ലണ്ടൻ: ലണ്ടനിലെ വാൽത്തം ക്രോസിൽ താമസിച്ചിരുന്ന മലയാളിയെന്ന് സംശയിക്കുന്ന 15 കാരനായ വിദ്യാർത്ഥി കത്തിക്കുത്തിൽ കൊല്ലപ്പെട്ടു. വാൽത്താം ക്രോസിലെ വീട്ടിൽ നിന്നും തെരുവിൽ കഴിയുന്നവർക്ക് വിതരണം ചെയ്യാൻ ഭക്ഷണവുമായി പോയ ജേക്കബ് എബ്രഹാം വീട്ടിലേക്ക് മടങ്ങുമ്പോൾ ആണ് വംശീയ വാദികളായ ഒരു സംഘം കുട്ടികളുടെ ആക്രണത്തിന് ഇരയായത്. കുത്തേറ്റ് വീട്ടിലേക്ക് ഓടിയ ജേക്കബ് വീടിന് 200 മീറ്റർ അടുത്ത് സർവ്വീസ് റോഡിൽ വീണു ചോര വാർന്നു മരിക്കുക ആയിരുന്നു.

സംഭവത്തിൽ പ്രതികളെന്ന് സംശയിക്കുന്ന 14 വയസുള്ള മൂന്ന് ആൺകുട്ടികളെയും രണ്ട് 15 വയസുകാരെയുമാണ് അറസ്റ്റ് ചെയ്തിരിക്കുന്നത്. ഇവരെല്ലാം എൻഫീൽഡുകാരാണെന്നാണ് റിപ്പോർട്ട്. ഇവരെ പൊലീസ് കസ്റ്റഡിയിൽ ചോദ്യം ചെയ്ത് വരുകയാണ്. തന്റെ 16ാം പിറന്നാൾ ആഘോഷിക്കാൻ വെറും പത്ത് ദിവസം മാത്രം ബാക്കി നിൽക്കവേയാണ് ജേക്കബ് കൊല്ലപ്പെട്ടിരിക്കുന്നത്. നിരവധി ഫോൺ കാളുകൾ ലഭിച്ചതിനെ തുടർന്നായിരുന്നു ജേക്കബ് ഡിസംബർ ഏഴിന് രാത്രി എട്ടരക്കും ഒമ്പതരക്കും ഇടയിൽ വാൽത്താം ക്രോസിലെ തന്റെ വീട്ടിൽ നിന്നും പുറത്തേക്ക് പോയിരുന്നത്.

അന്നേ ദിവസം രാത്രിയാണ് ശരീരത്തിൽ നിരവധി മുറിവുകളുമായി ജേക്കബ് വീണ് കിടക്കുന്നത് 19കാരനായ സഹോദരൻ ഐസക് കണ്ടെത്തിയത്. ടൗണിലെ ഹൈസ്ട്രീറ്റിൽ നിന്നും ജേക്കബ് ബ്രെഡ് വാങ്ങിക്കുന്ന സിസിടിവി ദൃശ്യങ്ങൾ ഓഫീസർമാർ പുറത്ത് വിട്ടിരുന്നു. തുടർന്ന് വീട്ടിൽ പോയി സാൻഡ് വിച്ചുണ്ടാക്കാൻ അമ്മയെ സഹായിക്കുകയും അതുമായി എഡ്മണ്ടനിലെ ചർച്ചിലേക്ക് പോയി ഭവനരഹിതർക്ക് ഭക്ഷണം കൈമാറുകയും ചെയ്തിരുന്നു. അതിന് ശേഷം തിരിച്ച് വരുന്നതിനിടയിലാണ് ഈ ടീനേജർ കുത്തേറ്റ് മരിച്ചിരിക്കുന്നത്.

