വനിതകളിൽ പവ്ല്യൂചെങ്കോവ 6-2, 6-3ന് ഓസ്ട്രേലിയയുടെ അജ്ല ടോംജാനോവിച്ചിനെ മറികടന്നു. അസരങ്ക 7-5, 6-4ന് ടൗസണേയും കീസ് 1-6, 5-7ന് കാനഡുടെ ആനി ഫെർണാണ്ടസിനേയും മറികടന്നു.