ഭാര്യയെ ചിരവ കൊണ്ട് അടിച്ച് കൊലപ്പെടുത്താൻ ശ്രമിച്ചു; വധശ്രമക്കേസിൽ അറസ്റ്റ് തടയാൻ ഹൈക്കോടതിയുടെ വ്യാജ ഉത്തരവ് ചമച്ചു; തട്ടിപ്പ് ബോധ്യപ്പെട്ടതോടെ പ്രതി അറസ്റ്റിൽ; കോടതിക്ക് പരാതി നൽകി ഡിജിപി

കൊച്ചി: വധശ്രമ കേസിലെ അറസ്റ്റ് തടയാൻ അഭിഭാഷകനും പ്രതിയും ഹൈക്കോടതിയുടെ പേരിൽ വ്യാജ ഉത്തരവുണ്ടാക്കിയ സംഭവത്തിൽ കോടതിക്ക് പരാതി നൽകി ഡിജിപി. അറസ്റ്റ് തടഞ്ഞുകൊണ്ടുള്ള ഇടക്കാല ഉത്തരവുണ്ടാക്കിയാണ് പൊലീസുകാരെ കബളിപ്പിച്ചത്.സംഭവത്തിൽ നടപടി ആവശ്യപ്പെട്ടാണ് ഡിജിപി പരാതി നൽകിയത്. പരാതിയുടെ അടിസ്ഥാനത്തിൽ ഹൈക്കോടതി നടപടി തുടങ്ങി.

ഭാര്യയെ ചിരവ കൊണ്ട് അടിച്ച് കൊലപ്പെടുത്താൻ ശ്രമിച്ച കേസിൽ ഇക്കഴിഞ്ഞ 21 നാണ് പ്രതിയായ തൈക്കാട് സ്വദേശി പ്രശാന്ത് കുമാർ ഹൈക്കോടതിയിൽ മുൻകൂർ ജാമ്യ ഹർജി നൽകിയത്. കേസിൽ ജസ്റ്റിസ് പി ഗോപിനാഥ് സർക്കാർ വിശദീകരണം കേൾക്കാൻ മാറ്റുകയും ചെയ്തു. എന്നൽ കരമന പൊലീസ് പ്രതിയെ ഈ മാസം 12 ന് കസ്റ്റഡിയിലെടുത്തു. തൊട്ട് പിറകെയാണ് അഡ്വ ഷാനു എന്ന് പരിചയപ്പെടുത്തിയ ആൾ സ്റ്റേഷനിലെത്തി പ്രതിയുടെ മുൻകൂർ ജാമ്യ ഹർജി ഹൈക്കോടതിയുടെ പരിഗണനയിൽ ആണെന്നും അറസ്റ്റ് തടഞ്ഞ് ഇടക്കാല ഉത്തരവുണ്ടെന്നും അറിയിച്ചത്.

മുൻകൂർ ജാമ്യഹർജിയിൽ കടുത്ത നടപടികൾ പാടില്ലെന്ന് കോടതിയുടെ നിർദേശമുണ്ടെന്ന ഉത്തരവാണ് പ്രതികൾ വ്യാജമായി ഉണ്ടാക്കിയത്. സ്റ്റേഷൻ ഇൻസ്‌പെട്കർക്ക് ഹൈക്കോടതി രേഖ എന്ന നിലയിൽ ഇത് കൈമാറുകയും ചെയ്തു. കേസുകളുടെ സ്ഥിതി വിവര പട്ടികയിൽ കൃതിമം നടത്തിയാണ് ഇത്തരം ഒരു ഉത്തരവുണ്ടാക്കിയത്. എന്നാൽ ഇക്കാര്യം മനസിലാകാതിരുന്നതോടെ പ്രതിയെ പൊലീസ് അഭിഭാഷകനൊപ്പം വിട്ടയച്ചു. പിന്നീട് എസ്,എച്ച് ഒയ്ക്ക് തോന്നിയ സംശയമാണ് വലിയ തട്ടിപ്പ് പുറത്താക്കിയത്.

പ്രതിയുടെ അറസ്റ്റ് തടഞ്ഞ് യാതൊരു ഉത്തരവും കേസ് വിവര പട്ടികയിൽ ഉണ്ടായിരുന്നില്ല. തട്ടിപ്പാണെന്ന് ബോധ്യമായതോടെയാണ് ഡിജിപി ഓഫീസിൽ വിവരം കൈമാറിയത്. ഇടക്കാല ഉത്തരവൊന്നും ഇല്ലെന്ന് വ്യക്തമായതിന് പിറകെ പ്രതിയെ പൊലീസ് പിടികൂടി റിമാൻഡ് ചെയ്തു. ഈ സംഭവത്തിലാണ് അന്വേഷണം ആവശ്യപ്പെട്ട് ഡിജിപി ഓഫീസ് ഹൈക്കോടതി രജിസ്റ്റ്രാക്ക് പരാതി നൽകിയത്.

അറസ്റ്റ് തടഞ്ഞുകൊണ്ടുള്ള നിർദ്ദേശം കോടതിയുടെ ഭാഗത്തുനിന്നുണ്ടെന്ന് അന്വേഷണ ഉദ്യോഗസ്ഥരെ തെറ്റിദ്ധരിപ്പിക്കാൻ ശ്രമം നടന്നുവെന്നതാണ് പ്രോസിക്യൂഷന്റെ പരാതി. ഇതുസംബന്ധിച്ച് ഹൈക്കോടതി രജിസ്ട്രാർക്ക് ഡയറക്ടർ ജനറൽ ഓഫ് പ്രോസിക്യൂഷന്റെ ഓഫീസാണ് പരാതി നൽകിയത്. ഈ പരാതി ഹൈക്കോടതി പരിശോധിക്കുകയാണ്.

കോടതിയുടെ ഐടി സെല്ലിലെ അടക്കം രേഖകൾ പരിശോധിക്കുകയും ഇത്തരമൊരു ഉത്തരവ് കോടതിയുടെ ഭാഗത്തുനിന്നുണ്ടായിട്ടില്ലെന്നു ബോധ്യപ്പെട്ടിട്ടുമുണ്ട്. ഇതിന്റെ അടിസ്ഥാനത്തിലാണ് പ്രോസിക്യൂഷന്റെ പരാതി. വ്യാജരേഖ ചമച്ചവർക്കെതിരേ നടപടി വേണമെന്നാണ് ആവശ്യം. പരാതിയുടെ അടിസ്ഥാനത്തിൽ പ്രതിയുടെ മുൻകൂർ ജാമ്യ ഹർജി വ്യാഴാഴ്ച പരിഗണിക്കാൻ ജസ്റ്റിസ് പി ഗോപിനാഥ് തീരുമാനിച്ചിട്ടുണ്ട്.