നോർത്ത് കരോളിന: ഷാർലറ്റിൽ മെയ്‌ ആറു മുതൽ എട്ടു വരെ നടക്കുന്ന കെഎച്ച്എൻഎ യുവജന കുടുംബ സംഗമത്തിന്റെ യുവ കോ-ഓർഡിനേറ്ററായി രഞ്ജിത് നായരേയും ഇവന്റ് കമ്മിറ്റി ചെയറായി അംബിക ശ്യാമളയെയും തെരഞ്ഞെടുത്തതായി പ്രസിഡന്റ് സുരേന്ദ്രൻ നായർ അറിയിച്ചു.

അമേരിക്കയിലെ മലയാളി ഹിന്ദു യുവ സമൂഹത്തിന്റെ വളർച്ചക്ക് നവീന ആശയങ്ങളുമായി മുന്നോട്ടു വരാനും പുതിയ സംരഭങ്ങൾക്ക് പ്രോത്സാഹനം നൽകാനും യുവയുടെ പ്രവർത്തനങ്ങൾ സഹായകരമാകുമെന്ന് അദ്ദേഹം പ്രത്യാശ പ്രകടിപ്പിച്ചു. സനാതന ധർമത്തിന്റെ അടിസ്ഥാന ശിലകളെ മുറുകെപ്പിടിച്ചു വരും തലമുറകളിലേക്ക് ഭാരതീയ മൂല്യങ്ങൾ സന്നിവേശിപ്പിക്കാൻ യുവജന കുടുംബസംഗമം പ്രചോദനം ആകണമെന്നും അദ്ദേഹം അഭിപ്രായപ്പെട്ടു. കെഎച്ച്എൻഎയുടെ മുൻ ജോയിന്റ് സെക്രട്ടറി ഉൾപ്പടെ അമേരിക്കയിലെ സാമൂഹ്യ സാംസ്‌കാരിക മാദ്ധ്യമ രംഗത്തെ യുവ സാന്നിധ്യം ആണ് രഞ്ജിത് നായർ. അംബിക ഷാർലറ്റ് മലയാളി അസോസിയേഷൻ പ്രസിഡന്റ് ഉൾപ്പടെ നോർത്ത് കരോളിനയിലെ വിവിധ സംഘടനകളിൽ നിറഞ്ഞു നിൽക്കുന്ന വ്യക്തിത്വം. ഇരുവരും ഐടി രംഗത്തുനിന്നുള്ളവരാണ്.

യുവ ജന സംഗമത്തോടനുബന്ധിച്ചു പ്രഫഷണൽ സമ്മിറ്റ് ,കരിയർ ഡെവലപ്‌മെന്റ് സെമിനാർ, ഫാമിലി നെറ്റ് വർക്കിങ് എന്നിവ ഉൾപ്പടെ വിവിധ പരിപാടികൾ നടത്തും. കൂടാതെ അക്കാഡമിക് രംഗത്തും കലാരംഗത്തും മികവു പുലർത്തുന്നവരെ കണെ്ടത്താനും പ്രോത്സാഹിപ്പിക്കാനും ഉള്ള വേദിയോരുക്കാനും യുവജന സംഗമം ലക്ഷ്യമിടുന്നു. നവീന സാങ്കേതിക വിദ്യയിലൂന്നിയ പുത്തൻ തൊഴിൽ അവസരങ്ങളിൽ അധിഷ്ടിതമായി അമേരിക്കയിലെ വിവിധ സംസ്ഥാനങ്ങളിൽ മലയാളി യുവജന സാന്നിധ്യം വർധിച്ചു വരുന്നു. അതിൽ പ്രാധാന്യം അർഹിക്കുന്ന ഒരു സംസ്ഥാനം എന്ന നിലയിൽ നോർത്ത് കരോളിനയിൽ നടത്തുന്ന സംഗമം കെഎച്ച്എൻഎയുടെ ഭാവി പ്രവർത്തനങ്ങൾക്കു കൂടുതൽ കരുത്തേകാൻ ഉപകരിക്കുമെന്ന് കരുതപ്പെടുന്നു.