ടെക്‌സാസ്: ഗൾഫ് നാടുകളിലെ മലയാളി സമൂഹത്തെയാണ് കേരളത്തിന്റെ  പരിച്ഛേദം എന്ന് വിശേഷിപ്പിച്ചിരുന്നത്. ഇപ്പോൾ പ്രമുഖ അമേരിക്കൻ പട്ടണങ്ങളിലും കൊച്ചു കേരളങ്ങൾ ദർശിക്കാൻ സാധിക്കും.

അമേരിക്കയിലെ അതിവേഗം വികസിക്കുന്ന നഗരങ്ങളിൽ പ്രമുഖ സ്ഥാനത്താണ് ടെക്‌സാസ് തലസ്ഥാനമായ  ഓസ്റ്റിൻ . അതിവേഗം ഇവിടുത്തെ മലയാളി സമൂഹവും വികസിച്ചുകൊണ്ടിരിക്കുന്നു.ഓസ്റ്റിൻ പട്ടണത്തിലെ  ബഹുസ്വര മലയാളി സമൂഹത്തിന്റെ  കൂട്ടായ്മയാണ് ഗാമ (Greater Austin Malayalee  Association). ഏതാണ്ട് നൂറോളം അംഗ സംഖ്യയോടെ ആരംഭിച്ച സംഘടനയിൽ ഇന്ന് ആയിരത്തിലധികം അംഗങ്ങൾ ഉണ്ട്. ഓസ്റ്റിൻ മലയാളികളുടെ കലാ സംസ്‌കാരിക പ്രവർത്തനങ്ങൾക്ക് ഗാമ വേദിയൊരുക്കി കൊടുക്കുന്നു. കേരളത്തിന്റെ ഉത്സവങ്ങൾ  മലയാളത്തനിമയോടെ   ഗാമയുടെ നേതൃത്വത്തിൽ ആഘോഷിക്കപ്പെടുന്നു.

വളരുംതോറും പിളരും എന്ന മലയാളി തത്വശാസ്ത്രത്തിനു അപവാദമാണ് ഗാമ. ചിട്ടയോടെയും  സുതാര്യവുമായ പ്രവർത്തന ശൈലിയാണ് ഈ കെട്ടുറപ്പിന്റെ രഹസ്യം എന്ന് ഗാമയുടെ ഈ വർഷത്തെ പ്രസിഡണ്ട് പി.ജി. റാം പറയുന്നു. വൈസ് പ്രസിഡന്റ് സണ്ണി തോമസ്സും, സെക്രട്ടറി ഗോവിന്ദൻ നമ്പൂതിരിയും, ട്രഷറർ രാകേഷ് മേനോനും  റാമിനോടൊപ്പം ഗാമയുടെ  പ്രവർത്തനങ്ങൾക്ക് നേതൃത്വം കൊടുക്കുന്നു. കലാ മേള, പിക്‌നിക്, ഓണാഘോഷം, കായിക വിനോദ മേള  തുടങ്ങിയ പരിപാടികളോടൊപ്പം മാസത്തിൽ ഒരു മലയാള സിനിമയെങ്കിലും പ്രദർശിപ്പിക്കുക എന്ന ദൗത്യം വിജയകരമായി നടപ്പാക്കാനായി എന്നത് ഗാമയുടെ ഈ വർഷത്തെ പ്രവർത്തന മികവിന്റെ ഉദാഹരണമാണ്.

ഇക്കൊല്ലം ഗാമയുടെ രൂപീകരണത്തിന്റെ പത്താം വാർഷികമാണ്.  വിപുലമായ പരിപാടികളോടെയാണ് ഓസ്റ്റിൻ മലയാളികൾ ഗാമയുടെ പത്താം വാർഷികം ആഘോഷിച്ചത്. പത്താം വാർഷിക ആഘോഷ സമാപന സമ്മേളനം നിരവധി കലാ സാംസ്‌കാരിക പരിപാടികളോടെ ഡിസംബർ ആറാം തീയതി ആഘോഷിക്കുകയാണ്. എല്ലാവരേയും പ്രസ്തുത പരിപാടിയിലേക്ക് ഗാമ ഡയറക്ടർ ബോർഡ്  ഹാർദ്ദമായി സ്വാഗതം ചെയ്യുന്നു. സിജോ വടക്കൻ അറിയിച്ചതാണിത്.