കാര്യവട്ടം ഗ്രീൻഫീൽഡ് സ്റ്റേഡിയത്തിൽ സൈനിക റിക്രൂട്ട്‌മെന്റ് റാലി നടത്തിയപ്പോൾ നിലവിളി; പ്രധാനമന്ത്രിയുടെ യോഗത്തിൽ ടർഫിൽ ഇരിപ്പിടം ഒരുക്കി നാമാവശേഷമാക്കിയപ്പോൾ ബിജെപിക്ക് മറുപടി എന്തെങ്കിലും ഉണ്ടോ? മന്ത്രി കടകംപള്ളി സുരേന്ദ്രന്റെ ഫേസ്‌ബുക്ക് പോസ്റ്റ്
തിരുവനന്തപുരം: തിരുവനന്തപുരത്ത് പ്രധാനമന്ത്രിക്ക് പ്രചാരണ വേദി അനുവദിക്കുന്നതിൽ സർക്കാർ ഗുരുതര വീഴ്ച വരുത്തി എന്ന ആരോപണം നിലനിൽക്കെ കാര്യവട്ടത്ത് പരിപാടി സംഘടിപ്പിച്ചതിന് എതിരെ മന്ത്രി കടകംപള്ളി സുരേന്ദ്രൻ. ഗ്രീൻ ഫീൽഡ് സ്റ്റേഡിയം വീണ്ടെടുക്കും എന്ന വാഗ്ദാനവുമായി തെരഞ്ഞെടുപ്പിനെ നേരിടുന്ന കൂട്ടർ ആണിവർ എന്നോർക്കണമെന്ന് കടകംപള്ളി ബിജെപിയെ പരിഹസിച്ചു. 'സൈനികറാലി നടത്താൻ വേണ്ടി സ്റ്റേഡിയം ഉപയോഗിച്ചപ്പോൾ സാമൂഹ്യമാധ്യമങ്ങളിലൂടെയും അല്ലാതെയും നിലവിളിച്ച ഇക്കൂട്ടർക്ക് ഇപ്പോൾ മറുപടി എന്തെങ്കിലുമുണ്ടോ? ലക്ഷക്കണക്കിന് രൂപ ചെലവഴിച്ചു പരിപാലിക്കുന്ന ടർഫിൽ ഇരിപ്പിട സൗകര്യമൊരുക്കി താറുമാറാക്കുകയല്ല വേണ്ടിയിരുന്നത്. കഴക്കൂട്ടത്തെ നന്നാക്കിയില്ലെങ്കിലും തെരഞ്ഞെടുപ്പ് ഫലം കഴിഞ്ഞു തിരിച്ചു പോകുന്നതിനിടയിൽ ഇനിയും ഇതേപോലെ നശിപ്പിക്കാതെയിരുന്നാൽ വലിയ ഉപകാരം' -കടകംപള്ളി ഫേസ്‌ബുക്കിൽ കുറിച്ചു.
കടകംപള്ളി സുരേന്ദ്രന്റെ ഫേസ്‌ബുക്ക് പോസ്റ്റ്:
തിരുവനന്തപുരം സ്പോർട്സ് ഹബ്ബിന്റെ ടർഫ് നാമാവശേഷമാക്കിയാണ് എൻഡിഎയുടെ തെരഞ്ഞെടുപ്പ് പ്രചരണാർത്ഥം പ്രധാനമന്ത്രി പങ്കെടുത്ത യോഗം സ്റ്റേഡിയത്തിനകത്ത് നടത്തിയത്. സ്റ്റേഡിയം വീണ്ടെടുക്കും എന്ന വാഗ്ദാനവുമായി തെരഞ്ഞെടുപ്പിനെ നേരിടുന്ന കൂട്ടർ ആണിവർ എന്നോർക്കണം. സൈനികറാലി നടത്താൻ വേണ്ടി സ്റ്റേഡിയം ഉപയോഗിച്ചപ്പോൾ സാമൂഹ്യമാധ്യമങ്ങളിലൂടെയും അല്ലാതെയും നിലവിളിച്ച ഇക്കൂട്ടർക്ക് ഇപ്പോൾ മറുപടി എന്തെങ്കിലുമുണ്ടോ?
