മറ്റുള്ള താരങ്ങളുടെ സിനിമകൾ വിജയിക്കുമ്പോൾ അസൂയ തോന്നിയിട്ടുണ്ടെന്ന് നടൻ ജയസൂര്യ. നാലഞ്ചു കൊല്ലം മുമ്പ് വരെ അങ്ങിനെ തോന്നിയിട്ടുണ്ടെങ്കിലും ഇന്ന് ആരുടെ സിനിമ വിജയിച്ചാലും തനിക്ക് സന്തോഷമാണെന്നും അവരെ ആത്മാർഥമായി വിളിച്ച് അഭിനന്ദിക്കാറുണ്ടെന്നും അദ്ദേഹം പറഞ്ഞു.

'എനിക്കാരോടും ദേഷ്യമില്ല, കുന്നായ്മയോ കുശുമ്പോ ഇല്ല. പണ്ട് ഉണ്ടായിരുന്നു. വളരെ ഓപ്പണായി പറഞ്ഞാൽ ഒരു നാലഞ്ചു വർഷം മുമ്പ് വരെ മറ്റു അഭിനേതാക്കളുടെ സിനിമകളൊക്കെ വിജയിക്കുമ്പോൾ ദൈവമേ അതൊക്കെ നന്നായി ഓടുന്നുണ്ടല്ലോ എന്റേത് ഓടിയില്ലല്ലോ എന്നൊരു ചിന്തയൊക്കെ ഉണ്ടായിട്ടുണ്ട്. ഇപ്പോൾ അങ്ങനെയൊന്നുമില്ല. എന്റെ പടം ഓടിയില്ലെങ്കിലും മറ്റൊരാളുടെ പടം ഓടിയാൽ അവരെ വിളിച്ച് ആത്മാർഥമായി അഭിനന്ദിക്കാനുള്ള മനസ്സ് ഇപ്പോഴെനിക്കുണ്ട്.' ജയസൂര്യ പറഞ്ഞു.

പാഷൻ ഓഫ് ക്രൈസ്റ്റ് പോലുള്ള സിനിമ ചെയ്യണമെന്ന് വലിയ ആഗ്രഹമാണ്. യേശു ക്രിസ്തുവായി അഭിനയിക്കാൻ വലിയ മോഹമുണ്ട്. എന്റെ ഏറ്രവും വലിയ ആഗ്രഹമാണ് യേശുക്രിസ്തുവായി വേഷമിടുക എന്നതെന്നും ജയസൂര്യ പറഞ്ഞു.