നോർത്ത് ഈസ്റ്റിനെതിരെ ഇഞ്ചുറി ടൈമിൽ വിജയ ഗോൾ; നാടകീയ ജയത്തോടെ മൂന്നാം സ്ഥാനത്തേക്ക് ജംഷേദ്പുർ; ജയം, രണ്ടിനെതിരേ മൂന്നു ഗോളുകൾക്ക്

ബാംബോലിം: ഐഎസ്എല്ലിൽ വ്യാഴാഴ്ച നടന്ന മത്സരത്തിൽ നോർത്ത് ഈസ്റ്റ് യുണൈറ്റഡിനെ ഇഞ്ചുറി ടൈമിൽ നേടിയ ഗോളിൽ കീഴടക്കി ജംഷേദ്പുർ എഫ്സി. രണ്ടിനെതിരേ മൂന്നു ഗോളുകൾക്കായിരുന്നു ജംഷേദ്പുരിന്റെ ജയം. ഇൻജുറി ടൈമിന്റെ മൂന്നാം മിനിറ്റിൽ ഇഷാൻ പണ്ഡിത നേടിയ ഗോളിലാണ് ജംഷേദ്പുർ നാടകീയ ജയം നേടിയത്. ജയത്തോടെ പോയന്റ് പട്ടികയിൽ മൂന്നാം സ്ഥാനത്തേക്ക് കയറാനും അവർക്കായി.

ഇഞ്ചുറി ടൈം തീരാൻ ഒരു മിനിറ്റ് ബാക്കിയിരിക്കെയായിരുന്നു ഇഷാൻ പണ്ഡിതയുടെ വക വിജയഗോൾ. നോർത്ത് ഈസ്റ്റിനായി ഡെഷാം ബ്രൗൺ രണ്ട് ഗോൾ നേടിയപ്പോൾ ജോർദാൻ മറിയും ബോറിസ് സിംഗും ഇഷാൻ പണ്ഡിതയുമാണ് ജംഷഡ്പൂരിനായി സ്‌കോർ ചെയ്തത്.

നാലാം മിനിറ്റിൽ തന്നെ ഡെഷോം ബ്രൗണിലൂടെ നോർത്ത് ഈസ്റ്റാണ് ആദ്യം ലീഡെടുത്തത്. മലയാളി താരം വി പി സുഹൈറിന്റെ അളന്നു മുറിച്ച പാസിൽ നിന്നായിരുന്നു ഡെഷോം ബ്രൗൺ നോർത്ത് ഈസ്റ്റിനെ മുന്നിലെത്തിച്ചത്. പിന്നീട് സമനില ഗോളിനായി ജംഷഡ്പൂരിന് നിരവധി അവസരങ്ങൾ ലഭിച്ചെങ്കിലും അതൊന്നും ഗോളായില്ല.

23-ാം മിനിറ്റിൽ ഗ്രെഗ് സ്റ്റുവർട്ടിനെ ബോക്‌സിൽ ഫൗൾ ചെയ്തതിന് പെനൽറ്റിക്കായി ജംഷഡ്പൂർ വാദിച്ചെങ്കിലും റഫറി അനുവദിച്ചില്ല. 43-ാം ഗ്രെഗ് സ്റ്റുവർട്ടിന്റെ തകർപ്പൻ ഷോട്ട് അവിശ്വസനീയമായി രക്ഷപ്പെടുത്തിയ നോർത്ത് ഈസ്റ്റ് ഗോൾ കീപ്പർ മിർഷാദ് മിച്ചു ടീമിന്റെ രക്ഷകനായെങ്കിലും ആശ്വാസം അധികം നീണ്ടില്ല. തൊട്ടടുത്ത നിമിഷം ഗ്രെഗ് സ്റ്റുവർട്ട് എടുത്ത ഫ്രീ കിക്കിൽ നിന്ന് ജോർദാൻ മറി ജംഷഡ്പൂരിനെ ഒപ്പമെത്തിച്ചു.

ഒരു ഗോൾ ജയവുമായി ജംഷഡ്പൂർ കളംവിടുമെന്ന് കരുതിയിരിക്കെയാണ് ഡെഷോം ബ്രൗൺ ഇഞ്ചുറി ടൈമിന്റെ ആദ്യ മിനിറ്റിൽ നോർത്ത് ഈസ്റ്റിന് സമനില സമ്മാനിച്ചത്. സമനില ഗോളിന്റെ ആശ്വാസം തീരും മുമ്പ് പക്ഷെ പകരക്കാരനായി എത്തിയ ഇഷാൻ പണ്ഡിതയിലൂടെ വിജയ ഗോൾ കണ്ടെത്തിയ ജംഷഡ്പൂർ നായകീയ ജയം സ്വന്തമാക്കി.