കണ്ണൂർ നഗരത്തിൽ വൻ കഞ്ചാവ് വേട്ട; ഇതര സംസ്ഥാന തൊഴിലാളികൾ അറസ്റ്റിൽ; നിർണ്ണയകമായത് എക്‌സൈസ് കമ്മീഷണറുടെ ഉത്തരമേഖല സ്‌ക്വാഡിന് ലഭിച്ച രഹസ്യ വിവരം
കണ്ണൂർ:കണ്ണൂർ നഗരത്തിൽ വൻ കഞ്ചാവ് വേട്ട രണ്ട് കിലോ കഞ്ചാവുമായി കർണ്ണാടക, ആസ്സാം സ്വദേശികളായ രണ്ട് പേർ അറസ്റ്റിലായി. കണ്ണൂർ റേഞ്ച് എക്‌സൈസ് ഇൻസ്‌പെക്ടർ സി സി ആനന്ദകുമാറിന്റെ നേതൃത്വത്തിൽ നടത്തിയ പരിശോധനയിലാണ് കണ്ണൂർ മഞ്ചപ്പാലം എരിഞ്ഞാറ്റുവയലിലെ വാടക ക്വാർട്ടേസിൽ വച്ച് രണ്ടു കിലോ 50 ഗ്രാം കഞ്ചാവുമായി കർണ്ണാടക സ്വദേശി സജീദ് മുഹമ്മദ് (24) ആസ്സം സ്വദേശി ഇക്രാമുൽ ഹക്ക് (22) എന്നിവരെ അറസ്റ്റ് ചെയ്തത് .
എക്‌സൈസ് കമ്മീഷണറുടെ ഉത്തരമേഖല സ്‌ക്വാഡിന് ലഭിച്ച രഹസ്യവിവരത്തിലാണ് അതിഥി തൊഴിലാളികളായ ഇവരെ പിടികൂടിയത് . കണ്ണൂർ ടൗൺ കേന്ദ്രീകരിച്ച് സൈക്കിളിൽ യാത്ര ചെയ്ത് കഞ്ചാവ് ചെറു പാക്കറ്റുകളാക്കി വൻ ലാഭത്തിൽ കഞ്ചാവ് കച്ചവടം ചെയ്യുന്ന ഇവരെ ആഴ്‌ച്ചകളോളമുള്ള രഹസ്യ നിരീക്ഷണത്തിലൊടുവിലാണ് എക്‌സൈസിന്റെ വലയികപ്പെട്ടത് .
അസിസ്റ്റന്റ് എക്‌സൈസ് ഇൻസ്‌പെക്ടർ പി ടി യേശുദാസൻ, പ്രിവന്റീവ് ഓഫീസർ ജോർജ് ഫർണാണ്ടസ്, പി കെ ദിനേശൻ (ഗ്രേഡ്), എക്‌സൈസ് കമ്മീഷണറുടെ ഉത്തരമേഖല സ്‌ക്വാഡ് അംഗം സീനിയർ ഗ്രേഡ് ഡ്രൈവർ കെ ബിനീഷ്, സിവിൽ എക്‌സൈസ് ഓഫീസർമാരായ കെ വി ഹരിദാസൻ ,പി നിഖിൽ എന്നിവരടങ്ങുന്ന സംഘമാണ് ഇവരെ പിടികൂടിയത് .
