കൊല്ലം: പ്രശസ്ത നാടക ചലച്ചിത്ര നടൻ ഓച്ചിറ ഗീഥാ സലാം(75) പാറയിൽ പടീറ്റതിൽ, ഓച്ചിറ അന്തരിച്ചു. ശ്വാസ കോശ സംബന്ധമായ അസുഖത്താൽ ചികിത്സയിലായിരുന്നു. ആലപ്പുഴ വണ്ടാനം മെഡിക്കൽ കോളേജിൽ ഇന്ന് വൈകിട്ട് നാലുണിയോടെയായിരുന്നു മരണം. 82 ഓളം സിനിമകളിലും നിരവധി സീരിയലുകളിലും നാടകങ്ങളിലും അഭിനയിച്ചിട്ടുണ്ട്.

1980ൽ ഇറങ്ങിയ 'മാണി കോയ കുറുപ്പ് ' എന്ന ചിത്രത്തിലാണ് ആദ്യം അഭിനയിക്കുന്നത്. 1987ൽ തിരുവനന്തപുരം ആരാധനയുടെ ' അഭിമാനം 'നാടകത്തിലെ ഉസ്മാൻ കുട്ടി ഉസ്താദ് എന്ന കഥാപാത്രത്തിലൂടെ മികച്ച നടനുള്ള കേരള സർക്കാർ അവാർഡും 2010 ൽ സംഗീത നാടക അക്കാദമി അവാർഡും ലഭിച്ചിട്ടുണ്ട്. ഈ പറക്കും തളിക, കനക സിംഹാസനം, ലോകനാഥൻ ഐഎസ് തുടങ്ങിയ നിരവധി സിനിമകളിൽ ശ്രദ്ധേയമായ വേഷങ്ങൾ അവതരിപ്പിച്ചിട്ടുണ്ട്. ഭാര്യ: റഹുമത്ത് ബീവി. മക്കൾ: ഷഹീർ, ഷാൻ.