ചെന്നൈ: തെന്നിന്ത്യൻ സിനിമാ ലോകത്തെ അറിയപ്പെടുന്ന നായികയാണ് ഇല്യാന. മെലിഞ്ഞ സുന്ദരിയായി അറിയപ്പെടുന്ന ഇല്യാന ബോളിവുഡിൽ നിന്നുമാണ് തെന്നിന്ത്യൻ സിനിമയിൽ ചുവടുവെച്ചതും വിജയിച്ചതും. അഭിനയിച്ച ഭാഷയിലൊക്കെ ആരാധകരെ സൃഷ്ടിക്കാൻ കഴിഞ്ഞ അവർ സ്വയം ആത്മഹത്യയെ കുറിച്ച് ചിന്തിച്ച കാര്യം വെളിപ്പെടുത്തി. ഇങ്ങനെ ചിന്തിച്ചത് സ്വന്തം ശരീരത്തെ ഓർത്തായിരുന്നു.

ബോഡി ഡിസ്മോർഫിക് ഡിസോർഡർ എന്ന രോഗാവസ്ഥയ്ക്ക് അടിമയായിരുന്നു താൻ എന്നാണ് ഇലിയാനയുടെ വെളിപ്പെടുത്തൽ. ഡെൽഹിയിൽ നടന്ന 21ാമത് ലോക മാനസിക ആരോഗ്യ സമ്മേളനത്തിൽ സംസാരിക്കവെയായിരുന്നു ഇലിയാന മനസു തുറന്നത്.താൻ വളരെ സെൽഫ് കോൺഷ്യസ് ആയിരുന്നുവെന്നും എല്ലാവരാലും അംഗീകരിക്കപ്പെടണമെന്നും ആഗ്രഹിച്ചിരുന്നതായും താരം പറയുന്നു. 'എനിക്കെപ്പോഴും വിഷമമായിരുന്നു. എനിക്ക് എന്താണ് സംഭവിക്കുന്നതെന്ന് എനിക്ക് അറിയില്ലായിരുന്നു. പിന്നീടാണ് ബോഡി ഡിസ്മോർഫിക് ഡിസോർഡർ ആണെനിക്ക് എന്നു മനസിലായത്.' താരം പറയുന്നു.

'ഒരിടയ്ക്ക് ഞാൻ സ്വയം ജീവൻ അവസാനിപ്പിച്ചാലോ എന്നുവരെ ചിന്തിച്ചിരുന്നു. എന്നാൽ സ്വയം അംഗീകരിച്ചതോടെ എല്ലാം മാറി. വിഷാദ രോഗത്തിനെതിരെയുള്ള എന്റെ ആദ്യ ചുവടുവെപ്പായിരുന്നു ആ അംഗീകരിക്കൽ.' ഇലിയാന കൂട്ടിച്ചേർക്കുന്നു. വിഷാദ രോഗം ഒരു യാഥാർത്ഥ്യമാണെന്നും അതിനാൽ എല്ലാം ശരിയാകുമെന്ന് കരുതി വെറുതെ ഇരിക്കരുതെന്നും വേണ്ട സഹായം തേടണമെന്നും താരം പറഞ്ഞു. അപൂർണ്ണത ജീവിതത്തിന്റെ ഭാഗമാണെന്ന് അഭിപ്രായപ്പെട്ട നടി അപൂർണ്ണതയിലാണ് സൗന്ദര്യമെന്നും സ്വയം അംഗീകരിക്കാനും അഭിനന്ദിക്കാനും ശീലിക്കണമെന്നും അഭിപ്രായപ്പെട്ടു.

താരങ്ങളായ തങ്ങളെ എല്ലാവരും സുന്ദരികളെന്ന് പറയുമ്പോൾ രണ്ട് മണിക്കൂറോളം ഒരുങ്ങിയിട്ടാണ് തയ്യാറാകുന്നതെന്ന് ഓർക്കണമെന്നും ഇലിയാന പറഞ്ഞു. സ്വയം ഇഷ്ടപ്പെടണമെന്നും ഉള്ളിൽ നിന്നും സന്തുഷ്ടരാണെങ്കിൽ പിന്നെ നിങ്ങളുടെ ചിരിയേക്കാൾ സുന്ദരമായ മറ്റൊന്നുമില്ലെന്നും താരം അഭിപ്രായപ്പെട്ടു.