പി ആർ ശ്രീജേഷിന് വേറിട്ട ആദരമൊരുക്കി കെ എസ് ആർ ടി സി; ഒളിമ്പ്യന്റെ ചിത്രങ്ങൾ പതിപ്പിച്ച ബസ് സർവീസ് നടത്തും; ബസ് പര്യടനം നടത്തുക ശ്രീജേഷിന്റെ നേട്ടങ്ങളും ചിത്രങ്ങളും ആലേഖനം ചെയ്ത്

തിരുവനന്തപുരം: ഒളിമ്പിക്സ് മെഡൽ നേടിയ ഹോക്കി താരം പി.ആർ.ശ്രീജേഷിന് ആദരവുമായി കെ.എസ്.ആർ.ടി.സി. ശ്രീജേഷിന്റെ നേട്ടങ്ങളും ആക്ഷൻ ചിത്രങ്ങളും ആലേഖനം ചെയ്ത് തിരുവനന്തപുരം സിറ്റി ഡിപ്പോയിലെ ആർ.എസ്.സി. 466 എന്ന ബസ് നഗരത്തിൽ സർവീസ് നടത്തും.വരും ദിവസങ്ങളിൽ ജില്ലയുടെ വിവിധ ഭാഗങ്ങളിലേക്ക് ബസ് സർവ്വീസ് വ്യാപിപ്പിക്കും.ഒളിമ്പിക്‌സിൽ വെങ്കലമെഡൽ നേട്ടം രാജ്യത്തിന് സമ്മാനിച്ച പി.ആർ ശ്രീജേഷിന്റെ നേട്ടങ്ങൾ പുതുതലമുറക്ക് പ്രചോദനകരമാകുന്നതിന് വേണ്ടിയാണ് വേറിട്ട പരിപാടി സംഘടിപ്പിക്കുന്നത്.

ശ്രീജേഷിന്റെ നേട്ടങ്ങളും ആക്ഷൻ ചിത്രങ്ങളും ആലേഖനം ചെയ്താണ് കെ.എസ്.ആർ.ടി.സിയുടെ ബസ് പര്യടനം നടത്തുക.മാനുവൽ ഫ്രെഡറിക് എന്ന മലയാളിക്കു ശേഷം ഒളിമ്പിക്‌സ് മെഡൽ നേടുന്ന മലയാളിയായി പി.ആർ ശ്രീജേഷ് മാറുമ്പോൾ നിറവേറുന്നത് മലയാളിയുടെ 48 വർഷം നീണ്ട കാത്തിരിപ്പിനാണ്. മികച്ച സേവുകളുമായി കളം നിറഞ്ഞു കളിച്ച ശ്രീജേഷ് എന്ന മലയാളി ഗോൾകീപ്പർക്ക് ഭാരതത്തിന്റെ ഈ അനിർവചനീയമായ നേട്ടത്തിൽ വലിയ പങ്ക് വഹിക്കാനായി. അത് മലയാളികളെ മുഴുവൻ അറിയിക്കുന്നതിന് വേണ്ടിയാണ് കെ.എസ്.ആർ.ടി.സി ഈ ഉദ്യമം ഏറ്റെടുത്തത്.

കെ.എസ്.ആർ.ടി.സി സി.എം.ഡി ബിജു പ്രഭാകർ ഐ.എ.എസ് മുന്നോട്ട് വെച്ച ആശയം കെ.എസ്.ആർ.ടി.സിയിൽ പുതുതായി രൂപവൽക്കരിച്ച കമേഴ്‌സ്യൽ ടീമംഗങ്ങളാണ് സാക്ഷാത്കരിച്ചത്. ബസിന്റെ ഡിസൈൻ പൂർണമായും നിർവഹിച്ചത് കെ.എസ്.ആർ.ടി.സി ജീവനക്കാരനായ എ.കെ. ഷിനുവാണ്. മികച്ച രീതിയിൽ ബസിൽ ചിത്രങ്ങൾ പതിപ്പിച്ചു മനോഹരമാക്കിയത് സിറ്റി ഡിപ്പോയിലെ തന്നെ ജീവനക്കാരായ മഹേഷ് കുമാർ, നവാസ്, അമീർ എന്നിവരാണ്.

ഈ പദ്ധതിക്ക് സിറ്റി യൂണിറ്റ് ഓഫീസർ ജേക്കബ് സാം ലോപ്പസ്, എ.ഡി.ഇ നിസ്താർ എന്നിവരും പിന്തുണ നൽകി. കേരളത്തിൽ നിന്നും ഇനിയും അനേകം ശ്രീജേഷുമാർ ഉയർന്നു വരാൻ കെ.എസ്.ആർ.ടി.സിയുടെ ഈ പ്രോത്സാഹനം സഹായകകരമാകുമെന്നാണ് ജീവനക്കാരുടെ പ്രതീക്ഷ.