കണ്ണൂർ വിമാനതാവളത്തിൽ പാസ്‌പോർട്ടിന്റെ പേജുകൾ കീറി നശിപ്പിച്ച യാത്രക്കാരൻ അറസ്റ്റിൽ; എമിഗ്രേഷൻ വിഭാഗം പിടികൂടിയത് ഓർക്കാട്ടേരി സ്വദേശി സിദ്ദിഖിനെ

കണ്ണൂർ: കണ്ണൂർ രാജ്യാന്തര വിമാന താവളത്തിൽ നിന്നും ദോഹയിലേക്ക് യാത്ര പോകാനെത്തിയ യാത്രക്കാരന്റെ പാസ്പോർട്ടിലെ പേജുകൾ കീറി നശിപ്പിച്ച നിലയിൽ വിമാനത്താവളം എമിഗ്രേഷൻ വിഭാഗം പിടികൂടി. വടകര ഓർക്കാട്ടേരി പുറമേരി സ്വദേശി കിള്ളിയത്ത് ഹൗസിൽ സിദ്ദിഖിനെയാണ് അറസ്റ്റു ചെയ്തത്.

കഴിഞ്ഞ ദിവസം വൈകുന്നേരം 3.30 ഓടെയാണ് സംഭവം. ദോഹയിലേക്ക് യാത്ര പോകാൻ എത്തിയതായിരുന്നു ഇയാൾ. പാസ്പോർട്ട് പരിശോധനയിൽ 17, 18, 19, 20 എന്നീ പേജുകൾ കീറിക്കളഞ്ഞ നിലയിലായിരുന്നു. എയർപോർട്ട് സ്റ്റേഷൻ പൊലീസ് കേസെടുത്ത് ഇയാളെഅറസ്റ്റു ചെയ്തു.

അതേസമയം പേജുകൾ കീറി നശിപ്പിച്ച സാഹചര്യത്തിൽ 5000 രൂപ വീതം പൊലീസിലും കോടതിയിലും പിഴ അടച്ചശേഷം പുതിയ പാസ്പോർട്ടിന് അപേക്ഷ നൽകാവുന്ന കുറ്റമാണിത്. ജാമ്യം കിട്ടിയെങ്കിലും പാസ്പോർട്ടിലെ പേജുകൾ കീറി നശിപ്പിച്ച യാത്രക്കാരന്റെ ദോഹയിലേക്കുള്ള യാത്ര മുടങ്ങിയിരിക്കുകയാണ്.