ഡാളസ്: സയൺ ഗോസ്പൽ അസംബ്ലിയും ട്രൂമാക്‌സ് മീഡിയയും സംയുക്തമായി നടത്തുന്ന കെസ്റ്റർ ലൈവ് ഓർക്കസ്ട്രയുടെ ഒരുക്കങ്ങൾ പുരോഗമിക്കുന്നു.  19 ന് സണ്ണിവെയൽ ഫസ്റ്റ് ബാപ്റ്റിസ്റ്റ് ചർച്ചിൽ വൈകിട്ട് 6 മണിക്ക് ഓർക്കസ്ട്ര ആരംഭിക്കും. മനുഷ്യമനസ്സിനെ തൊട്ടുണർത്തുന്ന അനശ്വര ഗാനങ്ങളുമായി ആദ്യമായിട്ടാണ് കെസ്റ്റർ അമേരിക്കയിൽ വരുന്നത്. തന്നോടൊപ്പം വേദി പങ്കിടുന്ന പ്രഗത്ഭ ഗായകരാണ് ബിനോയ് ചാക്കോയും ഗായിക സിസിലി ഏബ്രഹാമും. സുനിൽ സോളമനും സംഘവുമാണ് ഓർക്കസ്‌ട്രേഷൻ നിർവ്വഹിക്കുന്നത്.

സയൺ ഗോസ്പൽ അസംബ്ലിയുടെ ദേവാലയം പുതുക്കിപ്പണിയുന്നതിനുള്ള ധനശേഖരണാർത്ഥമായിട്ടാണ് ഡാളസിൽ ഈ പ്രോഗ്രാം ക്രമീകരിച്ചിരിക്കുന്നത്. ഡാളസിലുള്ള 40-ൽ പരം സഭകളുടേയും സാംസ്‌കാരിക സംഘടനകളുടേയും വലിയ ജനപിന്തുണയും ഈ പ്രോഗ്രാമിലേക്ക് ലഭ്യമായിട്ടുണ്ട്.     മലയാളക്കരയിലും അന്തർദേശീയ തലത്തിലും ഭവനനിർമ്മാണ രംഗത്ത് വ്യക്തിമുദ്രപതിപ്പിച്ച സിജു അഗസ്റ്റിൻ ഇവന്റ് സ്‌പോൺസറായും, മെഗസ്സ്‌പോൺസറായി ജോജി ജോർജ്ജും, ഗ്രാന്റ് സ്‌പോൺസറായി ബിജു തോമസും ഈ പ്രോഗ്രാമിന്റെ അണിയറശിൽപ്പികളായി പ്രവർത്തിക്കുന്നു. 

എറണാകുളം സ്വദേശിയായ കെസ്റ്റർ ക്രൈസ്തവ സംഗീത ലോകത്ത് ഗാനാലാപനത്തിൽക്കൂടി ശ്രോതാക്കളെ വ്യത്യസ്ഥ തലങ്ങളിൽ എത്തിക്കുവാൻ പ്രാപ്തിയുള്ള പ്രഗൽഭ ഗായകനാണ്. തൃപ്പൂണിത്തുറ ആർ. എൽ. വി കോളേജിൽ നിന്നാണ് സംഗീത ബിരുദം നേടിയത്. കുട്ടിക്കാലത്തെ സംഗീതത്തിൽ തൽപ്പരനായ കെസ്റ്ററിന് മാതാവിന്റെ പ്രോത്സാഹനമാണ് ഉയർച്ചയുടെ പടവുകൾ താണ്ടുന്നതിന് സഹായകരമായിരുന്നത്. കെസ്റ്റർ പാടിയിട്ടുള്ള  എത്രകേട്ടാലും മതിവരാത്ത ഗാനങ്ങളാണ് നിൻസ്‌നേഹം എത്രയോ അവർണനീയം....., ഇത്രത്തോളം എന്നെ നടത്തി......., നന്മമാത്രമെ........, ഇസ്രയേലിൻ നായക......തുടങ്ങിയ ഗാനങ്ങൾ. നമ്മിൽ അതൊരു അനുഗ്രഹമായും, അനുഭൂതിയായും ഏകാന്തതയുടെ തീരങ്ങളിൽ സ്വാന്ത്വനത്തിന്റെ കുളിർക്കാറ്റായും മാറുകയാണ്.

ഇന്ത്യവിട്ട് അന്യരാജ്യങ്ങളിൽ കെസ്റ്റർ അധികം പ്രോഗ്രാമുകൾ ചെയ്തിട്ടില്ല. അതിന്റെ പ്രധാന കാരണം സ്റ്റേജ് പ്രോഗ്രാമിനേക്കാൾ താൻ ഏറെ ഇഷ്ടപ്പെടുന്നത് സ്റ്റുഡിയോ റെക്കോഡിങ്ങ് പ്രോഗ്രാമുകളാണ്.   കെസ്റ്ററിന് അമേരിക്കയിലേക്കുള്ള വിസ ലഭിച്ചപ്പോൾത്തന്നെ ആ വിവരം ഡാളസിലെ പ്രോഗ്രാം കോർഡിനേറ്ററും ട്രൂമാക്‌സ് മീഡിയ ഡയറക്ടറുമായ വിൽസൺ തരകനെ അറിയിച്ചിരുന്നു. അമേരിക്കയിൽ വിവിധ സംസ്ഥാനങ്ങളിൽ കെസ്റ്റർ ലൈവ് പ്രോഗ്രാം നടത്തുന്നതിനുള്ള ക്രമീകരണങ്ങളും വിൽസൺ തരകൻ ചെയ്തുവരുന്നു.
വിശദവിവരങ്ങൾക്ക് ബന്ധപ്പെടുക :
Wilson Tharakan - 972 841 8924
Biju Daniel - 972 345 3877
Sabu Yohannan - 469 688 9548
Morning Star - 4696821893
Aniyan Dalles - 214 288 4762
Jose cherian - 214 789 5429
ടിക്കറ്റ് വെബ് സൈറ്റിലും ലഭ്യമാണ്. സന്ദർശിക്കുക : www.kesterlive.com
Email: kesterlive@gmail.com