മിശ്രിഫ് : കെഫാക് സീസൺ ആറിന്റെ മത്സരങ്ങൾ മൂന്ന് വാരങ്ങൾ ആഴ്ചകൾ പിന്നിട്ടപ്പോൾ ഗ്രൂപ്പ് എ യിലെ മത്സരങ്ങളിൽ സോക്കർ കേരള, യങ് ഷൂട്ടേർസ്, മാക് കുവൈത്ത്, സി. എഫ്. സി. ടീമുകൾക്ക് ജയം. ആദ്യ മത്സരത്തിൽ ശക്തരായ യങ് ഷൂട്ടേർസ് അബ്ബാസിയ അൽ ശബാബ് എഫ് സിയെ ഒരു ഗോളിന് പരാജയപ്പെടുത്തി.

രണ്ടാം മത്സരത്തിൽ നിലവിലെ ചാമ്പ്യന്മാരായ സോക്കർ കേരള ഏകപക്ഷീയമായ ആറ് ഗോളുകൾക്ക് സ്പാർക്‌സ് എഫ് സിയെ പരാജയപ്പെടുത്തി. കരുത്തന്മാരുടെ പോരാട്ടം കണ്ട മൂന്നാം മത്സരത്തിൽ ട്രിവാൻഡ്രം സ്‌ട്രൈക്കേഴ്‌സിനെ മാക് കുവൈത്ത് ഒരു ഗോളിന് പരാജയപ്പെടുത്തി.

കാണികളെ ആവേശഭരിതരാക്കിയ അവസാന മത്സരത്തിൽ രണ്ടിനെതിരെ മൂന്നു ഗോളുകൾക്ക് സി എഫ് സി സാൽമിയ ബിഗ്ബോയ്സിനെ പരാജയപ്പെടുത്തി. കനത്ത ചൂടിനെപ്പോലും വകവെക്കാതെ നിരവധിപേരാണ് മത്സരങ്ങൾ വീക്ഷിക്കാൻ മിശ്രിഫിലെ സ്റ്റേഡിയത്തിലെത്തുന്നത്. വെള്ളിയാഴ്ച ഗ്രൂപ് ബി യിലെ മത്സരങ്ങൾ നടക്കുമെന്ന് സംഘാടകർ അറിയിച്ചു.