അൽഫോൺസ് പുത്രൻ സംവിധാനം ചെയ്ത പ്രേമത്തിലൂടെയാണ് മഡോണ സെബാസ്റ്റ്യൻ സിനിമയിൽ തുടക്കം കുറിച്ചത്. സെലിൻ ജോർജ് എന്ന കഥാപാത്രത്തെയാണ് താരം അവതരിപ്പിച്ചത്. മലരിനും മേരിക്കും ശേഷം എത്തിയ സെലിനും മലയാള സിനിമാ പ്രേക്ഷകർക്കിടയിൽ ഇടംനേടിക്കഴിഞ്ഞു. ഇപ്പോൾ തനിക്ക് 18ാം വയസിൽ ലഭിച്ച സന്തോഷകരമായ നിമിഷങ്ങളെക്കുറിച്ച് നടി പങ്ക് വച്ചിരിക്കുകയാണ്.ഒരു സ്വകാര്യ ചാനലിന് നൽകിയ അഭിമുഖത്തിൽ ആണ് ജീവിതത്തിലെ സന്തോഷകരമായ നിമിഷങ്ങളെക്കുറിച്ച് സംസാരിച്ചത്.

പതിനെട്ട് വർഷത്തോളം ഒറ്റക്കുട്ടിയായി വന്ന് പെട്ടെന്ന് ഒരു ദിവസം അച്ഛൻ പറയുകയാണ് 'ഡോണ ഒരു വാർത്തയുണ്ട്, അമ്മ ഗർഭിണി ആണെന്ന്'. അച്ഛന്റെ കയ്യിൽ റിപ്പോർട്ടും ഉണ്ടായിരുന്നു. എനിക്ക് എന്താണ് പ്രതികരിക്കേണ്ടതെന്ന് അറിയില്ലായിരുന്നു. ശരിക്കും ഞാൻ സന്തോഷിക്കേണ്ട സമയമാണ്. പക്ഷെ ആ നിമിഷം നിർവികാരതയാണ് തോന്നിയത്.

എനിക്ക് ചിരി വരുന്നില്ല. എന്താ ചെയ്യേണ്ടത് എന്ന് അറിയില്ല, അതായിരുന്നു എന്റെ പ്രതികരണം. ഞാൻ എന്നോട് തന്നെ പറയുന്നുണ്ട്. ഒരുപാട് ചിന്തിച്ച് തലപ്പുണ്ണാക്കുന്നതിന് പകരം നീയെന്താ സന്താഷിക്കാത്തതെന്ന്. പക്ഷേ ഒറ്റക്കുട്ടിയായി വളർന്ന ഒരാൾക്ക് ഈ വാർത്ത അങ്കലാപ്പ് ഉണ്ടാക്കില്ലേ?

പക്ഷേ എത്ര പേർക്കുണ്ട് ഈ ഭാഗ്യം. അമ്മ ഗർഭിണി ആകുന്നത് ഞാൻ കണ്ടു. ഒരു രാജ്ഞിയെപ്പോലെ ആയിരുന്നു. ഒരു നീല വസ്ത്രമണിഞ്ഞ് വലിയ വയറൊക്കെയായി അമ്മ ആകാശം നോക്കി നിൽക്കുന്ന ഒരു ചിത്രമുണ്ട്. അതെനിക്കേറെ ഇഷ്ടമാണ്- മഡോണ പറയുന്നു