കുസാറ്റ് മുൻ അദ്ധ്യാപകനും എഴുത്തുകാരനുമായ പ്രൊഫ. കെ ജി നായർ അന്തരിച്ചു; അന്ത്യം പ്രായാധിക്യത്തെ തുടർന്ന്
കൊച്ചി: കൊച്ചി ശാസ്ത്ര സാങ്കേതിക സർവകലാശാല സെന്റർ ഫോർ സയൻസ് ഇൻ സൊസൈറ്റിയുടെ ഡയറക്ടറും സർവകലാശാലയിലെ മുൻ അദ്ധ്യാപകനും എഴുത്തുകാരനുമായ തൃക്കാക്കര 'നന്ദന'ത്തിൽ ഡോ. കെ ഗോപാലകൃഷ്ണൻ നായർ (86) അന്തരിച്ചു. പ്രായാധിക്യത്തെ തുടർന്നായിരുന്നു അന്ത്യം.
കേരള സർവകലാശാലയിൽ നിന്നും ഗവേഷണ ബിരുദം നേടിയ അദ്ദേഹം കുസാറ്റ് ഫിസിക്‌സ് വകുപ്പിൽ അദ്ധ്യാപകനായി ജോലിയിൽ പ്രവേശിക്കുന്നതിന് മുൻപ് ഡൽഹി സർവകലാശാലയിലും കേരള സർവകലാശാലയിലും അദ്ധ്യാപകനായിരുന്നു. 1995 ൽ കുസാറ്റ് ഇലക്ട്രോണിക്‌സ് വകുപ്പിന്റെ സ്ഥാപക മേധാവിയായി. ഇലക്ട്രോണിക്‌സ് വകുപ്പിന്റെ തുടക്കത്തിൽ തന്നെ മൈക്രോവേവ് ആന്റിനയും പ്രോപ്പഗേഷൻ ലബോറട്ടറിയും സജ്ജമാക്കിയത് അദ്ദേഹത്തിന്റെ മേൽനോട്ടത്തിലായിരുന്നു.
1994 ൽ വ്യാവസായികോപകരണങ്ങളുടെയും ലാബ് ഉപകരണങ്ങളുടെയും കൃത്യത നിർണ്ണയിക്കാനും ഗവേഷണ ഫലങ്ങളുടെ വിശകലനത്തിനുമായി ആരംഭിച്ച സംസ്ഥാനത്തെ ആദ്യത്തെ കേന്ദ്രമായ സോഫിസ്റ്റിക്കേറ്റഡ് ടെസ്റ്റ് ആൻഡ് ഇൻസ്ട്രുമെന്റേഷൻ സെന്റർ (സ്റ്റിക് ) ന്റെ പ്രോജക്ട് രൂപകൽപനയിൽ ഉൾപ്പടെ ഭാഗമായിരുന്ന അദ്ദേഹം 2002 വരെ ഈ സ്ഥാപനത്തിന്റെ ഡയറക്ടറായി സേവനമനുഷ്ഠിച്ചു. കുസാറ്റിൽ 1991 ൽ പ്രവർത്തനമാരംഭിച്ച ശാസ്ത്ര സമൂഹകേന്ദ്രവും (സി-സിസ്) സയൻസ് പാർക്കും ഡോ.കെ ജി നായരുടെ ഭാവനയിൽ വിരിഞ്ഞതാണ്.
അടിസ്ഥാന ശാസ്ത്ര തത്വങ്ങളെയും ശാസ്ത്ര പ്രതിഭകളെയും പറ്റി സ്‌കൂൾ വിദ്യാർത്ഥികളെ പഠിപ്പിക്കുന്ന ഈ കേന്ദ്രം അടിസ്ഥാന ശാസ്ത്ര പ്രചരണ രംഗത്ത് ഇതിനകം ഇന്ത്യയിലെ മറ്റൊരു സർവകലാശാലക്കും അവകാശപ്പെടാനാകാത്ത നേട്ടങ്ങളാണ് കൊയ്തത്. ശാസ്ത്രം കുട്ടികളിലും സാധാരണക്കാരിലുമെത്തിക്കാൻ കവിയായും കഥാകാരനായും നിരവധി രചനകൾ നടത്തിയ അദ്ദേഹം ഡോ. വെളിയനാട് ഗോപാലകൃഷ്ണൻ നായർ എന്ന തൂലികാ നാമത്തിലാണ് അറിയപ്പെടുന്നത്. ശാസ്ത്രജ്ഞന്മാരുടെ ജീവിത കഥകളെ മുൻനിർത്തി 1960 ൽ അദ്ദേഹം എഴുതിയ 'ശാസ്ത്രവീഥിയിലെ നാഴികക്കല്ലുകൾ' എന്ന പുസ്തകം ഏറെ ശ്രദ്ധ നേടിയ ഒന്നായിരുന്നു. ശാസ്ത്ര പുസ്തകങ്ങളുടെ പരിഭാഷകനായി ഭാഷാ ഇൻസ്റ്റിറ്റ്യൂട്ടിലും പ്രവർത്തിച്ചു.
1988 ൽ ആന്റിന ആൻഡ് പ്രോപ്പഗേഷൻ സിമ്പോസിയം തുടങ്ങിവെച്ച അദ്ദേഹം യൂണിവേഴ്‌സിറ്റി ഗ്രാൻസ് കമ്മീഷന്റെ ഹോമി ജെ ബാബ പുരസ്‌കാരത്തിന് അർഹനായി. കൂടാതെ 2008 ൽ സ്വദേശി സയൻസ് അവർഡും 2009 ലെ കൊച്ചിൻ റോട്ടറി അവാർഡ്, 1975 ലെ കേരള സർക്കാരിന്റെ മികച്ച ശാസ്ത്ര പുസ്തകത്തിനുള്ള പുരസ്‌കാരം എന്നിവ ലഭിച്ചിട്ടുണ്ട്. 190 ഓളം ഗവേഷണ പ്രബന്ധങ്ങളും 130 ലധികം ശാസ്ത്ര ലേഖനങ്ങളും ശാസ്ത്ര കവിതാ സമാഹാരവും മൂന്ന് ശാസ്ത്ര പുസ്തകങ്ങളും രചിച്ചിട്ടുണ്ട്. സിഎസ്‌ഐആർ, ഐസ്ആർഒ, ഡിഎസ്ടി, കെഎസ്സിഎസ്ടിഇ, കുസാറ്റ് എന്നിവിടങ്ങളിലായി നിരവധി ഗവേഷണ പ്രോജക്ടുകൾ പൂർത്തിയാക്കിയിട്ടുണ്ട്.
ഭാര്യ: പരേതയായ ഡോ. പി കെ നവനീതമ്മ, മക്കൾ: ഡോ. ഗോപാൽ ഹരികുമാർ, ഡോ. ജി ബാലകൃഷ്ണൻ നായർ.
