കേരളത്തിന്റെ മാത്രമല്ല, ഫഹദ് ദക്ഷിണേന്ത്യയുടെയും സ്വത്ത്'; മലയാളിയായതു കൊണ്ടല്ല വിക്രമിൽ എടുത്തത്: കമൽ ഹാസന് പറയാനുള്ളത്

തിരുവനന്തപുരം: ഫഹദ് ഫാസിലിന്റെ അഭിനയ മികവിനെക്കുറിച്ച് ഉലകനായകൻ കമൽ ഹാസൻ. അപാര കഴിവുള്ള നടനാണെന്നും കേരളത്തിന്റെ മാത്രമല്ല, ദക്ഷിണേന്ത്യയുടെയും സ്വത്താണ് ഫഹദ് എന്നും അദ്ദേഹം അഭിപ്രായപ്പെട്ടു.

'വിക്രം' എന്ന ചിത്രത്തിലേക്ക് ഫഹദിനെ തെരഞ്ഞെടുക്കാൻ കാരണം കഴിവുകൊണ്ട് മാത്രം. അല്ലാതെ മലയാളിയായതുകൊണ്ടല്ല. അടുത്ത പത്ത് വർഷം പ്രേക്ഷകരുടെ മനസ്സിൽ മായാതെ തങ്ങിനിൽക്കുന്ന സിനിമയായിരിക്കും വിക്രം എന്നും അദ്ദേഹം പറഞ്ഞു.

ഫഹദിനൊപ്പം വിജയ് സേതുപതിയുടെയും അഭിനയം തന്നെ ആകർഷിച്ചതായി കമൽ പറയുന്നു. അവരിൽ നിന്നും പലതും പഠിക്കുകയായിരുന്നുവെന്നും ഇരുവരെയും ചേർത്ത് ഒരു സിനിമ തന്നെ സംവിധാനം ചെയ്യണമെന്ന് ആഗ്രഹിച്ചുപോയതായും അദ്ദേഹം കൂട്ടിച്ചേർത്തു.

മാധ്യമത്തിന് നൽകിയ അഭിമുഖത്തിലാണ് കമലിന്റെ പ്രതികരണം. മലയാള സിനിമയിൽ അഭിനയിക്കാൻ എപ്പോഴും തയ്യാറാണെന്ന് കമൽഹാസൻ വ്യക്തമാക്കുന്നു. കഥയും കഥാപാത്രവും സംവിധായകനും ഒത്തുവരുന്നില്ല എന്നതു മാത്രമാണ് പ്രശ്നം. മലയാളത്തിലും തമിഴിലും ഒരുപോലെ ഇറങ്ങുന്ന ചിത്രങ്ങൾ ചെയ്യാൻ കഴിയും എന്നൊരു സാധ്യതയുണ്ട്. എന്നാൽ സിനിമയുടെ തന്മയത്വം പോകുമോ എന്നാണ് മലയാള സംവിധായകരുടെ പേടി. ഈ പേടി മാറ്റി അവരെ പറഞ്ഞ് മനസ്സിലാക്കാൻ കഴിഞ്ഞാൽ മലയാള സിനിമയിൽ താൻ ഇനിയുമെത്തുമെന്നും കമൽഹാസൻ പറഞ്ഞു.