തലസ്ഥാനത്ത് ഗുണ്ടാവിളയാട്ടത്തിന് അറുതിയില്ല;നെടുമങ്ങാട് വിദ്യാർത്ഥിയെ തട്ടിക്കൊണ്ടുപോയി മർദ്ദിച്ചു; അക്രമം ആളുമാറിയെന്ന് പൊലീസ്

തിരുവനന്തപുരം: തിരുവനന്തപുരത്ത് വീണ്ടും ഗുണ്ടാസംഘത്തിന്റെ വിളയാട്ടം. നെടുമങ്ങാട് അഴിക്കോട് വിദ്യാർത്ഥിയെ തട്ടിക്കൊണ്ടുപോയി മർദ്ദിച്ചു.ആളുമാറിയാണ് ഗുണ്ടാസംഘം വിദ്യാർത്ഥിയെ തട്ടിക്കൊണ്ടുപോയതെന്നാണ് വിവരം.അഴിക്കോട് സ്വദേശി അബ്ദുൾ മാലിക്കിനാണ് ആളുമാറിയുള്ള ക്രൂരമർദനത്തിൽ പരിക്കേറ്റത്.

വാഹനത്തിൽവെച്ച് ക്രൂരമായ മർദ്ദനത്തിന് മാലിക് ഇരയായി.ഏകദേശം അഞ്ചു കിലോമീറ്ററോളം അക്രമി സംഘം മാലിക്കിനെ വാഹനത്തിൽ കൊണ്ടുപോയി. പിന്നീട് ആളുമാറിയെന്ന് മനസിലാക്കിയ സംഘം മാലിക്കിനെ നെടുമങ്ങാട് പൊലീസ് സ്റ്റേഷന് സമീപം ഇറക്കിവിടുകയായിരുന്നു.

പിന്നീട് പൊലീസാണ് വിദ്യാർത്ഥിയെ ആശുപത്രിയിലെത്തിച്ചത്. തലയ്ക്കും നെഞ്ചിനും ഗുരുതരമായ പരിക്കേറ്റ വിദ്യാർത്ഥി നിലവിൽ തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലാണ്. സംഭവത്തിൽ പൊലീസ് ആന്വേഷണം ആരംഭിച്ചു.തട്ടിക്കൊണ്ടുപോകുന്നതിന്റെ സിസിടിവി ദൃശ്യങ്ങളും പുറത്ത് വന്നിട്ടുണ്ട്.