ദോഹ: അൽ മദ്‌റസ അൽ ഇസ്ലാമിയ ദോഹയിൽ മദ്‌റസ ഫെസ്റ്റിന് തുടക്കമായി. ജനുവരി വരെ നീണ്ടുനിൽക്കുന്ന മദ്‌റസാ ഫെസ്റ്റിലെ ഓഫ് സ്റ്റേജ് മത്സരങ്ങളുടെ ഔപചാരിക ഉദ്ഘാടനം പ്രസിദ്ധ ചിത്രകാരനും കാലിഗ്രഫി ആക്ടിവിസ്റ്റുമായ അബ്ദുൽ കരിം കക്കോവ് നിർവഹിച്ചു. ഈ വർഷത്തെ മദ്‌റസ ഫെസ്റ്റിന്റെ തീം ആയ 'മാതാപിതാക്കൾ' എന്ന വിഷയത്തിന്റെ സന്ദേശം കൈമാറുന്ന ഒരു കാലിഗ്രഫി രചനയിലൂടെയാണ് ഉദ്ഘാടനം നിർവഹിക്കപ്പെട്ടത്.

ഉദ്ഘാടനത്തിന്റെ ഭാഗമായി ഒന്നാം ക്ലാസ് വിദ്യാർത്ഥികൾക്ക് കളറിങ് മത്സരം സംഘടിപ്പിച്ചു.മദ്‌റസാ ആക്ടിങ് പ്രിൻസിപ്പാൾ സഫീർ മമ്പാട് അധ്യക്ഷത വഹിച്ച ചടങ്ങിൽ പി.ടി.എ പ്രസിഡന്റ് ഡോ. അമാനുല്ല വടക്കാങ്ങര ആശംസകളർപ്പിച്ച് സംസാരിച്ചു. വൈസ് പ്രിൻസിപ്പൾമാരായ എം ടി സിദ്ദീഖ്, മുഹമ്മദലി ശാന്തപുരം, എൽ.പി സെഷൻ ഹെഡ് അബുല്ലൈസ് എ.എം, ഫെസ്റ്റ് കൺവീനർ അനീസ് റഹ്മാൻ, ജിഷിൻ അബൂബക്കർ തുടങ്ങിയവർ സംബന്ധിച്ചു.