സഭാ തർക്കത്തിൽ കേന്ദ്ര സർക്കാർ ചർച്ചയ്ക്ക് വിളിച്ചത് അനുഗ്രഹമായി കരുതുന്നു; പ്രശ്നങ്ങൾ പരിഹരിച്ചാൽ യാക്കോബായ സഭ ബിജെപിക്കൊപ്പം നിൽക്കും; സമവായത്തിലൂടെ പരിഹരിക്കാമെന്ന സംസ്ഥാന സർക്കാർ നിലപാടിലും പ്രതീക്ഷ; ആരു സഹായിച്ചാലും തിരിച്ച് സഹായിക്കുമെന്ന് നിലപാട് വ്യക്തമാക്കി സഭ സമരസമിതി കൺവീനർ
കോട്ടയം: മലങ്കരസഭയിലെ ഇരുവിഭാഗങ്ങൾ തമ്മിലുള്ള പ്രശ്നങ്ങൾ മധ്യസ്ഥ ചർച്ചയിലൂടെ പരിഹരിക്കാൻ കേന്ദ്ര സർക്കാരിന് സാധിച്ചാൽ ബിജെപിക്കൊപ്പം നിൽക്കുമെന്ന് യാക്കോബായ സഭ. പള്ളി തർക്കത്തിൽ പ്രധാനമന്ത്രി നരേന്ദ്ര മോദിയുടെ മധ്യസ്ഥതയിൽ ചർച്ചകൾ തുടരുന്നതിനിടെയാണ് യാക്കാബോയ സഭ സമര സമിതി നേതൃത്വം നിലപാട് വ്യക്തമാക്കിയത്.
കേന്ദ്ര സർക്കാർ ചർച്ചയ്ക്ക് വിളിച്ചത് വലിയ അനുഗ്രഹമായാണ് കരുതുന്നത്. എന്നാൽ ആദ്യഘട്ട ചർച്ച നടത്തിയ ശേഷം പ്രധാനമന്ത്രിയുടെ ഭാഗത്തുനിന്നും പ്രതികരണമൊന്നും ഇതുവരെ അറിയിച്ചിട്ടില്ലെന്നും യാക്കോബായ സഭ സമരസമിതി കൺവീനർ അലക്സാണ്ട്രിയോസ് മെത്രാപ്പൊലീത്ത മാതൃഭൂമി ന്യൂസിനോട് പ്രതികരിച്ചു.
ഓർത്തഡോക്സ് സഭയ്ക്ക് അനുകൂലമായിട്ടാണ് കഴിഞ്ഞ കാലങ്ങളിൽ കേന്ദ്ര സർക്കാർ നിലപാടെടുത്തിട്ടുള്ളത്. എന്നാൽ ആ നിലപാടിൽ നിന്ന് ഇപ്പോൾ വ്യത്യാസം വന്നിരിക്കുന്നു എന്ന തോന്നൽ വിശ്വാസികൾക്കിടയിൽ വന്നിട്ടുണ്ട്.
ഈ പ്രശ്നം സമവായത്തിലൂടെ പരിഹരിക്കുമെന്ന് സംസ്ഥാന സർക്കാർ അറിയിച്ചിട്ടുണ്ട്. ഒരു പ്രതീക്ഷ സംസ്ഥാന സർക്കാർ നൽകുന്നുണ്ട്. കാര്യശേഷിയുള്ള ഒരു മുഖ്യമന്ത്രി അങ്ങനെ പറയുമ്പോൾ തങ്ങൾ പ്രതീക്ഷ അർപ്പിക്കുകയാണെന്നും അദ്ദേഹം പറഞ്ഞു.
സഭയെ ആര് സഹായിക്കുന്നോ അവരെ തിരിച്ച് സഹായിക്കും എന്നതാണ് തങ്ങളുടെ രാഷ്ട്രീയമെന്നും തദ്ദേശ തിരഞ്ഞെടുപ്പിൽ അത് തെളിയിച്ചതാണെന്നും അലക്സാണ്ട്രിയോസ് മെത്രാപ്പൊലീത്ത വ്യക്തമാക്കി. സഭാ തർക്കത്തിലെ ബിജെപിയുടെ ഇടപെടലിൽ രാഷ്ട്രീയലക്ഷ്യമുണ്ടോ എന്ന ചോദ്യത്തിനാണ് അദ്ദേഹം ഇങ്ങനെ പ്രതികരിച്ചത്.
'സംസ്ഥാന സർക്കാർ തങ്ങൾക്കനുകൂലമായി സെമിത്തേരി ഓർഡിനൻസ് കൊണ്ടുവന്നത് വലിയ ആർജ്ജവമാണ് കാണിച്ചത്. ഞങ്ങളെ സഹായിക്കുന്നത് ആരാണോ അവരെ തീർച്ചയായും തിരിച്ച് സഹായിച്ചിരിക്കും. കേന്ദ്രമാണ് ഇടപെടൽ നടത്തി പ്രശ്നങ്ങൾ പരിഹരിക്കുന്നതെങ്കിൽ കൊടിയുടെ നിറം നോക്കാതെ അവരെ സഹായിച്ചിരിക്കുമെന്നും മെത്രാപ്പൊലീത്ത പറഞ്ഞു.
