മയാമി : ഫ്ളോറിഡയിലെ ആദ്യത്തെ മലയാളി സംഘടനയായ കേരളം സമാജം ഓഫ് സൗത്ത് ഫ്ളോറിഡയുടെ ഈ വർഷത്തെ ഓണാഘോഷ പരിപാടികളും സ്വാതന്ത്ര്യ ദിനാഘോഷവും സെപ്റ്റംബർ രണ്ടാം തീയതി ശനിയാഴ്ച വൈകിട്ട് 5 മണിക്ക് കൂപ്പർ സിറ്റി ഹൈ സ്‌കൂൾ ഓഡിറ്റോറിയത്തിൽ വിവിധ പരിപാടികളോട് കൂടി ആഘോഷിക്കുന്നു . അഞ്ചു മണിക്കു വിഭവസമൃദ്ധമായ ഓണസദ്യയെത്തുടർന്നു ചെണ്ടമേളം ,താലപ്പൊലി ,പുലിക്കളി ,കുമ്മാട്ടിക്കളി തുടങ്ങിയവയുടെ അകമ്പടിയോടു കൂടിയുള്ള സാംസ്‌കാരിക ഘോഷയാത്രക്ക് ശേഷം ഓണം ,സ്വാതന്ത്ര്യദിനം, കേരളപ്പിറവി തുടങ്ങിയവയെ അടിസ്ഥാനമാക്കിയുള്ള വൈവിദ്ധ്യമാർന്ന കലാപരിപാടികളും ഉണ്ടായിരിക്കുന്നതാണ് . ഡോ . വേണുഗോപാൽ ആണ് ഈ വർഷം ഓണസന്ദേശം നൽകുന്നത് .

നാട്യകലയുടെ ആത്മാവായ നവരസങ്ങളെ ഭാരതത്തിന്റെ പരമ്പരാഗത കലാരൂപങ്ങളുമായി സമുന്വയിപ്പിച്ചു കൊണ്ട് ആവിഷ്‌ക്കരിച്ചിരിക്കുന്ന ''നവരസാ' എന്ന ഓണാക്കാഴ്ച് ,കേരളം സമാജത്തിന്റെ 2017 ലെ ഓണാഘോഷം മറ്റൊരു തലത്തിലേക്ക് ഉയർത്തും എന്ന് ഇതിന്റെ സംഘാടകർ വിശ്വസിക്കുന്നു . ''നവരസാ' എന്ന ഈ ഷോയുടെ സംവിധാനവും ,രംഗസജ്ജീകരണവും ബിജു ഗോവിന്ദൻകുട്ടി നിർവ്വഹിക്കുന്നു. നൂറ്റിഅന്പതിൽപരം കലാകാരന്മാരും ,കലാകാരികളും അണിനിരക്കുന്ന ഈ പരിപാടി സൗത്ത് ഫ്ലോറിഡയിലെ പ്രഥാന ഡാൻസ് സ്‌കൂളുകളായ രശ്മി സുനിൽ നയിക്കുന്ന ടെംപിൾ ഓഫ് ഡാൻസ് , രഞ്ജന വാരിയർ നയിക്കുന്ന റിതംസ് സ്‌കൂൾ ഓഫ് ഡാൻസ് എന്നിവയിലെ കുട്ടികൾ,കൂടാതെ ദിവ്യ സണ്ണിയുടെ വിദ്യാർത്ഥികൾ കേരള സമാജത്തിന്റെ പോഷക സംഘടനകളായ വിമൻസ് ഫോറം ,യൂത്ത് ക്ലബ് , കിഡ്സ് ക്ലബ് , സൗത്ത് ഫ്ലോറിഡയിലെ മറ്റനേകം കലാപ്രതിഭകൾ എന്നിവരുടെയെല്ലാം സഹകരണത്തോടു കൂടിയാണ് അണിയിച്ചൊരുക്കുന്നത് .

സാമൂഹിക ,രാഷ്ട്രീയ,ആത്മീയ മേഖലകളിലെ പ്രമുഖർ ഈ ഓണാഘോഷ പരിപാടിയിൽ സംബന്ധിക്കുന്നതാണ്. സൗത്ത് ഫ്ലോറിഡയിലെ .എല്ലാ മലയാളികളെയും കേരള സമാജത്തിന്റെ ഓണാഘോഷ പരിപാടിയിലേക്ക് സ്വാഗതം ചെയ്യുന്നതായി പ്രസിഡന്റ് സാജൻ മാത്യുവും , സെക്രട്ടറി ഷിജു കല്പാഡിക്കലും അറിയിക്കുന്നു . പബ്ലിസിറ്റി കൺവീനർ പത്മകുമാർ കെ.ജി അറിയിച്ചതാണിത് .