താരങ്ങളുടെ പ്രതിഫലമാണ് മലയാളത്തിലെ ഏറ്റവും വലിയ പ്രതിസന്ധി എന്നാണ് ചില കോണുകളിൽ നിന്നുള്ള വിമർശനം. കോടികളാണ് സൂപ്പർ താരങ്ങൾ പ്രതിഫലം വാങ്ങുന്നത്. അവർ അഭിനയിക്കുന്ന ചിത്രങ്ങളിൽ പലതും എട്ടുനിലയിൽ പൊട്ടാറുമുണ്ട്. അപ്പോഴൊക്കെ കുത്തുപാളയെടുക്കുന്നത് പാവം നിർമ്മാതാക്കളുമാണ്.

താരരാജാക്കന്മാർ കോടികൾ പ്രതിഫലം വാങ്ങുമ്പോൾ എത്രയായിരിക്കും റാണിമാരുടെ പ്രതിഫലം. മലയാളത്തിൽ പ്രമുഖ നടിമാർ ഇതുവരെ കോടി ക്ലബ്ബിൽ കയറിയിട്ടില്ലെന്നാണു റിപ്പോർട്ടുകൾ. നായികമാരിൽ ഏറ്റവും കൂടുതൽ പ്രതിഫലം കൈപ്പറ്റുന്നത് സിനിമാ മേഖലയിൽ നിന്നു വിട്ടുനിന്നശേഷം തിരികെ എത്തിയ നടി മഞ്ജു വാര്യരാണ്.

50 ലക്ഷം രൂപയാണ് മഞ്ജുവിന്റെ പ്രതിഫലം. അമല പോളാണ് രണ്ടാം സ്ഥാനത്തുള്ളത്. 40 ലക്ഷമാണ് ഒരു ചിത്രത്തിന് അമലയ്ക്കു കിട്ടുന്നത്. കാവ്യ മാധവനും ഭാവനയ്ക്കുമൊക്കെ 17 ലക്ഷം മുതൽ 25 ലക്ഷം വരെയാണ് പ്രതിഫലം. ഏറ്റവുമധികം പ്രതിഫലം സ്വന്തമാക്കുന്ന മലയാളി നടിമാർ ഇവരാണ്.

മഞ്ജു വാര്യർ

വിവാഹശേഷം അഭിനയം നിർത്തിയപ്പോൾ മലയാളത്തിന് ഒരു മികച്ച നടിയെയാണ് നഷ്ടമായതെന്ന് ആരാധകരെല്ലാം ഒരേ സ്വരത്തിൽ പറഞ്ഞത് മഞ്ജു വാര്യരെക്കുറിച്ചാണ്. മഞ്ജുവിന്റെ തിരിച്ചു വരവിനായി ഏവരും ആഗ്രഹിക്കുകയും ചെയ്തു. ഹൗ ഓൾഡ് ആർ യു എന്ന ചിത്രത്തിലൂടെ ശക്തമായ തിരിച്ചുവരവു നടത്തിയ മഞ്ജു തന്നെയാണ് നടിമാരിൽ ഏറ്റവും കൂടുതൽ പ്രതിഫലം വാങ്ങുന്നത്. 50 ലക്ഷം രൂപയാണ് മഞ്ജുവിന്റെ പ്രതിഫലം. തിരിച്ചുവരവിലാണ് ഇത്രയധികം തുക മഞ്ജു വാങ്ങാൻ തുടങ്ങിയത്.

അമല പോൾ

ലാൽ ജോസ് ചിത്രമായ നീലത്താമരയിലൂടെ മലയാള ചലച്ചിത്ര ലോകത്ത് എത്തിയ നടിയാണ് അമല പോൾ. തമിഴിലും മലയാളത്തിലും ഒരുപോലെ തിളങ്ങിയ ഈ നടി 30 മുതൽ 40 ലക്ഷം വരെയാണ് ഓരോ ചിത്രത്തിനും പ്രതിഫലം വാങ്ങുന്നത്. അടുത്തിടെ ഒരു തെലുങ്കു ചിത്രത്തിൽ അഭിനയിക്കാനായി ഒരു കോടി രൂപ പ്രതിഫലം ചോദിച്ചെന്നും റിപ്പോർട്ടുകളുണ്ട്. ഫഹദിനൊപ്പം ഒരു ഇന്ത്യൻ പ്രണയകഥ, മോഹൻലാലിനൊപ്പം റൺ ബേബി റൺ, ലൈല ഓ ലൈല, നിവിൻ പോളിക്കൊപ്പം മിലി എന്നീ ചിത്രങ്ങളിലൂടെ മലയാളത്തിന്റെ പ്രിയപ്പെട്ട താരങ്ങളിലൊരാളാകാൻ അമലയ്ക്കു കഴിഞ്ഞു.

