ഐ.എസ്.എൽ. ഫൈനലിനിടെ താരങ്ങൾ കൂട്ടിയിടിച്ചു; മുംബൈ പ്രതിരോധതാരം അമെയ്‌ റണവഡെയ്ക്ക് ഗുരുതര പരിക്ക്

മഡ്ഗാവ്: ഇന്ത്യൻ സൂപ്പർ ലീഗ് ഫുട്ബോൾ ഫൈനൽ മത്സരത്തിനിടെ മുംബൈ സിറ്റി എഫ്.സി. പ്രതിരോധതാരം അമെയ്‌ റണവഡെയ്ക്ക് ഗുരുതര പരിക്കേറ്റു. മോഹൻ ബഗാനുമായുള്ള കലാശപോരാട്ടത്തിന്റെ ആദ്യ പകുതിയിലാണ് താരത്തിന് പരിക്കേറ്റത്.

മോഹൻ ബഗാൻ താരം ശുഭാശിഷ് ബോസുമായി കൂട്ടിയിടിച്ച് ഗ്രൗണ്ടിൽ തെറിച്ചുവീണ റണവഡെയ്ക്ക് പെട്ടന്ന് ശ്വാസതടസ്സം നേരിട്ടു.

ഉടൻതന്നെ മെഡിക്കൽ സംഘം താരത്തിനടുത്തേക്ക് പാഞ്ഞെത്തി പ്രഥമ ശുശ്രൂഷകൾ നൽകി. റണവഡെയുടെ പരിക്ക് വലിയ ഞെട്ടലാണ് താരങ്ങൾക്കും മറ്റുള്ളവർക്കും നൽകിയത്.

ശ്വാസം കിട്ടാതെ ഗ്രൗണ്ടിൽ പിടഞ്ഞ റണവഡെയുടെ കാഴ്ചകണ്ട് ഏവരും കണ്ണീരണിഞ്ഞു. അധികസമയം പാഴാക്കാതെ പ്രാഥമിക ശുശ്രൂഷകൾ നൽകി താരത്തെ ഡോക്ടർമാർ വിദഗ്ധ ചികിത്സയ്ക്ക് വേണ്ടി ആശുപത്രിയിലേക്ക് കൊണ്ടുപോയി.