മിസിസാഗ: നുപുര സ്‌കൂൾ ഓഫ് മ്യൂസിക് ആൻഡ് ഡാൻസിന്റെ ആഭിമുഖ്യത്തിൽ കുച്ചിപ്പുടിയിൽ നൃത്ത ശിൽപശാല സംഘടിപ്പിക്കുന്നു.

ടൊറോന്റോ മലയാളി സമാജത്തിന്റെ മിസിസാഗായിലുള്ള സെന്ററിൽ സെപ്റ്റംബർ 21 മുതൽ 26 വരെയാണ് ശിൽപശാല.

ഇന്ത്യയിൽ നിന്നുമുള്ള പ്രമുഖ കുച്ചിപ്പുടി നർത്തകരായ വൈജയന്തി കാശിയും പ്രതീക്ഷ കാശിയുമാണ് ശിൽപശാലക്ക് നേതൃത്വം നൽകുന്നത്. കർണാടക സംഗീത നൃത്ത അക്കാദമി മുൻ ചെയർപേഴ്‌സണും കേന്ദ്ര സംഗീത നാടക അക്കാദമി പുരസ്‌കാര ജേതാവുമായ വൈജയന്തി കാശി, ദൂർദർശൻ കേന്ദ്രത്തിലെ ഉന്നത റാങ്കിംഗിലുള്ള ഒരു കലാകാരിയാണ്.

ആര്യഭട്ട ഇന്റർനാഷണൽ അവാർഡ്, കലാഭാരതി യുവ പ്രതിഭ അവാർഡ്, നാട്യവേദ അവാർഡ് തുടങ്ങിയ നിരവധി അവാർഡുകൾ സ്വായത്തമാക്കിയ പ്രതീക്ഷ കാശി, 'നളന്ദ നൃത്ത്യ നിപുണ', 'നൃത്ത്യ ജ്യോതി' തുടങ്ങിയ പട്ടങ്ങളും നേടിയിട്ടുണ്ട്. കുച്ചിപ്പുടിയിൽ ഇത്രയേറെ ആധികാരികതയും നൈപുണ്യവുമുള്ള ഇവർ നടത്തുന്ന നൃത്തശിൽപശാലയിൽ ഇവിടുത്തെ കുട്ടികൾക്ക് പങ്കെടുക്കാനാവുന്നതുതന്നെ ഒരു വലിയ ഭാഗ്യമാണ്. അതിനാൽ നൃത്തത്തെ സ്‌നേഹിക്കുന്ന എല്ലാവരും ശിൽപശാലയിൽ പങ്കെടുക്കണമെന്ന് സംഘാടകയും നർത്തകിയുമായ ഗായത്രി വിജയകുമാർ അഭ്യർത്ഥിച്ചു.

ശിൽപശാലയിൽ പങ്കെടുക്കുന്ന കുട്ടികൾക്ക് അവർ പഠിച്ച നൃത്തം സ്റ്റേജിൽ അവതരിപ്പിക്കാൻ സംഘാടകർ പിന്നീട് അവസരം നൽകുന്നതാണ്.

രജിസ്‌ട്രേഷനും വിവരങ്ങൾക്കും നുപുര സ്‌കൂൾ ഓഫ് മ്യൂസിക് ആൻഡ് ഡാൻസിന്റെ ഡയറക്ടർ ഗായത്രി വിജയകുമാറുമായി 416 500 4681 FREE എന്ന നമ്പരിൽ ബന്ധപ്പെടുക.