മീര ജാസ്മിൻ

മലയാളത്തിനു പുറമെ മറ്റ് ദക്ഷിണേന്ത്യൻ സിനിമകളിലും തന്റേതായ ഇടം കണ്ടെത്തിയ നടിയാണ് മീര ജാസ്മിൻ. അഭിനയ ചാതുരി കൊണ്ടു മലയാളി മനസുകളുടെ ഇഷ്ടം നേടാൻ കഴിഞ്ഞ മീരയ്ക്കു ലഭിക്കുന്ന പ്രതിഫലം 25 മുതൽ 30 ലക്ഷം വരെയാണ്. ലോഹിതദാസിന്റെ സൂത്രധാരനിലൂടെ ചലച്ചിത്രരംഗത്തെത്തിയ മീര അഭിനയ രംഗത്തു പഴയതു പോലെ സജീവമല്ല. വളരെ കുറച്ചു ചിത്രങ്ങളിൽ മാത്രമാണ് ഇപ്പോൾ മീര ജാസ്മിൻ അഭിനയിക്കുന്നത്.

ലക്ഷ്മി മേനോൻ

മലയാളത്തേക്കാൾ തമിഴ് ചിത്രങ്ങളിലൂടെ മലയാളികൾക്കു പരിചിതയായ ലക്ഷ്മി മേനോൻ വാങ്ങുന്നത് 20 മുതൽ 35 ലക്ഷം രൂപ വരെയാണ്. വിനയൻ സംവിധാനം ചെയ്ത രഘുവിന്റെ സ്വന്തം റസിയ എന്ന ചിത്രത്തിൽ സഹനടിയായി എത്തിയ ലക്ഷ്മി പിന്നീട് തമിഴിൽ മുൻ നിര നായികമാരിൽ ഒരാളായി. മലയാളത്തിൽ ദിലീപിന്റെ നായികയായി അവതാരം എന്ന ചിത്രത്തിലും ലക്ഷ്മി എത്തി.

പ്രിയാമണി

വിവാഹ വിശേഷങ്ങളിലൂടെ ഇപ്പോൾ വാർത്തകളിൽ നിറഞ്ഞു നിൽക്കുന്ന താരമാണ് പ്രിയാമണി. 20 മുതൽ 25 ലക്ഷം വരെയാണ് ഈ താരത്തിന്റെ പ്രതിഫലം. ദേശീയ അവാർഡ് ലഭിച്ച ഈ നടി ഒറ്റനാണയം, പ്രാഞ്ചിയേട്ടൻ ആൻഡ് ദ സെയിന്റ്, തിരക്കഥ തുടങ്ങിയ ചിത്രങ്ങളിലൂടെയാണു മലയാളത്തിൽ സാന്നിധ്യം അറിയിച്ചത്.

കാവ്യ മാധവൻ

മലയാളികളുടെ എക്കാലത്തെയും പ്രിയങ്കരിയായ നടിയായ കാവ്യ മാധവൻ ഒരു ചിത്രത്തിനു വാങ്ങുന്നത് 17 മുതൽ 25 ലക്ഷം രൂപവരെയാണ്. ഗായികയായും ഗാനരചയിതാവായും തിളങ്ങിയ ഈ നടി ബാല്യകാലം മുതൽ സിനിമയുടെ ഭാഗമാണ്. വിവാഹവും വിവാദങ്ങളും കാരണം ഇടക്കാലത്ത് സിനിമാമേഖലയിൽ നിന്നു വിട്ടു നിന്നെങ്കിലും തിരികെ എത്തിയ നടിക്ക് ഇപ്പോഴും ഏറെ ആരാധകരുണ്ട്.

