ഡബ്ലിൻ: നിനച്ചിരിക്കാതെ മരണം തട്ടിയെടുത്ത ഐറീഷ് മലയാളി ജോളി കെ മാണിക്ക് നാടിന്റെ യാത്രാമൊഴി. വെള്ളിയാഴ്ച തൊടുപുഴയ്ക്കടുത്തുണ്ടായ അപകടത്തിൽ മരിച്ച ജോളിക്ക് കല്ലാർകുട്ടി സെന്റ് ജോസഫ്‌സ് പള്ളിയിൽ അന്ത്യനിദ്രയൊരുങ്ങി. ജോളിക്ക് ആദരാഞ്ജലികൾ അർപ്പിക്കാൻ അയർലണ്ടിൽ നിന്നും ഏതാനും സുഹൃത്തുക്കളും നാട്ടിൽ എത്തിയിരുന്നു.

ജീവിതയാത്ര പൂർത്തിയാക്കാതെ പാതിവഴിയിൽ മരണം തട്ടിയെടുത്ത സുഹൃത്തിന്റെ വിയോഗത്തിൽ വിറങ്ങലിച്ചിരിക്കുകയാണ് ഐറീഷ് മലയാളികൾ. ജോളിയുടെ സംസ്‌ക്കാരചടങ്ങിൽ പങ്കെടുക്കാനെത്തിയ തൊടുപുഴ ഫാമിലീസ് ഇൻ അയർലണ്ടിലെ പ്രവർത്തകരും ഒഐസിസി അയർലണ്ടും പുഷ്പചക്രം അർപ്പിച്ചു.

ഒരു പതിറ്റാണ്ടോളം അയർലണ്ടിലെ മലയാളി സമൂഹത്തിൽ സജീവസാന്നിധ്യമായിരുന്ന ജോളിയുടെ വേർപാടിൽ ദുഃഖിതരായ സുഹൃത്തുക്കൾ നാട്ടിൽ സംസ്‌കാര കർമങ്ങൾ നടക്കുന്ന സമയത്ത് തുള്ളാമോറിലെ ജോളിയുടെ വസതിയിൽ പ്രത്യേക പ്രാർത്ഥനകൾ നടത്തിയിരുന്നു. നാട്ടിലെ സംസ്‌കാര ശുശ്രൂഷകൾക്ക് ഇടുക്കി രൂപതാ ബിഷപ് മാർ മാത്യു ആനിക്കുഴിക്കാട്ടിൽ നേതൃത്വം നൽകി.

ജോളിയുടെ അനുസ്മരണയ്ക്കായി ഇന്ന് രാവിലെ തുള്ളാമോർ പള്ളിയിൽ ശുശ്രൂകൾ ആരംഭിക്കും. ഉച്ചയ്ക്ക് 12ന് ദിവ്യബലി. ഇടവക വികാരി ഫാ. ഷെയിൻ ക്രംബി ശുശ്രൂഷകൾക്ക് മുഖ്യകാർമികത്വം വഹിക്കും. വെള്ളിയാഴ്ച വരെ ജോളിയുടെ വസതിയിൽ വൈകുന്നേരം ഏഴിന് മലയാളി സമൂഹം അനുസ്മരണ പ്രാർത്ഥന നടത്തും. ജോളിയോടുള്ള ആദരസൂചകമായി 25ന് തുള്ളാമോറിൽ നടത്താനിരുന്ന ഓണാഘോഷം റദ്ദാക്കിയതായി തുള്ളാമോർ മലയാളി കമ്യൂണിറ്റി അറിയിച്ചിട്ടുണ്ട്.

പിതാവിന്റെ ഇരുപത്തഞ്ചാം ചരമവാർഷിക ചടങ്ങിൽ പങ്കെടുക്കാനാണ് ജോളി കഴിഞ്ഞ 23ന് നാട്ടിലെത്തുന്നത്. ഇതിനിടെ പാലായിലുള്ള സഹോദരിയെ സന്ദർശിച്ച ശേഷം മൂലമറ്റത്തുള്ള ഭാര്യവീട്ടിലേക്ക് യാത്ര ചെയ്യുമ്പോഴാണ് ജോളിയെ മരണം അപകടരൂപത്തിൽ തട്ടിയെടുക്കുന്നത്. ജോളി സഞ്ചരിച്ചിരുന്ന കാർ എതിരേ വന്ന സ്വകാര്യ ബസുമായി കൂട്ടിയിടിക്കുകയായിരുന്നു. മൂലമറ്റത്തെ വീട്ടിലായിരുന്ന ഭാര്യ ലൂസിയെയും മക്കളേയും കല്ലാർകുട്ടിയിലേക്ക് കൂട്ടിക്കൊണ്ടുപോകാനായിരുന്നു ജോളി യാത്ര തിരിച്ചത്.