തെന്നിന്ത്യൻ സിനിമാലോകം ഒന്നടങ്കം കാത്തിരിക്കുന്ന ചിത്രമായ മഹാനടിയുടെ റിലീസ് തീയതി പ്രഖ്യാപിച്ചുവെന്നുള്ള സന്തോഷ വാർത്തയാണ് ഇപ്പോൾ പുറത്തുവന്നിട്ടുള്ളത്. നേരത്തെ ചിത്രത്തിന്റെ റിലീസ് തീയതി പ്രഖ്യാപിച്ചിരുന്നുവെങ്കിലും പിന്നീട് മാറ്റുകയായിരുന്നു. തെലുങ്കിലെ മുൻനിര അഭിനേത്രികളിലൊരാളായ സാവിത്രിയുടെ ജീവിതകഥ പറയുന്ന ചിത്രവും ദുൽഖറിന്റെ ടോളിവുഡ് അരങ്ങേറ്റചിത്രവും കൂടിയായ മഹാനടിയ ആദ്യം തെലുങ്ക് സംസ്ഥാനങ്ങളിൽ ആണ് ആദ്യം എത്തുക. ആന്ധ്രയിലും തെലുങ്കാനയിലുമാണ് ആദ്യം റിലീസിന് എത്തുക.

പിന്നാലെ കേരളത്തിലും തമിഴ്‌നാട്ടിലും ചിത്രമെത്തും. ഈ ബുധനാഴ്ച (മെയ് 9) ആന്ധ്രയിലും തെലുങ്കാനയിലും തീയേറ്ററുകളിലെത്തുന്ന ചിത്രം രണ്ട് ദിവസങ്ങൾക്ക് ശേഷം 11നാണ് കേരളത്തിലും തമിഴ്‌നാട്ടിലുമെത്തുക. മലയാളത്തിലും തമിഴിലുമായി നിർമ്മിക്കപ്പെട്ട ദുൽഖറിന്റെ പല പ്രധാന സിനിമകളും മൊഴിമാറ്റം നടത്തി നേരത്തേ തെലുങ്ക് സംസ്ഥാനങ്ങളിൽ പ്രദർശനത്തിനെത്തിയിട്ടുണ്ട്. മണി രത്‌നത്തിന്റെ ഓകെ കൺമണി, ജെന്യൂസി മുഹമ്മദിന്റെ 100 ഡെയ്‌സ് ഓഫ് ലവ്, സമീർ താഹിറിന്റെ കലി എന്നിവയൊക്കെ തെലുങ്ക് സിനിമാപ്രേമികൾക്ക് മുന്നിലും എത്തിയിരുന്നു. എന്നാൽ തെലുങ്കിൽ ഇനിഷ്യൽ പ്രൊഡക്ഷൻ നടക്കുന്ന ഒരു ചിത്രത്തിൽ ദുൽഖർ അഭിനയിക്കുന്നത് ആദ്യമായാണ്.

1950ൽ ടോളിവുഡിലൂടെ തന്റെ അഭിനയജീവിതം ആരംഭിച്ച സാവിത്രിയുടെ 1940 മുതലുള്ള നാൽപത് വർഷങ്ങളാണ് സിനിമ ദൃശ്യവൽക്കരിക്കുന്നത്. അക്കാലത്ത് വിവാദങ്ങൾക്ക് വഴിവെച്ച, ജെമിനി ഗണേശനുമായുള്ള അവരുടെ ബന്ധവും സിനിമയുടെ ഒരു പ്രധാന ഭാഗമാണ്. ജെമിനി ഗണേശനായാണ് ദുൽഖർ പ്രത്യക്ഷപ്പെടുന്നത്