ഷിക്കാഗോ: ഇന്ത്യ പ്രസ്‌ക്ലബ് ഓഫ് നോർത്ത് അമേരിക്കയുടെ ഏഴാമത് ദേശീയ സമ്മേളനത്തിന്റെ സമാപന സമ്മേളനത്തോടനുബന്ധിച്ചു നടന്ന ചടങ്ങിൽ വിവിധ അവാർഡുകൾ മന്ത്രി വി എസ്. സുനിൽ കുമാർ സമ്മാനിച്ചു. ഇന്ത്യാ പ്രസ്‌ക്ലബ് സമ്മേളനത്തിൽ ഫ്രാൻസീസ് തടത്തിലും ലവ്ലി വർഗീസും ആദരം ഏറ്റുവാങ്ങിയത് വികാര നിർഭരമായി. ഏറ്റവും അർഹിക്കുന്ന രണ്ടുപേരെ ആദരിച്ചതു വഴി പ്രസ്‌ക്ലബ് തന്നെ ആദരിക്കപ്പെടുകയും ചെയ്തു. ഇരുവരുടേയും മറുപടി പ്രസംഗങ്ങൾ സദസ്സിന്റെ ഹൃദയത്തിൽ പതിയുന്നതായിരുന്നു. മാധ്യമ പ്രവർത്തകനുള്ള പ്രത്യേക പുരസ്‌കാരം ജീമോൻ റാന്നി ഏറ്റുവാങ്ങി. സാമൂഹിക സേവനത്തിനുള്ള അവാർഡ് മറിയാമ്മ പിള്ള, ബി. മാധവൻ നായർ എന്നിവർക്കു സമ്മാനിച്ചു. സാഹിത്യത്തിനുള്ള പ്രത്യേക പുരസ്‌കാരം സണ്ണി മാളിയേക്കലിനു സമ്മാനിച്ചു. (എന്റെ പുസ്തകം.) ഡാലസിൽ നിന്നുള്ള പത്രപ്രവർത്തകനായ പി.പി. ചെറിയാനെയും ആദരിച്ചു.

ഇന്ത്യാ പ്രസ് ക്ലബ് ഓഫ് നോർത്ത് അമേരിക്കയുടെ ടെക്നിക്കൽ എക്സെലൻസ് അവാർഡ് കൈരളി ടിവിയിലെ ബിനു തോമസും ഏഷ്യാനെറ്റ് യുഎസ്എയുടെ ഷിജോ പൗലോസും മന്ത്രി വി എസ്. സുനിൽകുമാറിൽ നിന്നു ഏറ്റു വാങ്ങി. ബിനു തോമസ് 2008 മുതൽ കൈരളി ടിവി യുഎസ്എയുടെ പ്രൊഡക്ഷൻ എക്സിക്യൂട്ടീവും ട്രൈ സ്റ്റേറ്റ് ബ്യൂറോ ചീഫും ആണ്. അമേരിക്കയിലെ നിർണായക വാർത്തകൾ ലോകമെമ്പാടുമുള്ള പ്രേക്ഷകർക്കായി മികവാർന്ന ദൃശ്യങ്ങളിലൂടെ അവതരിപ്പിക്കുന്ന ബിനു അമേരിക്കൻ ഫോക്കസ് എന്ന പരിപാടിയുടെ പ്രൊഡക്ഷൻ എക്സിക്യൂട്ടീവാണ്.

മികച്ച ക്യാമറ ടെക്നീഷ്യനും വീഡിയോ എഡിറ്ററുമായ ബിനു തോമസ് ഫോട്ടോഗ്രാഫിയിലും തന്റെ സാന്നിദ്ധ്യവും കഴിവും തെളിയിച്ചു. ന്യൂയോർക്ക് ആസ്ഥാനമായ ഫൈവ് സ്റ്റാർ ഇലക്ട്രിക് എന്ന എൻജിനീയറിങ് ആന്റ കൺസ്ട്രക്ഷൻ സ്ഥാപനത്തിൽ കമ്പ്യൂട്ടറൈസ്ഡ് ഡിസൈനറായി ജോലി ചെയ്യുന്നു. ഭാര്യ രാജി, മക്കളായ ജൂലിയ, ജയ്ഡൻ എന്നിവർക്കൊപ്പം ന്യൂയോർക്കിലെ ലോങ്ങ് ഐലൻഡിൽ താമസിക്കുന്നു.

അമേരിക്കയിൽ നിന്നുള്ള പ്രധാനപെട്ട സംഭവങ്ങൾ ഇന്ന് ലോകമെമ്പാടുമുള്ള മലയാളികൾ കാണുന്നത് ഷിജോ പൗലോസ് പകർത്തിയ ദൃശ്യങ്ങളിലൂടെയാണ് ഏഷ്യാനെറ്റ് ന്യൂസിന്റെ അമേരിക്കയിലെ സീനിയർ ക്യാമറാമാനും പ്രൊഡക്ഷൻ കോർഡിനേറ്ററുമായ ഷിജോ, ഡോക്ടർ കൃഷ്ണ കിഷോറുമൊത്തു വാർത്തകൾ ഉടനുടൻ പ്രേക്ഷകരിലെത്തിക്കുന്നു.

്അമേരിക്കൻ തിരഞ്ഞെടുപ്പിന്റെ സമഗ്ര കവറേജ്, തത്സസമയ റിപ്പോട്ടുകൾ, ട്രംപിന്റെ സ്ഥാനാരോഹണത്തിന്റെ വാഷിങ്ങ്ടണിൽ നിന്നുള്ള തത്സമയ സംപ്രേഷണം, പ്രധാനമന്ത്രി മോദിയുടെ അമേരിക്കൻ സന്ദർശനം തുടങ്ങിയ വാർത്തകൾക്കു കാമറ ചലിപ്പിച്ചത് ഷിജോ പൗലോസ് ആണ്. ഏഷ്യാനെറ്റ് ന്യൂസ് അമേരിക്കയിൽ നിന്ന് ആരംഭിച്ച അമേരിക്ക ഈ ആഴ്ച എന്ന പ്രതിവാര പരിപാടിയുടെ പ്രൊഡക്ഷൻ ചുമതലയും വഹിക്കുന്നു. ഒപ്പം യുഎസ് വീക്കിലി റൗണ്ട്അപ്പിന്റെ നിർമ്മാണ നിർവഹണവും വഹിക്കുന്നു. മികച്ച ക്യാമറാമാനും, പ്രൊഡക്ഷൻ വിദഗ്ധനുമായ ഷിജോ പൗലോസ് പത്തു വർഷമായി ഈ രംഗത്തു പ്രവർത്തിക്കുന്ന പ്രതിഭയാണ്. ഭാര്യ ബിൻസി, മക്കളായ മരിയ, മരിസ്സ എന്നിവർക്കൊപ്പം ന്യൂ ജേഴ്സിയിൽ താമസിക്കുന്നു

പ്രസ് ക്ലബിന്റെ ഉപഹാരം നാട്ടിൽ നിന്ന് എത്തിയ അതിഥികൾക്കും സ്‌പൊൺസർമാർക്കും പ്രസ് ക്ലബ് ഭാരവാഹികൾ സമ്മാനിച്ചു.