മനാമ: നന്മയുടെ വെളിച്ചം വിതറി മനുഷ്യ കുലത്തിന്റെ മോചനത്തിന് വേണ്ടി പ്രപഞ്ചനാഥൻ ഉണർത്തിയ ഖുർആനിക ഉപദേശങ്ങൾ വിശ്വാസികൾ ജീവിത യാഥാർഥ്യമായി ഉൾകൊള്ളുമ്പോൾ മാത്രമേ വഞ്ചനകൾ നിറഞ്ഞ ലോകത്ത് വിജയപാത കെട്ടിപ്പടുക്കാൻ സാധിക്കൂവെന്ന് ഹാഫിൾ അഹ്മദ് റാജിഹ് അലി ശിഹാബ് തങ്ങൾ ഉദ്‌ബോധിപ്പിച്ചു.

ബഹ്‌റൈൻ എസ്.കെ.എസ്.എസ്.എഫ് നൽകിയ സ്വീകരണ സംഗമത്തിൽ മറുപടി പ്രഭാഷണം നിർവഹിക്കുകയായിരുന്നു അദ്ദേഹം. അൽ മുഅ്മിനൂൻ അധ്യായത്തിലെ പ്രാരംഭ സൂക്തങ്ങളെ അപഗ്രഥിച്ചുകൊണ്ട് തങ്ങൾ നടത്തിയ ഹൃസ്വപ്രഭാഷണം ഖുർആനിക വിജ്ഞാനത്തിന്റെ മാസ്മരികത തൊട്ടുണർത്തുന്നതായി.
വയനാട് ശംസുൽ ഉലമാ ഇസലാമിക് അക്കാദമിയിൽ നിന്ന് ഒമ്പത് മാസം കൊണ്ട് ഖുർആൻ മുഴുവൻ മന:പാഠമാക്കിയ റാജിഹ് അലി തങ്ങൾ എസ്.കെ.എസ്.എസ്.എഫ് പ്രസിഡന്റ് പാണക്കാട് സയ്യിദ് അബ്ബാസ് അലി ശിഹാബ് തങ്ങളുടെ മകനാണ്. കർണ്ണാടകക്ലബ്ബിൽ നടന്ന പരിപാടിയിൽ ഹംസ അൻവരി മോളൂർ അധ്യക്ഷത വഹിച്ചു. തങ്ങൾക്കുള്ള അവാർഡ് ശഹീർ കാട്ടാമ്പള്ളി നൽകി.