മമ്ത മോഹൻദാസ്

ഹരിഹരൻ സംവിധാനം ചെയ്ത മയൂഖം എന്ന ചിത്രത്തിലൂടെ സിനിമാപ്രവേശനം കുറിച്ച നടിയാണ് മമ്ത മോഹൻദാസ്. ഒരു ചിത്രത്തിന് 17 മുതൽ 20 ലക്ഷം വരെയാണ് മമ്ത വാങ്ങുന്നത്. അർബുദ രോഗത്തോടു പടപൊരുതി വിജയം വരിച്ച ഈ നടി മികച്ച ഗായികയായും പേരെടുത്തിട്ടുണ്ട്.

നിത്യ മേനോൻ

ബാലനടിയായി അഭിനയ രംഗത്തെത്തി മലയാളി മനസുകളുടെ പ്രിയതാരമായി മാറിയ വ്യക്തിയാണ് നിത്യ മേനോൻ. 15 മുതൽ 25 ലക്ഷം വരെയാണ് നിത്യയുടെ ഒരു ചിത്രത്തിന്റെ പ്രതിഫലം. ദുൽഖർ സൽമാനുമൊത്ത് അഭിനയിച്ച മണിരത്‌നം ചിത്രം ഓകെ കണ്മണി മികച്ച അഭിപ്രായം നേടി സൂപ്പർ ഹിറ്റാകുകയും ചെയ്തിരുന്നു. മലയാളത്തിൽ 100 ഡേയ്‌സ് ഓഫ് ലവ് എന്ന ചിത്രമാണ് നിത്യയുടേതായി ഒടുവിൽ പുറത്തിറങ്ങിയത്. ഇതിലും ദുൽഖർ ആയിരുന്നു നായകൻ.

ഭാവന

കമലിന്റെ നമ്മളിലൂടെ മലയാള സിനിമയിൽ എത്തിയ ഭാവന ഇപ്പോൾ വാങ്ങുന്നത് 15 മുതൽ 25 ലക്ഷം രൂപവരെയാണ്. മലയാളത്തിനു പുറമെ തമിഴ്, കന്നഡ സിനിമകളിലും തിരക്കുള്ള നടിയാണ് ഭാവന.

അതേസമയം, മലയാളിയും തെന്നിന്ത്യയിലെ പ്രമുഖ നടിയുമായ നയൻതാരയ്ക്കും കേരളത്തിൽ ഇപ്പോഴും നല്ല മാർക്കറ്റാണ്. ഒന്നരക്കോടി വീതം തമിഴിലും തെലുങ്കിലും വാങ്ങുമെങ്കിലും 45 ലക്ഷം രൂപ വാങ്ങിയാണ് നയൻസ് മലയാളത്തിൽ അഭിനയിക്കുന്നതെന്നാണു റിപ്പോർട്ട്. അന്യഭാഷകളിലേക്കു ചേക്കേറിയശേഷം അപൂർവം ചില മലയാള ചിത്രങ്ങളിൽ മാത്രമാണ് നയൻതാര അഭിനയിച്ചത്. ഭാസ്‌കർ ദ റാസ്‌കൽ എന്ന ചിത്രത്തിൽ മമ്മൂട്ടിയുടെ നായികയായി അഭിനയിച്ച നയൻതാര വീണ്ടും മറ്റൊരു മമ്മുട്ടി ചിത്രത്തിനു കൂടി കരാർ ഒപ്പിട്ടതായി റിപ്പോർട്ടുണ്ട്. മമ്മൂട്ടിക്കൊപ്പം തസ്‌കര വീരൻ, രാപ്പകൽ എന്നീ ചിത്രങ്ങളിൽ അഭിനയിച്ച നയൻസിനെ സിദ്ദിഖാണ് വീണ്ടും മമ്മൂട്ടിയുടെ നായികയാക്കിയത്. ഭാസ്‌കർ ദ റാസ്‌കലിനു മുമ്പ് സിദ്ദിഖ് സംവിധാനം ചെയ്ത ബോഡിഗാഡിലാണ് നയൻസ് മലയാളത്തിൽ അഭിനയിച്ചത്.