മനാമ: മതനിരപേക്ഷത സംരക്ഷിക്കുന്നതിൽ ഇ.അഹമ്മദ് സാഹിബ് വഹിച്ച പങ്ക് എക്കാലത്തും സ്മരിക്കപ്പെടുമെന്ന് എൻ.കെ.പ്രേമചന്ദ്രൻ എംപി. അഭിപ്രായപ്പെട്ടു. കെ.എം.സി.സി. സൗത്ത്‌സോൺ കമ്മിറ്റി നടപ്പിലാക്കുന്ന 'അഹമ്മദ്‌സാഹിബ് കാരുണ്യതീരം' പദ്ധതിയുടെ വിതരണോദ്ഘാടനം നിർവഹിച്ചുകൊണ്ട് സംസാരിക്കുകയായിരുന്നു അദ്ദേഹം.

മരണസമയത്ത് അഹമ്മദ് സാഹിബിനോട് കേന്ദ്രസർക്കാർ കാണിച്ച അനാദരവ് മതേതര ഭാരതത്തിന് കളങ്കമാണെന്നും എൻ.കെ.പ്രേമചന്ദ്രൻ പറഞ്ഞു. കേരളത്തിൽ മതനിരപേക്ഷത കണ്ണിലെ കൃഷ്ണമണിപോലെ സംരക്ഷിക്കുന്നതിലും സാമുദായിക സാഹോദര്യവും മതമൈത്രിയും പോറലേക്കാതെ കാത്തുസൂക്ഷിക്കുന്നതിൽ ലീഗും പാണക്കാട് മുഹമ്മദലി ശിഹാബ്തങ്ങളെ പോലെയുള്ള നേതാക്കളും വഹിച്ച പങ്ക് വളരെവലുതാണ്.

കേരളത്തിൽ പ്രവർത്തിക്കുന്ന രാഷ്ട്രീയ പ്രസ്ഥാനങ്ങളിൽ ഇന്ന് ഏറ്റവും മെച്ചപ്പെട്ടതും അച്ചടക്കത്തോടും ഏകോപനത്തോടും സംഘടനാപരമായ കരുത്തോടും പ്രവർത്തിക്കുന്നതിൽ പ്രഥമസ്ഥാനത്ത് നിൽക്കുന്നത് ഇന്ത്യൻ യൂണിയൻ മുസ്്‌ലിംലീഗ് ആണെന്നും എൻ.കെ.പ്രേമചന്ദ്രൻ പറഞ്ഞു. ഏറ്റവും മെച്ചപ്പെട്ടതും സംഘടനാപരമായ കരുത്തോടും ഏകോപനത്തോടും കൂടി പ്രവർത്തിക്കുന്നതിൽ പ്രഥമ സ്ഥാനത്ത് നിൽക്കുന്ന രാഷ്ട്രീയ പ്രസ്ഥാനം ഇന്ത്യൻ യൂണിയൻ മുസ്്‌ലിംലീഗാണ്. ആ സ്ഥാനത്തേക്ക് വരാൻ കേഡർ പാർട്ടി എന്ന് വിശേഷിപ്പിക്കുന്ന സിപിഎമ്മിന് പോലും ഇന്ന് സാധ്യമാകുന്നില്ലെന്നും അദ്ദേഹം പറഞ്ഞു.

തിരഞ്ഞെടുപ്പുകളിൽ സ്ഥാനാർത്ഥിയെ നിർണയിക്കുന്ന കാര്യമായാലും, മന്ത്രിമാരെ നിർണയിക്കുന്ന കാര്യമായാലും അതല്ല മറ്റ് പ്രാദേശിക വിഷയങ്ങൾ ഉൾപ്പെടെ സംഘടനാ കാര്യത്തിൽ തീരുമാനമെടുക്കുന്നതിൽ സ്വീകരിച്ചിരിക്കുന്ന രീതി കേരളത്തിലെ മറ്റ് രാഷ്ട്രീയ പ്രസ്ഥാനങ്ങൾക്ക് മാതൃകയാക്കാൻ കഴിയുന്നതാണ്.

ആശയപരമായ പ്രതിബദ്ധതയും മനോഭാവവുമുള്ള ഒരു പ്രവർത്തകന് മാത്രമേ പ്രസ്ഥാനത്തോട് നീതിപുലർത്താനാകൂ. അത്തരത്തിൽ പ്രവർത്തിക്കുന്ന ഇന്ത്യൻ യൂണിയൻ മുസ്‌ലിംലീഗിന്റെ രക്ഷകർത്തത്തിൻ കീഴിൽ പ്രവർത്തിക്കുന്ന സാംസ്‌കാരിക പ്രസ്ഥാനമെന്ന നിലയിൽ കെ.എം.സി.സി.യുടെ പ്രവർത്തനങ്ങൾ ശ്ലാഘനീയമാണ്. കെ.എം.സി.സി.യുടെ സാംസ്‌കാരിക കാരുണ്യപരമായിട്ടുള്ള സന്നദ്ധപ്രവർത്തനങ്ങൾ രാജ്യത്തിനാകെ മാതൃകാപരമാണെന്നും അദ്ദേഹം പറഞ്ഞു.

