കൊച്ചി: കേന്ദ്ര ആരോഗ്യ കുടുംബക്ഷേമ മന്ത്രാലയത്തിന്റെ യൂണിവേഴ്സൽ ഇമ്മ്യൂണൈസേഷൻ പ്രോഗ്രാമിന്റെ ഭാഗമായി, പ്രമുഖ ഇന്ത്യൻ ഹോം അപ്ലയൻസസ് നിർമ്മാതാക്കളായ ഗോദ്റെജ് അപ്ലയൻസസ്, അടുത്ത ആറു മാസത്തിനുള്ളിൽ ഇന്ത്യയിലുടനീളമുള്ള സംസ്ഥാനങ്ങളിൽ 11,856 യൂണിറ്റ് അത്യാധുനിക വാക്സിൻ റഫ്രിജറേറ്ററുകളും ഡീപ് ഫ്രീസറുകളും കമ്മീഷൻ ചെയ്യാൻ ഒരുങ്ങുന്നു. ഈ അത്യാധുനിക മെഡിക്കൽ ഉപകരണങ്ങൾ രാജ്യത്തൊട്ടാകെയുള്ള വിവിധ സംസ്ഥാന ഡിപ്പോകളിലെ 22 കേന്ദ്രങ്ങളിൽ എത്തിച്ച് വിവിധ സർക്കാർ ആശുപത്രികൾ, ജില്ലാ ആശുപത്രികൾ, ആരോഗ്യ കേന്ദ്രങ്ങൾ എന്നിവയ്ക്ക് കൈമാറും. 95 കോടി രൂപയുടെ 8767 യൂണിറ്റ് ഐസ്ലൈൻഡ് മെഡിക്കൽ റഫ്രിജറേറ്ററുകൾക്കും 3089 യൂണിറ്റ് ഹൊറിസോണ്ടൽ ഡീപ് ഫ്രീസറുകൾക്കും അടുത്തിടെ ലേലനടപടിക്രമങ്ങളിലൂടെയാണ് ഗോദ്റെജ് അപ്ലയൻസസ് ടെണ്ടർ നേടിയത്.

വാക്സിൻ സംരക്ഷണത്തിനും രക്ത സംഭരണത്തിനും ആവശ്യമായ രണ്ടു മുതൽ എട്ടു ഡിഗ്രി സെൽഷ്യസ് വരെ താപനില നിലനിർത്താൻ ഷുവർ ചിൽ സാങ്കേതിക വിദ്യ അടിസ്ഥാനമാക്കിയുള്ള ഗോദ്റെജ് മെഡിക്കൽ റഫ്രിജറേറ്ററുകൾ സഹായിക്കും. വൈദ്യുതി തടസമുണ്ടായാൽ പോലും 43 ഡിഗ്രി അന്തരീക്ഷ താപനിലയിൽ 8-12 ദിവസം വരെ ഈ റഫ്രിജറേറ്റർ അതിന്റെ താപനില നിലനിർത്തും. വൈദ്യുതി വിതരണമില്ലാത്ത പ്രദേശങ്ങളിൽ, സമാനഫലം ലഭിക്കുന്നതിന് ഉപകരണങ്ങൾ സൗരോർജവുമായും ബന്ധിപ്പിക്കാം. വൈദ്യുതി മുടക്കം ഒരു പ്രധാന പ്രശ്നമല്ലാത്ത നഗര പ്രദേശങ്ങൾക്ക് യോജ്യമായെൈ ലറ്റ് സീരീസും ഇതിൽ ഉൾപ്പെടുന്നു, ഇത് മൂന്നു ദിവസത്തെ മതിയായ കാര്യശേഷിയും നൽകും.

ഉയർന്ന ശീതീകരണ കാര്യക്ഷമത ഉറപ്പാക്കുന്നതിന് കൂടുതൽ ഉപരിതല സമ്പർക്കവും വലിയ താപവിനിമയ വ്യാപ്തിയും നൽകുന്ന ഡി-ഷേയ്‌പ്പ്ഡ് കോപ്പർ റഫ്രിജറേറ്റിങ് ട്യൂബ് ഉപയോഗിച്ചാണ് ഡി-കൂൾ ടെക്നോളജിയിലുള്ള ഗോദ്റെജ് മെഡിക്കൽ ഫ്രീസറുകൾ.

കേന്ദ്ര ആരോഗ്യ കുടുംബക്ഷേമ മന്ത്രാലയത്തിന്റെ ഏറ്റവും വലിയ രോഗപ്രതിരോധ പദ്ധതികളുടെ ഭാഗമാകാൻ കഴിഞ്ഞതിൽ അഭിമാനമുണ്ടെന്ന് ഗോദ്റെജ് അപ്ലയൻസസ് ബിസിനസ് മേധാവിയും എക്സിക്യൂട്ടീവ് വൈസ് പ്രസിഡന്റുമായ കമൽ നന്തി പറഞ്ഞു. രോഗങ്ങളെ ചെറുക്കുന്നതിനും ഉന്മൂലനം ചെയ്യുന്നതിനുമുള്ള ഏറ്റവും ഫലപ്രദമായ മാർഗമാണ് രോഗപ്രതിരോധം. വൈദ്യുതി മുടക്കം ഉണ്ടെങ്കിൽ പോലും എല്ലായ്‌പ്പോഴും 4 ഡിഗ്രി സെൽഷ്യസ് വരെ കൃത്യമായ തണുപ്പിക്കൽ നൽകുന്ന വിധത്തിലാണ് തങ്ങളുടെ ഗോദ്റെജ് മെഡിക്കൽ റഫ്രിജറേറ്ററുകൾ സജ്ജീകരിച്ചിരിക്കുന്നത്. മാത്രമല്ല ഇത് അന്താരാഷ്ട്ര നിലവാരത്തിന് തുല്യവും എല്ലാ ഗോദ്റെജ് ഉപകരണങ്ങളെയും പോലെ പരിസ്ഥിതി സൗഹൃദവുമാണെന്നും കമൽ നന്തി പറഞ്ഞു.

 

ഗോദ്റെജ്