ന്യൂയോർക്ക്: ഫ്‌ളോറൽപാർക്കിലെ 26 എൻ ടൈസൻ അവന്യൂവിൽ കൂടിയ ഫൊക്കാനാ ദേശീയ മീറ്റിംഗിൽ വച്ച് നിലവിൽ ഫൊക്കാനയുടെ വനിതാ സമാജത്തിൽ പ്രവർത്തിക്കുന്ന ലീല മാരേട്ടിനെ വീണ്ടും ചെയർപേഴ്‌സണായി തെരഞ്ഞെടുത്തു. അമേരിക്കയിലെ വിവിധ സാംസ്‌കാരിക-സാമൂഹ്യ രംഗത്ത് കഴിഞ്ഞ മുപ്പത് വർഷത്തിലധികമായി വ്യക്തിമുദ്ര പതിപ്പിച്ചയാളാണ് ലീല മാരേട്ട്.

കേരള സമാജം പ്രസിഡന്റ്, കാത്തലിക് അസോസിയേഷൻ പ്രസിഡന്റ്, ബോർഡ് ചെയർമാൻ എന്നീ നിലകളിൽ നേതൃപാടവം തെളിയിച്ചിട്ടുണ്ട്. കഴിഞ്ഞ 28 വർഷമായി ന്യൂയോർക്ക് സിറ്റിയിലെ എൻവയൺമെന്റൽ പ്രൊട്ടക്ഷനിൽ സയന്റിസ്റ്റായി ജോലി നോക്കിവരുന്നു. 1998 മുതൽ ന്യൂയോർക്ക് സിറ്റിയിലെ ഏറ്റവും വലിയ തൊഴിലാളി സംഘടനയായ ഡി.സി-37, ലോക്കൽ 375 യൂണിയന്റെ റെക്കോർഡിങ് സെക്രട്ടറിയായും സേവനം അനുഷ്ഠിക്കുന്നു.

കഴിഞ്ഞ പത്തുവർഷമായി ഫൊക്കാനയുടെ വിവിധ തലങ്ങളിൽ സ്തുത്യർഹമായി സേവനം അനുഷ്ഠിച്ചുവരുന്നു. 2004 മുതൽ ഫൊക്കാന കമ്മിറ്റി മെമ്പർ, ഫൊക്കാന റീജിയണൽ പ്രസിഡന്റ്, ഫൊക്കാന വൈസ് പ്രസിഡന്റ്, ട്രഷറർ, ബോർഡ് ഓഫ് ട്രസ്റ്റി മെമ്പർ, മഹിളാ സമാജം ചെയർപേഴ്‌സൺ എന്നീ നിലകളിലും ബ്രെസ്റ്റ് കാൻസർ വാക്ക്, ആരോഗ്യ സെമിനാർ, കേക്ക് ബേക്കിങ് മത്സരം, പുഷ്പാലങ്കാര മത്സരം, കേരളാ കൺവൻഷനിൽ സ്ത്രീ ശാക്തീകരണ സെമിനാർ എന്നിവ സംഘടിപ്പിക്കുകയുണ്ടായി.

ഇന്ത്യൻ കോൺസുലേറ്റിൽ വിസ, പാസ്‌പോർട്ട്, ഒ.സി.ഐ കാർഡ് എന്നീ പ്രശ്‌നങ്ങളിൽ ഇന്ത്യൻ മലയാളി സമൂഹത്തിന് നേരിടേണ്ടിവരുന്ന പ്രശ്‌നങ്ങളിൽ സഹായിക്കുകയും പരിഹാര മാർഗ്ഗങ്ങൾ കണ്ടെത്തുകയും ചെയ്തിട്ടുണ്ട്.