ഇത് ബിനീഷ് കോടിയേരി; എന്തുകൊണ്ട് ഇയാൾക്ക് ജാമ്യം അനുവദിക്കുന്നില്ല?; ഫേസ്‌ബുക്ക് കുറിപ്പുമായി ഹരീഷ് പേരടി; പാർട്ടിയുടെ ചെലവിൽ വിദ്യാഭ്യാസം പൂർത്തിയാക്കിയ വക്കീലന്മാർ പോലും പ്രതികരിക്കുന്നില്ലെന്നും ആക്ഷേപം
തിരുവനന്തപുരം: ബിനീഷ് കോടിയേരിക്ക് ജാമ്യം നിഷേധിക്കുന്നതിൽ പ്രതികരണവുമായി നടൻ ഹരീഷ് പേരടി.എന്തു കൊണ്ടാണ് ബിനീഷ് കോടിയേരിക്ക് ജാമ്യം അനുവദിക്കാത്തതെന്നും സിദ്ദിഖ് കാപ്പനു വേണ്ടി പോസ്റ്റിടുന്നവർ പോലും ബിനീഷിന്റെ മനുഷ്യാവകാശലംഘനത്തെക്കുറിച്ച് മിണ്ടുന്നില്ലെന്നും ഹരീഷ് പേരടി പറയുന്നു.ഫേസ്‌ബുക്ക് കുറിപ്പിലുടെയാണ് ബിനിഷീന്റെ പ്രതികരണം.പാർട്ടിയുടെ ചെലവിൽ വിദ്യാഭ്യാസം പൂർത്തിയാക്കിയ വക്കീലന്മാർ പോലും പ്രതികരിക്കുന്നില്ലെന്നും ഹരീഷ് വിമർശിക്കുന്നു.
ഹരിഷ് പേരടിയുടെ വാക്കുകൾ
ഇത് ബിനീഷ് കോടിയേരി...എന്താണ് ഇയാൾക്ക് ഇപ്പോഴും ജാമ്യം അനുവദിക്കാത്തത് ? അസുഖ ബാധിതനായ സ്വന്തം അച്ഛനെ കാണാൻ പോലും പറ്റാത്ത എന്ത് കുറ്റമാണ് ഇയാളുടെ പേരിലുള്ളത് ? കോടതി പോലും കരുണയുടെ ഭാഷ കാണിച്ചിട്ടും അയാൾക്കത് കിട്ടാത്തതെന്താണ് ? നിയമത്തിന്റെ കണ്ണിൽ അയാൾ കുറ്റവാളിയാണെങ്കിൽ, പൊതുസമൂഹത്തിന് ഇത് ഒരു മനുഷ്യാവകാശ ലംഘനമാണോ എന്ന് അറിയാനുള്ള അവകാശമില്ലേ ? ഒരുപാട് മനുഷ്യാവകാശ മർദ്ദനങ്ങൾക്കു നടുവിലേക്ക് നെഞ്ചും വിരിച്ച് ചെന്ന ഒരു സഖാവിന്റെ മകനായി എന്നതാണോ അയാളുടെ കുറ്റം.
പാർട്ടിയുടെ ചെലവിൽ വിദ്യാഭ്യാസം പൂർത്തിയാക്കിയ വക്കീലന്മാർ പോലും ഒന്നും മിണ്ടുന്നില്ല. ഒരുപാട് സാമ്പത്തിക ക്രിമനലുകൾ ഓണവും പെരുന്നാളും ക്രിസ്തുമസ്സും അഘോഷിച്ച് നമ്മുക്കിടയിൽ വിലസുമ്പോൾ സിദ്ദിഖ് കാപ്പന് വേണ്ടി പോസ്റ്റിടുന്നവർ പോലും ഈ മനുഷ്യന്റെ മനുഷ്യാവകാശത്തെ കാണുന്നില്ല. അയാൾ കുറ്റവാളിയാണെങ്കിൽ ശിക്ഷിക്കപ്പെടണം. പക്ഷെ മനുഷ്യാവകാശം നിഷേധിക്കാൻ പാടില്ല. ഇന്നലെ എന്നെ എതിർത്തവർ എന്നെ ഇന്ന് അനുകൂലിച്ചാലും ഇന്നലെ എന്നെ അനൂകുലിച്ചവർ ഇന്ന് എന്നെ എതിർത്താലും ചോദ്യങ്ങൾ ബാക്കിയാണ്.