പാരാമെഡ്ക്സ് ജേക്കബിന്റെ ജീവൻ രക്ഷിക്കാൻ കിണഞ്ഞ് പരിശ്രമിച്ചെങ്കിലും സാധിച്ചില്ല. തുടർന്ന് രാത്രി 10.15 ഓടെ മരണം സ്ഥിരീകരിക്കുകയുമായിരുന്നു. അമ്മയ്ക്കും ഇളയ സഹോദരിക്കും ഐസക്ക് അടക്കമുള്ള രണ്ട് സഹോദരന്മാർക്കുമൊപ്പമായിരുന്നു ജേക്കബ് ഈ വീട്ടിൽ കഴിഞ്ഞിരുന്നത്. പാവപ്പെട്ടവർക്കുള്ള ഭക്ഷണം വിതരണം ചെയ്ത് വരുന്നതിനിടെ 16കാരൻ കുത്തേറ്റ് മരിക്കുകയായിരുന്നുവെന്നാണ് ബെഡ്ഫോർഡ്ഷെയർ , കേബ്രിഡ്ജ്ഷെയർ, ഹെർട്ട്ഫോർഡ്ഷെയർ ഡിറ്റെക്ടീവ് ചീഫ് ഇൻസ്പെക്ടറായ ജെറോം കെന്റ് സ്ഥിരീകരിച്ചിരിക്കുന്നത്.

ഇത്രയും കുറഞ്ഞ പ്രായമുള്ള ആൾ കുത്തേറ്റ് മരിച്ച സംഭവം വേദനാജനകമാണെന്നും ഇതിന് പുറകിലുള്ളവരെ എത്രയും വേഗം നിയമത്തിന് മുന്നിൽ കൊണ്ട് വരുന്നതിന് പൊലീസ് ത്വരിതഗതിയിലുള്ള അന്വേഷണമാണ് നടത്തി വരുന്നതെന്നും ജെറോം കെന്റ് വെളിപ്പെടുത്തുന്നു. കേസ്തെളിയിക്കുന്നതിനായി സാക്ഷിമൊഴികൾ,സിസിടിവി ഫൂട്ടേജുകൾ തുടങ്ങിയവയെല്ലാം വിശദമായി പരിശോധിച്ച് വരുന്നുണ്ടെന്നും അദ്ദേഹം പറുന്നു. സംഭവത്തെക്കുറിച്ച് കൂടുതൽ വിവരങ്ങൾ അറിയുന്നവർ ഇത് പൊലീസിനോട് വെളിപ്പെടുത്താൻ തയ്യാറായി മുന്നോട്ട് വരണമെന്നും അദ്ദേഹം നിർദേശിക്കുന്നു.

ഡിസംബർ ഏഴിന് രാത്രി എട്ടരക്കും ഒമ്പതരക്കും ഇടയിൽ ഈ പ്രദേശത്ത് ഏതെങ്കിലും കൗമാരക്കാരെ കണ്ടിട്ടുള്ളവർ ഇതിനെക്കുറിച്ച് കൂടുതൽ വെളിപ്പെടുത്താൻ തയ്യാറായി മുന്നോട്ട് വരണമെന്നും അദ്ദേഹം ആവശ്യപ്പെടുന്നു. കൗമാരക്കാരുടെ സംഘം ആ ദിവസം ഇവിടെ ചുറ്റിത്തിരിയുന്നത് കണ്ട ഇവിടുത്തെ താമസക്കാരാരെങ്കിലും ഉണ്ടെങ്കിൽ അവരും വിശദവിവരങ്ങൾ പൊലീസിനോട് വെളിപ്പെടുത്തണമെന്ന് നിർദേശമുണ്ട്. സംഭവത്തിന്റെ നാനാവശങ്ങളും പരിഗണിച്ച് കൊണ്ട് പൊലീസ് ത്വരിതഗതിയിലുള്ള അന്വേഷണം നടത്തുന്നതിനാൽ വരും ദിവസങ്ങളിൽ കൊലപാതകത്തിന്റെ കൂടുതൽ വിശദാംശങ്ങൾ വെളിപ്പെടുമെന്ന പ്രതീക്ഷ ശക്തമായിട്ടുണ്ട്.