ലീഗ് സിറ്റി (റ്റെക്‌സസ്): മലയാളി സമാജം ഓഫ് ലീഗ് സിറ്റി ഡിസംബർ 30ന് ലീഗ് സിറ്റിയിലുള്ള നൈറ്റ് ഓഫ് കൊളംബസ് ഓഡിറ്റോറിയത്തിൽവച്ചു നടത്തപ്പെട്ട ഈ വർഷത്തെ ക്രിസ്തുമസ് ന്യൂ ഇയർ ആഘോഷം വൻ വിജയം.

അമേരിക്കൻ സ്വദേശികൾക്കും വിദേശികൾക്കുമെല്ലാം കൗതുകമുണർത്തിക്കൊണ്ടു ലീഗ് സിറ്റി മലയാളികൾ നിർമ്മിച്ച 14 അടിയോളം വലിപ്പമുള്ള നക്ഷത്രവും, 500 പൗണ്ടോളം തൂക്കമുള്ള കൂറ്റൻ കേക്കും, ഇതുകൂടാതെ നൂറുകണക്കിന് ചെറു നക്ഷത്രങ്ങൾ, പുൽക്കൂട്, വിവിധ വലുപ്പത്തിലുള്ള ക്രിസ്തുമസ് ട്രീകൾ, വൈവിധ്യമാർന്ന തരത്തിലുള്ള നയനമനോഹരമായ ലൈറ്റുകൾ, അലങ്കാരങ്ങൾ എന്നിവയെല്ലാം അതിശയോക്തി നിറഞ്ഞതായിരുന്നു. FM 518 ന് സമീപം സ്ഥാപിച്ച കൂറ്റൻ നക്ഷത്രവും മറ്റു അലങ്കാരങ്ങളും കാണാൻ നൂറുകണക്കിന് ആളുകൾ വാഹനങ്ങൾ വഴിയോരത്തു നിർത്തിയിടുകയും അത് ആസ്വദിക്കുകയും ചെയ്തു.

ഇതോടൊപ്പം പ്രിയ ഗായകരായ പീറ്റർ കോറസ്, രശ്മി നായർ, സീറ തോമസ് എന്നിവരെ അണിനിരത്തി നടത്തിയ സംഗീത വിരുന്നും, യുവജനങ്ങളുടെയും, കുട്ടികളുടെയും വൈവിധ്യമാർന്ന നൃത്ത, സംഗീത, പരിപാടികളും കാണികളുടെ കണ്ണിനും മനസ്സിനും ഒരുപോലെ കുളിർമ യേകുന്നതായിരുന്നു. രുചികരവും വൈവിധ്യവുമാർന്ന ഭക്ഷണങ്ങൾ തത്സമയം ഒരുക്കികൊണ്ടുള്ള നാടൻ തട്ടുകട (കടലോരം തട്ടുകട) കേരളത്തനിമയെ വിളിച്ചോതി. കൂടാതെ പ്രശസ്ത കോണ്ടിനെന്റൽ ഷെഫ് ഡെന്നിസ് തോമസിന്റെ നേതൃത്വത്തിൽ ഒരുക്കിയ ബാർ ബി ക്യു എല്ലാവരും വേണ്ടുവോളം ആസ്വദിച്ചു.

പരസ്പര കൂട്ടായ്മയുടെയും, കുടുമ്പ ബന്ധങ്ങളുടെയും ആഴം കൂടുതൽ ഊട്ടിയുറപ്പിക്കുവാൻ ലീഗിസിറ്റിയിലുള്ള എല്ലാ മലയാളികളും ഒത്തൊരുമയോടുകൂടി ഒരു കുടംബം എന്ന പോലെ നടത്തിയ ഈ പരിപാടി വിന്റർ ബെല്‌സ് മറ്റുള്ളവർക്കും ഒരു മാതൃകയാകട്ടെ.