കഴിഞ്ഞ പാർലമെന്റ് തെരഞ്ഞെടുപ്പ് വേളയിൽ മുന്നണിമാറ്റമുണ്ടായ സമയത്ത്, മാനസിക ഉത്കണ്ഠയും സങ്കോചവും ആശങ്കയുണ്ടായപ്പോൾ തനിക്ക് രാഷ്ട്രീയമായ കരുത്തും ധാർമ്മികമായ പ്രചോദനവും നൽകുന്നതിൽ പ്രവാസലോകത്ത് പ്രവർത്തിക്കുന്ന കെ.എം.സി.സി. മുഖ്യപങ്കാണ് വഹിച്ചതെന്ന് എൻ.കെ.പ്രേമചന്ദ്രൻ എംപി വ്യക്തമാക്കി.

അഹമ്മദ് സാഹിബിന്റെ നാമഥേയത്തിൽ തുടങ്ങുന്ന കാരുണ്യതീരം പദ്ധതി വളരെ വിജയകരമായി മുന്നോട്ടു കൊണ്ടുപോകാനും നിർദ്ധനരായ കൂടുതൽ കുടുംബങ്ങൾക്ക് സഹായങ്ങൾ എത്തിക്കാനുള്ള കഴിവും സന്നദ്ധതയും സംഘാടകർക്കുണ്ടാകട്ടെയെന്ന് ആശംസിക്കുകയും ചെയ്തു. മനാമ കെ.എം.സി.സി. ഹാളിൽ സംഘടിപ്പിച്ച പരിപാടിയിൽ കെ.എം.സി.സി. സൗത്ത്‌സോൺ വൈസ്പ്രസിഡന്റ് പി.എച്ച്.അബ്ദുൽറഷീദ് അധ്യക്ഷനായിരുന്നു. കെ.എം.സി.സി. സംസ്ഥാന പ്രസിഡന്റ് എസ്.വി.ജലീൽ ഉദ്ഘാടനം ചെയ്തു.

സൗത്ത്‌സോൺ വൈസ്പ്രസിഡന്റ് നസീർ നെടുങ്കണ്ടം സ്വാഗതവും ജനറൽ സെക്രട്ടറി തേവലക്കര ബാദുഷ അഹമ്മദ് സാഹിബ് കാരുണ്യതീരം പദ്ധതി സംബന്ധിച്ച് വിശദീകരണവും നടത്തി. സമ്മേളനം കെ.എം.സി.സി. സംസ്ഥാന പ്രസിഡന്റ് എസ്.വി. ജലീൽ ഉദ്ഘാടനം ചെയ്തു. പുതുതായി അംഗത്വമെടുത്ത ഡോ. അബ്ദുർറഹ്്മാന് കെ.എം.സി.സി. സംസ്ഥാന ജനറൽ സെക്രട്ടറി അസൈനാർ കളത്തിങ്കൽ മെമ്പർഷിപ്പ് നൽകി. കമ്മിറ്റി അടുത്ത ഒരു വർഷം നടത്തുന്ന കർമ്മപദ്ധതി ജോയിന്റ് സെക്രട്ടറി റാഷിദ് അവിയൂർ വിശദീകരിച്ചു. മൈത്രി സോഷ്യൽ അസോസിയേഷൻ പ്രസിഡന്റ് സിയാദ് ഏഴംകുളം, വോയ്‌സ് ഓഫ് കേരള പ്രോഗ്രാം ഡയറക്ടർ റജി മണ്ണേൽ, കെ.എം.സി.സി. സംസ്ഥാന വൈസ്പ്രസിഡന്റുമാരായ ടി.പി.മുഹമ്മദലി, ഗഫൂർ കൈപ്പമംഗലം, സെക്രട്ടറി കരിം കുളമുള്ളതിൽ എന്നിവരും, കെ.എം.സി.സി. ജില്ലാ-ഏരിയാ നേതാക്കളും സംബന്ധിച്ചു. അബ്ദുൽഖാദർ ചേലക്കര നന്ദി പറഞ്ഞു.

കെ.എം.സി.സി. സൗത്ത്‌സോൺ ഓർഗനൈസിങ് സെക്രട്ടറി നവാസ് കുണ്ടറ, വൈസ് പ്രസിഡന്റ് സലിം കാഞ്ഞാർ, ഫിറോസ് പന്തളം, റജബ് കൊല്ലം, ഹനീഫ എന്നിവർ പരിപാടിക്ക് നേതൃത്വം നൽകി.