നാടോടികളുടെ വിശദാംശങ്ങൾ ഹാജരാക്കണമെന്ന് മനുഷ്യാവകാശ കമ്മീഷൻ

തിരുവനന്തപുരം: കുട്ടികളെ തട്ടിക്കൊണ്ടു പോകുന്നതായി പരാതികൾ നേരിടുന്ന ഇതര സംസ്ഥാന നാടോടികളെയും കച്ചവടക്കാരെയും തൊഴിലാളികളെയും കുറിച്ച് പൊലീസ് ഇതുവരെ നടത്തിയ അന്വേഷണങ്ങളുടെ വിശദമായ റിപ്പോർട്ട് സെപ്റ്റംബർ 30 നകം സമർപ്പിക്കണമെന്ന് സംസ്ഥാന മനുഷ്യാവകാശ കമ്മീഷൻ.

സംസ്ഥാന പൊലീസ് മേധാവിക്കാണ് കമ്മീഷൻ അധ്യക്ഷൻ ജസ്റ്റിസ് ആന്റണി ഡൊമിനിക് നിർദ്ദേശം നൽകിയത്. ഇവരുടെ കൃത്യമായ വിവരങ്ങളും ഇത്തരക്കാരെ നിരീക്ഷിക്കുന്നതിന്റെ വിശദാംശങ്ങളും റിപ്പോർട്ടിൽ ഉൾക്കൊള്ളിക്കണം.

കൊല്ലത്ത് ഇത്തികരയാറ്റിൽ മുങ്ങി മരിച്ച ദേവനന്ദയുടെ മരണത്തെ തുടർന്നാണ് നാടോടികളുടെ വിശദാംശങ്ങൾ കമ്മീഷൻ ആവശ്യപ്പെട്ടത്. എന്നാൽ ദേവനന്ദയുടെ മരണവുമായി ബന്ധപ്പെട്ട വിവരങ്ങൾ മാത്രമാണ് പൊലീസ് ഹാജരാക്കിയത്. ഈ സാഹചര്യത്തിലാണ് നടപടി. മനുഷ്യാവകാശ പ്രവർത്തകനായ പി.കെ. രാജുവാണ് നാടോടികളെ നിരീക്ഷിക്കണമെന്നാവശ്യപ്പെട്ട് കമ്മീഷനെ സമീപിച്ചത്.