രാജ്യാന്തര ചലച്ചിത്ര മേളയുടെ ഓപ്പൺ ഫോറത്തിൽ പാർവ്വതി കൊളുത്തിവിട്ട കസബ വിവാദം ഒരു അന്തവും കുന്തവുമില്ലാതെ മുന്നോട്ട് പോവുകയാണ്. ചേരി തിരിഞ്ഞ് സിനിമാക്കാർ തന്നെ തമ്മിൽ ചെളിവാരിയെറിയുന്നത് തുടരുകയാണ്. കസബയെയും മമ്മൂുട്ടിയുടെ സ്ത്രീ വിരുദ്ധ പരാമർശത്തെയും ചൂണ്ടിക്കാട്ടിയ പാർവ്വതിയെ എതിർത്ത് സിനിമക്കാർ തന്നെ സോഷ്യൽ മീഡിയയിൽ രംഗത്തെത്തി. ഏറ്റവും ഒടുവിൽ ഈ വിഷയത്തിൽ തലവെച്ച് പുലിവാല് പിടിച്ചത് സംവിധായകൻ ജൂഡ് ആന്റണിയാണ്.

കുരങ്ങിനോട് പാർവ്വതിയെ ഉപമിച്ച ജൂഡ് ആന്റണി അതിരൂക്ഷമായാണ് പാർവ്വതിയെ കളിയാക്കിയത്. ജൂഡിന്റെ പരാമർശത്തിൽ ശക്തമായ വാഗ്വാദങ്ങൾ നടക്കുമ്പോഴാണ് ജൂഡിന് ചുട്ടമറുപടിയുമായി പാർവ്വതി തന്നെ രംഗത്ത് എത്തിയത്. വിരൽ ചൂണ്ടി, ഛങഗഢ (ഓട് മലരെ കണ്ടംവഴി) എന്ന ട്രോൾ വാക്കുകൾ എമ്പ്രോയിഡറി ചെയ്ത ഒരു ചിത്രമാണ് പാർവതി ട്വിറ്ററിൽ പോസ്റ്റ് ചെയ്തത്. എല്ലാ സർക്കസ് മുതലാളിമാർക്കും എന്ന കുറിപ്പോടെയും ഫെമിനിച്ചി സ്പീക്കിങ് എന്ന ടാഗോടുകൂടിയാണ് പാർവതി ഈ ട്വീറ്റ് പോസ്റ്റ് ചെയ്തത്.

എന്നാൽ ഇപ്പോൾ ഇതിന് മറുപടിയായി കണ്ടം വഴി ഓടുന്ന പെണ്ണിന്റെ ചിത്രവുമായാണ് ജൂഡ് ആന്റണി രംഗത്ത് എത്തിയിരിക്കുന്നത്. പാർവതിയെ നേരിട്ട് പരാമർശിക്കുന്നില്ലെങ്കിലും ലക്ഷ്യം പാർവതി ഉയർത്തിയ വിഷയം തന്നെയെന്ന് വ്യക്തം. വലിയ ചർച്ചയാണ് ജൂഡിന്റെ പോസ്റ്റിന് താഴെ നടക്കുന്നത്. പലർക്കും ജൂഡ് തന്നെ മറുപടിയും കൊടുക്കുന്നുണ്ട്. എന്നാൽ, പിന്നീട് വിഷയത്തിൽ നേരിട്ട് മറുപടി കൊടുത്ത് നടി പാർവതി തന്നെ രംഗത്തുവരികയും ചെയ്തു.