കുവൈത്ത് സിറ്റി: കുവൈത്തിലെ പ്രമുഖ ചിത്രകാരൻ ജോൺ ആർട്‌സ് കലാഭവൻ ലിംക ബുക്ക് ഓഫ് റെക്കോർഡ്‌സിൽ ഇടം പിടിച്ചു.ലോകത്തിലെ വിവിധ മേഖലകളിൽ പ്രവർത്തിക്കുന്ന 576 പ്രമുഖ വ്യക്തികളുടെ കാരിക്കേച്ചറുകൾ വാട്ടർ മീഡിയയിൽ (100x70) വരച്ച് അവർക്ക് വിവിധ വേദികളിൽ സമ്മാനിച്ചത് പരിഗണിച്ചാണ് തൈകൾ കളത്തിൽ ജോൺ എന്ന ജോർണാർട്സ് ലിംക ബുക്ക് ഓഫ് റെക്കോർഡ്സിൽ ഇടം നേടിയത് . നേരത്തേ ഇന്ത്യ ബുക് ഓഫ് റെക്കോഡിലും, ഏഷ്യ ബുക് ഓഫ് റെക്കോഡിലും അസിസ്റ്റഡ് വേൾഡ് റെക്കോഡിലും, യൂണിക്ക് വേൾഡ് റെക്കോഡിലും,അദ്ദേഹം ഇടംനേടിയിരുന്നു.

ലോകത്തിലെ കാരിക്കേച്ചർ ആർട്ടിസ്റ്റുമാരുടെ സംഘടനയായ ഇന്റർനാഷണൽ സൊസൈറ്റി ഓഫ് കാരിക്കേച്ചർ ആർട്ടിസ്റ്റിൽ (ISCA) ഗോൾഡ് മെമ്പർഷിപ്പ് നേടിയിട്ടുള്ള ജോൺ ആർട്‌സ് അമേരിക്കയിലെ വേൾഡ് റെക്കോഡ് യൂണിവേഴ്‌സിറ്റിയുടെ ഹോണററി ഡോക്ടറേറ്റ് നേടിയ ആദ്യത്തെ ഏഷ്യാകാരനാണ്. കൊച്ചിൻ കലാഭവനിലൂടെയാണ് അദ്ദേഹം കലാജീവിതം ആരംഭിച്ചത്. സത്യദീപം മാസികയിൽ ഇല്ലസ്‌ട്രേഷൻ ആർട്ടിസ്റ്റായും കൊച്ചിൻ ഷിപ്പ് യാ ർഡിൽ ഡ്രോയിങ് അദ്ധ്യാപകനായും സേവനമനുഷ്ഠിച്ചിട്ടുണ്ട്.

കുവൈത്തുകൊട്ടാര ചിത്രകാരനായും വിദ്യാഭ്യാസ മന്ത്രാലയത്തിൽ ചിത്രകലാ അദ്ധ്യാപകനായും ജോലി ചെയ്തിട്ടുണ്ട്. കഴിഞ്ഞ 24 വർഷമായി കുവൈത്തിലെ അബ്ബാസിയായിൽ ചിത്രകലാ പരിശീലന കേന്ദ്രം നടത്തുന്ന ജോൺ ആർട്‌സിന്റെ കീഴിൽ 10,000 പേരോളം വരയുടെ ആദ്യപാഠങ്ങൾ അഭ്യസിച്ചു കഴിഞ്ഞു. ഫർവാനിയ ആശുപത്രിയിലെ സ്റ്റാഫ് നഴ്‌സ് മോളി ജോൺ ആണ് ഭാര്യ. നാട്ടിൽ ബിരുദ വിദ്യാർത്ഥിയായ ജോമോൻ, അബ്ബാസിയ,യുണൈറ്റഡ്, ഇന്ത്യൻ, സ്‌കൂൾ 12 തരം വിദ്യാർത്ഥിയായ ജോമിൻ എന്നിവർ മക്കളാണ്.