തിരുവനന്തപുരം: സോഷ്യൽ മീഡിയയിലെ സജീവ സാന്നിധ്യമാണ് നടി ലിസി. പ്രിയദർശനുമായുള്ള വിവാഹ മോചനത്തിന് ശേഷമാണ് അവർ സോഷ്യൽ മീഡിയയിൽ സജീവമായത്. യാത്രയും യോഗയുമായി ജീവിതം മുന്നോട്ടു നയിച്ച ലിസിക്ക് വീണ്ടും സിനിമയിൽ അഭിനയിക്കാൻ ഒരുങ്ങുകയാണ്. മകൾ കല്ല്യാണി സിനിമയിൽ അരങ്ങേറ്റം കുറിക്കാൻ ഒരുങ്ങുന്നു എന്ന വാർത്തകൾ പുറത്തുവരുന്നതിടെയാണ് ലിസി രണ്ടാം വരവിന് ഒരുങ്ങുന്ന വിവരവും പുറത്തുവരുന്നത്.

പ്രിയദർശനെ വിവാഹം കഴിച്ചു സിനിമയിൽ നിന്നു പിന്മാറിയ ലിസിയുടെ രണ്ടാം വരവു തെലുങ്കിലാണ്. കൃഷ്ണ ചൈതന്യയാണ് ചിത്രം സംവിധാനം ചെയ്യുന്നത്. പവൻ കല്ല്യാണും ത്രിവിക്രം ശ്രീനിവാസും സുധാകർ റെഡ്ഡിയും ചേർന്നു നിർമ്മിക്കുന്ന ചിത്രത്തിൽ നിഥിനും മേഘയുമാണു പ്രധാനതാരങ്ങൾ.

ചിത്രത്തിൽ താൻ ഒരു പ്രധാന വേഷത്തിൽ എത്തുന്നു എന്നു ലിസി പറയുന്നു. 1994 ൽ സോമനാഥ് സംവിധാനം ചെയ്ത ചാണക്യസൂത്രത്തിലാണു ലിസി അവസാനമായി വേഷമിട്ടത്. 22-ാം വയസിൽ നിറയെ അവസരങ്ങൾ ഉള്ളപ്പോൾ അഭിനയം നിർത്തേണ്ടി വന്നതിൽ കുറ്റബോധം ഉണ്ട് എന്നു ലിസി ഫേസ്‌ബുക്ക് പോസ്റ്റിൽ പറയുന്നു. ഇന്നും കുറ്റബോധം തോന്നുന്ന തീരുമാനമാണത്. തീർച്ചയായും നഷ്ട്ടപ്പെട്ട ആ കാലവും ആ വേഷവും ഇനി തിരിച്ചു കിട്ടില്ല. രണ്ടാം ഇന്നിങ്സിൽ കൂടുതൽ മെച്ചമാകുമെന്നാണു പ്രതീക്ഷ എന്നു ലസി ഫേസ്‌ബുക്കിൽ കുറിക്കുന്നു.