അങ്ങനെ കൊച്ചിമെട്രോയും സിനിമയിലെടുത്തു. തെലുഗ് ചിത്രമായ ലവറിന്റെ ഭാഗങ്ങളാണ് മെട്രോയിൽ ചിത്രീകരിച്ചത്. ആദ്യമായാണ് മെട്രോ സിനിമയുടെ ഭാഗമാകുന്നത്. മുമ്പ് പല പരസ്യചിത്രങ്ങളും മെട്രോസ്റ്റേഷനുകളിലും ചിത്രീകരിച്ചിട്ടുണ്ടെങ്കിലും ആദ്യമായാണ് ഒരു ഫീച്ചർ ഫിലിം ചിത്രീകരിക്കുന്നത്.

ഇടപ്പള്ളി സ്റ്റേഷന് മുന്നിലും പ്ലാറ്റ്ഫോം ഉൾപ്പെടെയുള്ള സ്ഥലങ്ങളിലായിരുന്നു ചിത്രീകരണം. കുട്ടനാട്, തോപ്പുംപടി, ഫോർട്ട് കൊച്ചി എന്നിവിടങ്ങളിലെ ചിത്രീകരണത്തിനു ശേഷമാണ് സിനിമാടീം മെട്രോയിലുമെത്തിയത്.

അധികൃതരിൽ നിന്നും അനുമതി വാങ്ങി അക്കൗണ്ടിൽ മുൻകൂർ പണം നിക്ഷേപിച്ചാൽ മെട്രോയിൽ ചിത്രീകരണത്തിനുള്ള അവസരമുണ്ടാകും. ലവറിന്റെ ചിത്രീകരണത്തിനായി രണ്ടു ലക്ഷം രൂപയാണ് അടച്ചത്.