ബെർലിൻ:ഗ്ലോബൽ മലയാളി ഫെഡറേഷന്റെ (ജിഎംഎഫ്) നേതൃത്വത്തിലുള്ള ഇരുപത്തിയേഴാമത് പ്രവാസി സംഗമത്തിനുള്ള ഒരുക്കങ്ങൾ പൂർത്തിയായതായി ഭാരവാഹികൾ അറിയിച്ചു.

ജർമനിയിലെ കൊളോൺ നഗരത്തിനടുത്തുള്ള ഒയ്‌സ്‌കിർഷൻ, കിർഷ്‌ഹൈം ബിൽഡൂംഗ്‌സ് സെന്ററിൽ ജൂലൈ 27 മുതൽ 31 വരെയാണു പരിപാടികൾ.

27നു(ബുധൻ) വൈകുന്നേരം ഏഴിനു ഗ്ലോബൽ മലയാളി ഫെഡറേഷൻ ചെയർമാൻ പോൾ ഗോപുരത്തിങ്കൽ സമ്മേളനം ഉദ്ഘാടനം ചെയ്യും. തുടർന്നു ആശംസാപ്രസംഗങ്ങളും കലാസായാഹ്‌നവും നടക്കും.

രണ്ടാം ദിനമായ 28നു (വ്യാഴം) നടക്കുന്ന സെമിനാറിനു ഡോ. സെബാസ്റ്റ്യൻ മുണ്ടിയാനപ്പുറത്ത്(ജർമനി) നേതൃത്വം നൽകും. വൈകുന്നേരത്തെ കലാപരിപാടികൾ ജിഎംഎഫ് വനിതാ ഭാരവാഹികൾ ഉദ്ഘാടനം ചെയ്യും.

മൂന്നാം ദിനമായ 29നു (വെള്ളി) വിവിധ സെമിനാറുകൾക്കു പ്രഫ.ഡോ. രാജപ്പൻ നായർ (യുഎസ്എ) നേതൃത്വം നൽകും. വൈകുന്നേരത്തെ കലാപരിപാടികൾ ജിഎംഎഫിന്റെ വിദേശ പ്രതിനിധികൾ ഉദ്ഘാടനം ചെയ്യും.

30 ന് (ശനി) നടക്കുന്ന സെമിനാറുകൾക്ക് അഡ്വ. ജോളപ്പൻ ജോർജ് (സ്വിറ്റ്‌സർലൻഡ്) നേതൃത്വം നൽകും. വൈകുന്നേരത്തെ കലാപരിപാടികൾ ജർമനിയിലെ സംഘടനാപ്രതിനിധികൾ ഉദ്ഘാടനം ചെയ്യും. എല്ലാ ദിവസങ്ങളിലെയും കലാസായാഹ്‌നത്തിൽ യൂറോപ്പിലെ പ്രശസ്തഗായകൻ സിറിയക് ചെറുകാട് നയിക്കുന്ന ഗാനമേള സംഗമത്തിനു കൊഴുപ്പേകും. കലാപരിപാടികളിൽ നൂറോളം കലാകാരന്മാരാണു പങ്കെടുക്കുന്നത്.

31നു (ഞായർ) പരിപാടികൾക്കു ഡോ. കമലമ്മ (നെതർലാൻഡ്‌സ്) നേതൃത്വം നൽകും.

ഇക്കൊല്ലത്തെ ജിഎംഎഫ് അവാർഡും ഗ്ലോബൽ ചെയർമാൻ പോൾ ഗോപുരത്തിങ്കൽ പ്രഖ്യാപിച്ചു. ബെസ്റ്റ് പൊളിറ്റീഷ്യൻ ഓഫ് ഇന്ത്യ അവാർഡ് മുൻ എംപി പി. രാജീവിനും സാഹിത്യമേഖലയിലെ അവാർഡ് യൂറോപ്പിലെ മുതിർന്ന മാദ്ധ്യമപ്രവർത്തകനായ ജർമനിയിലെ ബോൺ നഗരത്തിനടുത്ത് ഉങ്കലിൽ താമസിക്കുന്ന ജോസ് പുന്നാംപറമ്പിലിനും ശനിയാഴ്ച നടക്കുന്ന സമാപന സമ്മേളനത്തിൽ സമ്മാനിക്കുമെന്നു ചെയർമാൻ അറിയിച്ചു.

സണ്ണി വേലൂക്കാരൻ, അപ്പച്ചൻ ചന്ദ്രത്തിൽ, ലില്ലി ചക്യാത്ത്, ജെമ്മ ഗോപുരത്തിങ്കൽ, മറിയാമ്മ വർഗീസ്, എൽസി സണ്ണി എന്നിവരാണ് സംഗമത്തിനു നേതൃത്വം നൽകുന്നത്.