ഹ്യൂസ്റ്റനിലെ പ്രളയത്തിൽ ദുരിതിക്കുന്നവരുടെ വേദനയിൽ ലാന ചേരുന്നു. തോരാതെ പെയ്യുന്ന പേമാരിയും ആഞ്ഞടിക്കുന്ന കൊടുങ്കാറ്റും ഒരു പ്രദേശത്തെയാകെ തകർത്തിരിക്കുന്നു. ഫലപ്രദമായ മുൻകരുതലുകളും ജാഗ്രതയോടെയുള്ള പ്രവർത്തനങ്ങളും ഉണ്ടായിട്ടുപോലും ദുരിതത്തിന്റെ തീവ്രത കുറക്കാൻ കഴിഞ്ഞിട്ടില്ല. പ്രകൃതിയുടെ ഈ ശിക്ഷക്കിരയായവർ പതിനായിരങ്ങളാണ്.

ജീവിതകാലം മുഴുവൻ അദ്ധ്വാനിച്ചുണ്ടാക്കിയ സമ്പാദ്യമെല്ലാം വെള്ളത്തിലാകുന്നതു നോക്കിനിൽക്കേണ്ടി വരുന്ന നിസ്സഹായരുടെ വേദന ഏതൊരു സാഹിത്യകാരനെയാണ് വികാരഭരിതനാക്കാത്തത്! ഈ പ്രളയത്തിൽ ജീവൻ നഷ്ടപ്പെട്ടവരുണ്ട്. അവരുടെ ബന്ധുക്കളുടെ വിലാപം ഏതു കർണ്ണപുടങ്ങളിലാണ് വന്നലക്കാത്തത്!

ഓർത്തു നോക്കൂ, തകഴിയുടെ 'വെള്ളപ്പൊക്കത്തിൽ' രക്ഷപ്പെടാൻ മാർഗ്ഗമില്ലാതെ, മേൽക്കൂരയിൽ കയറിനിന്നു മോങ്ങുന്ന നായയുടെ പോലും വേദന ഏറ്റു വാങ്ങിയത് ഹൃദയാലുവായ ഒരു സാഹിത്യകാരൻ- തകഴിയായിരുന്നു. ഇന്ന് ഹ്യൂസ്റ്റനിൽ ഉയരുന്നത് വിലാപമാണ്-ആയിരങ്ങളുടെ വിലാപം! ആ വേദനയിൽ സാഹിത്യകാരൻ പങ്കാളിയാകണം. അകലെനിന്നാണെങ്കിലും ആശ്വസിപ്പിക്കാൻ ഒരു വാക്കു വിളിച്ചറിയക്കണം. കയ്യെത്താത്ത ദൂരത്തു നിന്നായാലും സഹായഹസ്തം നീട്ടണം.

ലാനയുടെ പ്രവർത്തകർ സഹാനുഭൂതിയോടെ പ്രവർത്തിക്കേണ്ട സന്ദർഭമാണിത്. അത് നമ്മുടെ ധർമ്മമാണ്. ഹൂസ്റ്റനിൽ ദുരിതമനുഭവിക്കുന്ന മനുഷ്യരെ-ജാതി-മത-വർഗ്ഗ ഭേദം നോക്കാതെ ഫലപ്രദമായി സഹായിക്കാൻ എല്ലാ പ്രവർത്തകരോടും ആഹ്വാനം ചെയ്യുന്നതായി ലാനയുടെ ഭാരവാഹികൾ അറിയിക്കുന്നു