എഴുത്തച്ഛൻ പുരസ്‌കാരം പ്രൊഫ. എസ് കെ വസന്തന്; അഞ്ചു ലക്ഷം രൂപയും പ്രശസ്തിപത്രവും ശിൽപവും അടങ്ങുന്ന പുരസ്‌ക്കാരം പ്രഖ്യാപിച്ചത് മന്ത്രി സജി ചെറിയാൻ

തിരുവനന്തപുരം: എഴുത്തച്ഛൻ പുരസ്‌കാരം ഭാഷാചരിത്ര പണ്ഡിതൻ എസ് കെ വസന്തന്. അഞ്ചുലക്ഷം രൂപയും പ്രശസ്തിപത്രവും ശിൽപവും അടങ്ങുന്നതാണ് പുരസ്‌കാരം. സാംസ്‌കാരിക മന്ത്രി സജി ചെറിയാൻ വാർത്താ സമ്മേളനത്തിലാണ് അവാർഡ് പ്രഖ്യാപിച്ചത്.

കാലടി ശ്രീശങ്കര കോളേജിലും പിന്നീട് സംസ്‌കൃത സർവ്വകലാശാലയിലും അദ്ധ്യാപകനായിരുന്നു. മലയാള ചരിത്ര ഗവേഷകനും അദ്ധ്യാപകനും നോവലിസ്റ്റുമാണ് . ഉപന്യാസം, നോവൽ, ചെറുകഥ, കേരള ചരിത്രം, വിവർത്തനം എന്നിങ്ങനെ വിവിധ വിഭാഗങ്ങളിലായി നിരവധി പുസ്തകങ്ങൾ പ്രസിദ്ധീകരിച്ചു.

കൂടിയല്ലാ ജനിക്കുന്ന നേരത്തും, കേരള സംസ്‌കാരചരിത്രനിഘണ്ടു, നമ്മൾ നടന്ന വഴികൾ എന്നിവ പ്രധാന രചനകളാണ്. 2007-ൽ വൈജ്ഞാനിക സാഹിത്യത്തിനു കേരള സാഹിത്യ അക്കാദമി പുരസ്‌കാരം കേരള സാംസ്‌കാരികചരിത്ര നിഘണ്ടു എന്ന ഗ്രന്ഥത്തിന് ലഭിച്ചു. 2013 ൽ സമഗ്ര സംഭാവനയ്ക്കുള്ള അക്കാദമി പുരസ്‌കാരത്തിനും അർഹനായിട്ടുണ്ട്.