മമ്മൂട്ടിയെ സന്ദർശിച്ച് മാധവൻ; പുതിയ സിനിമ ഒരുങ്ങുന്നുണ്ടോന്ന് ആരാധകർ; കൂടിക്കാഴ്‌ച്ച സംവിധായകരും നിർമ്മാതാവും ഉൾപ്പെടുന്ന സംഘത്തോടൊപ്പം
കൊച്ചി: മോഹൻലാലും അജിത്തും ഒരുമിച്ചുള്ള ഫോട്ടോ സമൂഹമാധ്യമങ്ങളിൽ വൈറലായിരുന്നു.രണ്ടുപേരും ഒരുമിക്കുന്നുണ്ടോ എന്ന് ചോദിച്ച് ആരാധകർ അപ്പോഴേ രംഗത്ത് വന്നിരുന്നു.ഇപ്പോഴിത നടൻ മമ്മൂട്ടിയുമായി കൂടിക്കാഴ്ച നടത്തിയിരിക്കുകയാണ് തമിഴ് താരം മാധവൻ. ദുബായിൽ വച്ചാണ് മാധവൻ മമ്മൂട്ടിയെ സന്ദർശിച്ചത്. ഇരുവരുടെയും ചിത്രങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്. പുതിയ സിനിമ ഒരുങ്ങുന്നുണ്ടോ എന്നാണ് ആരാധകർ ചോദിക്കുന്നത്.
മമ്മൂട്ടിക്കും മാധവനും പ്രജേഷ് സെന്നിനും ഒപ്പം നിർമ്മാതാക്കളായ ആന്റോ ജോസഫും വിജയ് മൂലനും കൂടിക്കാഴ്ചയിൽ ഉണ്ടായിരുന്നു. ദുബായ് എക്സ്പോയിൽ പങ്കെടുക്കാനെത്തിയതായിരുന്നു മമ്മൂട്ടി.
അതേസമയം, മാധവന്റെ ആദ്യത്തെ സംവിധാന സംരംഭത്തിലെ സഹ സംവിധായകനാണ് പ്രജേഷ് സെൻ. 'റോക്കട്രി ദ നമ്പി ഇഫക്ട്' എന്നാണ് ചിത്രത്തിന്റെ പേര്. ഈ ചിത്രത്തിൽ മമ്മൂട്ടിയും എത്തുന്നുണ്ടോ എന്നും പ്രേക്ഷകർ ചോദിക്കുന്നു. ചിത്രത്തിലെ കേന്ദ്ര കഥാപാത്രമായി മാധവൻ തന്നെയാണ് സ്‌ക്രീനിലെത്തുന്നത്.
ഭീഷ്മ പർവ്വമാണ് മമ്മൂട്ടിയുടേതായി റിലീസ് കാത്തിരിക്കുന്ന ചിത്രം. പ്രഖ്യാപന സമയം മുതൽ ശ്രദ്ധനേടിയ ചിത്രം സംവിധാനം ചെയ്യുന്നത് അമൽ നീരദാണ്. ഫെബ്രുവരി 24ന് ഭീഷ്മപർവ്വം റിലീസ് ചെയ്യുമെന്ന് നേരത്തെ അറിയിച്ചിരുന്നു.