അന്ന് ആ പരിപാടി മാറ്റിവെക്കുവാൻ സംസ്ഥാന സർക്കാർ ശ്രമിച്ചിരുന്നുവെങ്കിലും പരിമിതസമയത്തിനുള്ളിൽ മറ്റൊരു വേദി കണ്ടെത്തുവാനുള്ള പ്രയാസം കാരണം അവിടെ തന്നെ നടത്തേണ്ടിവരികയായിരുന്നു. അതിനെതിരെ വാളെടുത്ത ബിജെപി നേതാക്കളും അണികളും ഇപ്പോൾ രാഷ്ട്രീയ സമ്മേളനം സ്റ്റേഡിയത്തിനുള്ളിൽ വെച്ചു നടത്തിയത് ന്യായീകരിക്കാൻ നിൽക്കുന്നത് അല്പത്തരമാണ്. ഓരോ വിഷയത്തിലും എത്രത്തോളം കാപട്യം നിറഞ്ഞവരാണ് ഇവർ എന്നതാണ് ഇവിടെ തെളിയുന്നത്.
മുഖ്യമന്ത്രി പിണറായി വിജയൻ പങ്കെടുത്ത എൽ.ഡി.എഫ് പൊതുയോഗം സ്പോർട്സ് ഹബ്ബിന് മുന്നിലെ റോഡിലാണ് സംഘടിപ്പിച്ചിരുന്നത്. ബിജെപിക്ക് സ്റ്റേഡിയത്തിനുള്ളിൽ നടത്തിയേ മതിയാകൂ എന്നുണ്ടെങ്കിൽ തന്നെ ഗാലറിയിൽ ആൾക്കാർക്ക് ഇരിക്കാൻ സംവിധാനമൊരുക്കണമായിരുന്നു. അതിന് പകരം ലക്ഷക്കണക്കിന് രൂപ ചെലവഴിച്ചു പരിപാലിക്കുന്ന ടർഫിൽ ഇരിപ്പിട സൗകര്യമൊരുക്കി താറുമാറാക്കുകയല്ല വേണ്ടിയിരുന്നത്. കഴക്കൂട്ടത്തെ നന്നാക്കിയില്ലെങ്കിലും തെരഞ്ഞെടുപ്പ് ഫലം കഴിഞ്ഞു തിരിച്ചു പോകുന്നതിനിടയിൽ ഇനിയും ഇതേപോലെ നശിപ്പിക്കാതെയിരുന്നാൽ വലിയ ഉപകാരം.
നേരത്തെ തിരുവനന്തപുരത്ത് പ്രധാനമന്ത്രിയുടെ പരിപാടി സംഘടിപ്പിക്കാനുള്ള ഗ്രൗണ്ട് ഏതാണെന്ന് നിർണയിക്കുന്നതിൽ സർക്കാർ ഗുരുതരമായ വീഴ്ച വരുത്തിയെന്ന് ബിജെപി ആരോപിച്ചിരുന്നു. സെൻട്രൽ സ്റ്റേഡിയം തരില്ലെന്ന നിലപാടായിരുന്നു സംസ്ഥാനസർക്കാരിനെന്നും ശംഖുംമുഖത്ത് സുരക്ഷാ അനുമതി ലഭിച്ചില്ലെന്നും പാർട്ടി ജനറൽ സെക്രട്ടറി ജോർജ് കുര്യൻ ആരോപിച്ചിരുന്നു. പുത്തരിക്കണ്ടം മൈതാനമാകട്ടെ മാലിന്യക്കൂമ്പാരമായിരിക്കുകയാണ്. ഒരു ഘട്ടത്തിൽ പരിപാടി മാറ്റി പ്രധാനമന്ത്രിയുടെ റോഡ്‌ഷോ നടത്താമെന്നു വരെ പാർട്ടി ചിന്തിച്ചു. ഒടുവിൽ തെരഞ്ഞെടുപ്പ് കമ്മീഷൻ ഇടപെട്ടിട്ടാണ് ഗ്രീൻഫീൽഡ് സ്റ്റേഡിയം അനുദിച്ചത്. ജനാധിപത്യത്തിന് ഒട്ടും ഭൂഷണമല്ലാത്ത നിലപാടാണ് സംസ്ഥാന ഭരണകൂടം സ്വീകരിച്ചതെന്നും ബിജെപി കുറ്റപ്പെടുത്തിയിരുന്നു.
